全城搶片

今朝係公司玩fb時,見到1111媽媽圖文並茂咁話係百佳買左兩包huggies中碼公主學習褲係$35.9/48片喎,初初我都仲未覺得要去搶架,不過諗諗下,真係見幾多買幾多都好喎,$35.9/48片喎,加上我又開始見到其他媽媽話買到,我就copy左叫大家姐放工幫我係tko睇下,我就返mos睇。

點之大家姐好叻,佢lunch已經幫我係科大間百佳買左兩包,仲比埋張單我睇,真係平到唔信呀,之後我成日下晝都睇住fb update,睇下有冇邊個媽媽又買到,講講下,有人話watson都係$35.9,不過好短時間就已經有人話watson已經改返佢地system,要$96一包。放工之後,我仲專登行出去搭車,諗住入百佳望下,點知九龍灣呢間跟本冇學習褲買,好失望啦,咁我又行埋過去telford watson睇,係連片都冇得賣,極度失望,跟住我就猶疑應該入mos睇好呀,定去西貢好呢,西貢少人d,可能執到喎。其實係我行緊出telford個時,大家姐已經話比我知,佢又係坑口百佳買到4包,即是佢個人紀錄買到6包,真係好勁呀,好啦,講講下,我決定入西貢博一博,點知西貢watson又係冇學習褲既,百佳就唔知係冇中碼賣定賣晒定收起,個貨架就係放到密晒,不過係冇中碼囉,唉,我居然一包影都見唔到,好鬼失落,買左d魚蛋牛丸就等巴士返屋企喇。

老公放工話係中環幫我睇下,佢一共打左三個電話黎問我買咩,幾多錢幾多片,答完佢,佢話比我知,咁冇喇,車,真係嘥氣。等到佢9點都未返到屋企,我未食飯先囉,食食下飯點之佢話mos百佳有喎,我叫佢拎去過機睇下係唔係$35.9,係就幫我買盡去,過左一陣我見佢冇打比我,我咪打去問下囉,佢話過機係$35.9,不過個亞姐拎走左包片,話要問下經理喎,好彩最終佢都成功買到4包,佢返到屋企,我真係好開心,人地唔知,以為我執到金添呀。

由於老公話你買時仲有好多,所以我死心不息,好想出去再買,點知去到都好似比人收埋晒咁,咩都冇喇,咁再為左死心,去多一間百佳,呢間直情冇貨,咁終於都死心返屋企,今日收穫係買左10包平片,哇卡卡。