產後檢查

今日係生左之後第一次單人出街,一早出去睇dr yu,上到去登記完就去食早餐,唔記得左食早餐時諗緊d咩,我就開始喊,咁啱返轉頭想上返dr yu度時,老公打比我,我就拎住個電話猛講我真係好唔開心,我覺得豬家好低能,佢又好乞人憎,真係令我好辛苦呀,喊完一輪就上左dr yu等,等左一陣就到我,dr yu好似好趕時間咁,睇得好似有d敷衍囉,唔知係唔係唔搵佢生就係咁,不過是但啦,我初初以為產後檢查係一定要做,咁咪搵佢囉,其實都有d搵笨,仲要買左一塊疤痕貼,我咪就係用左個一小條咁大把,仲有一大塊係櫃桶。

由於心情真係好差,落左樓之後就去左uniqlo買左兩件包腳衫比風風,因為爽已經有好多喇,風反而一件都冇,之後再行埋過去海港城polo,款都係咁上下,冇話好特別靚,不過唔高興嘛,咪買囉,一口氣買左4件比風爽,一人兩件,哈哈。

返到屋企好似半死咁,其實我真係未回復返晒,出去一陣都好攰好辛苦。

HASE探訪

今日我公司三個老闆黎探我,我都唔係第一日就同你講,我一早梳洗完叫你起身,你仲好似唔願郁咁,咁係唔係我老闆黎到,我老公仲訓緊覺,咁係唔係好好睇呢?你又有冇尊重過我呢?迫你洗左面又點?叫你換件衫好似叫你死咁。

仲有又係完全唔諗下自己做咩架喎,人地都就黎到,就走出露台掃屎,搞到個廳鬼死咁臭,係唔係真係要宜家掃先?有冇諗過會臭架?呢d咪又係好心做壞事囉,你真係好討厭呀,我就快爆喇。

老公生日

其實我真係好唔滿意你,返左工就完全唔理對仔女,我都唔想再同你嘈喇,今日你生日,我都一早問嬌姨可唔可以整你鐘意食既沙拉骨比你,都算代表我小小心意,但其實我真係好討厭你,唔想見到你返屋企呀。

魔魔集團探訪風爽

其實我真係唔明點解係都要今日出去剪髮呢?我一早講左今日係我朋友黎,到底有冇尊重過我呀?仲要唔係出去一陣,一早就死左出去,6點先打返黎話宜家返,我d朋友都走啦,我真係慶到爆炸呀,返到黎做show,拎紥花返黎做咩姐?咁大個人識唔識分輕重架?你以為你咁樣我會開心咩?你行來行去買花又點呀?我會欣賞咩?根本就係時間上既錯誤,你今日做呢d野做咩先?你係識尊重我既,今日就唔係出左去剪髮,仲嘥晒d時間去買花,打的返黎都唔係快過人,唔知扮咩,我只覺得你係做show囉。

成個變晒

老公今日開始返工,真係變得太快喇,一返工呢,好似完全唔記得自己做左亞爸咁,將公司唔開心既野帶返屋企,亦都冇理過兩個仔女,痴線,白痴,我憎死你呀!!!!

第13日

今日到我屋企人黎,氣氛好好多,開心好多,仲有今日終於都可以洗頭喇,個頭痕到爆呀!!!好想同風爽影相,但我個人脹爆,影極都樣衰,都係影佢地自己算把啦。

十二朝

又係激氣既一日,明明講好左今日12點幾1點先黎,冇端端11點未夠就聽到有人開我屋企門,痴線架,我咪講左唔好自己開門囉,一定係老公冇講啦,我真係覺得好討厭,點解明知屋企有人都要自己開門入黎呀?同埋咁早黎做咩?

好啦,黎到又係多多野講,好煩好煩,明明平時嬌姨黎到我就可以訓一陣,今日完全訓唔到,攰死我。跟住d親戚黎到,我嬲到自己坐出露台陪nic都唔想係屋入面囉,講真,有邊個有理過我呢個產婦呀?個個都只係睇bb,問候我老公,冇錯呀,係問候我老公辛唔辛苦,冇人理過我,正宗要仔唔要乸,all crazy!係得我媽咪理下我,媽咪仲比左大利是我補身,叫我買多d靚野食。

夜晚同老公講,佢同我講咩呀?佢話我媽懶巴閉,點解要咁樣比錢我,好似佢地克薄我咁,你地屋企點對我姐,我大肚時見過幾多次面呀?個99返到黎香港,有冇煲過一次半次正正經經既湯比我飲?上去食飯都只係煲你可以飲既湯比你咋,仲有你地一家,點解要就個細妹去食buffet?我完全冇野到肚,又悶又冇謂,落的士仲要整爛左條裙,究竟你地錫過我d咩呢?宜家黎高興我生bb做咩呀?如果唔係我媽係咁煲野我食,我對仔女有咁健康,我有咁快復原咩?講野都唔用下個腦,痴線架!!!!

Nic唔鐘意細佬妹

過左幾日,Nic都仲係好似好唔開心咁,我真係覺得好對佢唔住,困住左佢,唔困佢又搞風爽,而我地又真係少左好多好多時間同佢玩,佢係極唔開心,我為佢喊左好多次,仲諗過帶佢去酒店住兩星期等佢鬆一鬆先。本來都打好晒電話,準備第二日送佢去酒店,諗住老公未放完假,如果nic唔開心都仲可以湊返佢返屋企,但今日,我真係好唔開心,我覺得唔可以有風爽就冇nic nic架,最後我都唔捨得帶佢走,我地決定第二日唔好圍欄比佢自由活動。


原來比nic自由活動佢就即刻開心返,咁我都放心喇,唔駛去住酒店,其實nic都ok既,佢都要d時間去適應屋企多左兩隻魔怪,nic nic加油呀,mama always loves u!!!!!

嬌姨駕到

今日大概10:30,救星終於到喇,嬌姨黎到令到我同老公都好似安落少少咁,其實今日一早起身,老公砌左個圍欄圍住nic,但其實佢唔開心,不過冇辦法啦,嬌姨驚狗嘛。今日第一日,大家都需要d時間去適應,所以成3點先有飯食,但原來坐月既野都好好味,我地兩個都食得好開心囉,有嬌姨係屋企時,我同老公係盡情訓,完全唔知發生咩事。

風爽出院了

經過左幾日係醫院不停聽家姐仔同細佬仔既日子,終於都可以出院喇,今日一早叫老公起身,叫佢準備隨時黎接我走,我就成朝係咁同d亞姐傾計,仲一早換晒衫等兒科睇風爽就走人。其實尋日我已經開始對6299不滿,我都同左老公講,叫佢地尋晚唔好黎架啦,我老公又黎唔到,佢地黎又阻住個位比我屋企人喎,我又要搵野到佢地講,最重要係我唔想再聽到62話我爽爽隻手凍,又話佢打乞嚏,真係好煩呀,點知佢地係第一二個衝入黎,唉,好煩呀!

今日出院,又係因為99尋日叫豬唔好拎走個暖壺,所以唔見左一個啦,放左係床下底又唔記得,尋日拎走咪好啦,真係麻煩呀。仲有,今日走時,人地姑娘同我對資料,佢又要加把咀,人地剪個alarm又話係臍帶,救命呀,我受夠喇!!!!

返到屋企,我宜家冇氣冇力,nic幾日冇見我又緊張喎,佢就一味係度no,又係得把口,搞到成個氣氛都好緊張囉,做咩姐,真係好煩呀,好彩佢都好快就出去幫手買餸同帶atik黎,之後我望一望屋企d格局,個老公又唔聽我講啦,叫佢床板較最高,佢就較最低,我要彎身放bb真係好痛架,叫佢整返去,又話自己覺得冇問題,頂佢呀,我都知佢唔會識搞個奶煲同奶樽,所以返黎要自己親手搞,一返屋企已經好混亂,仲要個99自己用鎖匙開門,我真係好嬲呀。佢好心幫我煮餐飯,煮d咩出黎姐,兩個人有6個餸,冇一樣係有味既,一唔係d雞翼就又咸又鞋,仲好意思成日話教左atik煮咩,自己冇野叻,最叻就係煮野食,我煮都仲好味d囉。好不容易,屋企先平靜落黎有得休息下,不過初生bb係要不停食奶,我同老公都係咁講,好想快d到聽日,好想嬌姨快d黎呀,救命呀!

風爽第二天

今朝醫生巡房,終於見返mimi seto,佢話終於都出左世,不過我血壓高都要小心d,本來佢話我下晝可以拆尿喉,不過佢一去左隔離床位,我就嘔,所以佢改左我第二日先拆尿喉,所以姑娘叫我試下落床,我都死唔落,其實去到下午,我都仲係有少少頭暈暈,同埋未食得野。11點,姑娘比左風風我,教我餵人奶,好得意呀,點解一埋身就識食既,不過我真係唔識餵囉,佢食下又甩下咁,都唔知佢食到幾多,又唔知自己究竟有奶未喎,餵完風就等12點老公入黎睇我,佢入左黎冇耐,連爽爽都落埋病房同我一齊,唔駛再去加護房喇,兩個BB都係身邊個感覺非常好,我真係好鬼鐘意你地呀!


夜晚時分,媽咪同兩個家姐都黎左探我,仲有竹太同姐姐,其實我冇落床,我最多都係抱住黎望下,同埋我全日都冇咩見過爽爽開眼,夜晚二家姐send返d相比我先知,原來我個女真係好靚,對眼靚到爆呀!

出世了

風爽終於都出世喇!!!


今晚徹夜難眠,一來同老公頂左兩句,二來個肚陰陰痛,其實由3點幾開始痛,不過因為上次誤鳴,唔敢亂叫肚痛,直到5點左右,痛密左,少過10分鐘一次,我先拍醒老公,由5點痛到6點幾,我地決定入院,因為又唔算痛到唔郁得,咁我就沖埋涼先出發。

出發時都已經7點幾,因為塞車,去到醫院都差不多8點喇。上到病房層,我見到nanny個老公係出面,我仲以為nanny已經入左去開刀,點知入到病房見到佢啱啱比人推走,想同佢打招呼,但我又肚痛喎,所以咩都冇理。登記完左,就好似平時一樣去駁機,不過今次駁左個幾鐘就放我走,搞埋驗vv同轉床既事,11點幾姑娘比我出去食野,咁我就同老公落去starbuck食囉,我癲到想飲西瓜汁想風爽今日出世,不過都係正正常常食左個包同飲左少少咖啡,哈哈。食完野,老公送返我上病房,當時就快12點,所以我入左去一陣,老公就可以入黎陪我喇。

今朝駁機個時,宮縮疏左又冇規律,所以醫生先比我去食野,當老公入黎陪我時,我真係好想今日生,一來我係好想佢地111出世,二來我覺得成日入醫院真係好煩,又唔知幾時會再肚痛,又唔知會唔會穿水見紅,其實今日心情好複雜,好想生,但唔痛得密,醫生根本唔會同我開刀。去到下午,又好似開始密返,我兩點幾開始record痛既情況,都痛左超過一個鐘我先通知姑娘,但姑娘都過左成個鐘先黎搵返我,再駁機個時已經係4點幾,又要偷用電話,又唔郁得,一直等呀等,等到6點,老公又可以入黎喇,我真係發晒脾氣好想生囉,係咁駁機又唔郁得,又冇人同我講要駁到幾時,我條腰斷喇,平訓真係好辛苦呀,急又冇得去喎,係老公陪我6-8呢兩個鐘,我係一直發脾氣,係咁話一係就開刀,一係就唔好痛,比我走,我唔想訓醫院,好憎訓醫院。

點知8點老公走左之後,冇耐就有醫生話我宮縮密左,問我有冇諗點樣生?跟住傾左一陣就話要幫我安排手術,我當時真係勁開心,好野,風爽出世喇,仲有3個幾鐘就過111架喇,唔知會唔會好快劏我呢?我問醫生可唔可以打電話比老公,醫生又話姑娘會打,就係通知左話會安排手術之後,所有野都好快好急,我都唔知發生咩事。我想同老公whatsapp時,又有麻醉師黎搵我,問我問題,要我簽名,同埋好似抽左我d血,之後又有3個醫生黎圍我,又係再問我想點生,又話一陣開刀係點,都係同我對名簽名個d野啦,到佢地走左之後,就見到老公好緊張入黎,我都唔知咩事,佢入黎個時,d亞姐又幫我換衫喎,又唔幫我拆機,我都唔知點換衫,最搞笑係連比我執野既時間都冇,條底底都要就咁掉入老公個袋,仲要訓上車仔床時撞親個頭,有個姑娘問我知唔知要去做咩,我話要去開刀生仔囉,佢話係「剖腹產子」,叫我記住,一陣會好多人問我做咩架喎,胡裡胡塗就比人推走左,我連同老公講多幾句都冇機會。推左過去產房又係勁快囉,完全唔知過左幾多度門,當停低個時就有人對名對手鈪,比左一小杯野我飲,叫我一口氣飲晒去,話又咸又苦架喎,其實都真係幾難飲,跟住飲完,應該係冇咩野做等入手術室時,好多人都研究我d手指,又話gel甲唔得,又話睇唔到肉色,車,我d朋友個個都係咁,點會睇唔到呀,所以我都冇咩理,又話湊bb唔好再整,會整親bb,其實做gel甲d甲係好平滑,仲安全過自己剪,我都唔問點解咁多3姑6婆叫我唔好整,有咩傷害性先?你地唔整就硬係覺得有問題,痴痴地架。

我都唔知過左幾耐就入得手術室,嘩!一入去係好凍好驚好恐怖,我個身係堅震,比人過床,其實我都唔知發生咩事,唔駛自己郁,只係訓係度,要大開隻手,一隻駁機,一隻手上鹽水定唔知咩,係打麻醉針個下好驚,姑娘同醫生都叫我唔好郁,都會幾痛下,又比個姑娘攬到我實一實去打針,個人真係好驚架,打歪左,我就係咁先架喇。一打完針又比人移動我,話唔可以側埋一邊,要平均返喎,好快,真係好快,醫生叫我試下郁隻腳,我已經郁唔到,覺得好麻痺,咁姑娘就開始遮住晒我視線,我完全唔知發生咩事就開始劏我喇,其實我大概估到佢地落手同郁我個肚,忽然有一下聽到BB喊聲,聽到有人話twins I,F,唔知咩咩咩,我就知道係爽爽出左黎喇,好快好快又聽到第二把BB聲,係風呀,聽到BB聲,我已經好感動,眼濕濕咁。跟住有個亞姐拎左爽爽比我睇,話比我知係女仔,幾點出世幾重,又叫我望下佢係唔係女仔,第一眼見到爽爽,佢真係好靚女,好白淨,眼耳口鼻好清楚,同埋姑娘叫我錫下佢,我個時已經喊左出黎,過多一陣,又比埋風風我睇,亦都係同我講,風幾點出世,幾重,同叫我望下佢係唔係男仔,又係叫我鍚下佢,今次姑娘仲比風鍚下我,真係心都甜晒,好開心呀。爽2.155KG,風2.88KG,我諗係我縫緊傷口時,有個兒科醫生係我頭頂話我兩個BB都健康,不過爽爽輕磅,所以要去加護房觀察,風就可以跟我出病房,講左好多次恭喜我,真係爆開心,好想搵老公呀,最衰我緊急開刀,佢唔入得黎陪我啦。

搞掂晒之後,佢地有個休息室等我d藥過晒先推我出病房,我本來聽到佢地已經安排左我去K6架,不過亞姐比風風我攬住時,我都未攬夠,血壓機係咁叫,我見到由14x,一直升到17x,個亞姐就唔比風我,叫我合埋眼休息,咩都唔好諗喇,但其實部機仲係咁響,叫我點休息喎,仲有我都覺得幾暈下,唔知係d藥定血壓高而暈啦,訓訓下又嘔喎,都嘔左兩個紙碗架,麻醉師黎左睇我幾次,直至我隻腳郁得返,我就聽到佢地話唔去K6,要入返K9喇,我心諗,唔怪得K9有BB啦,原來就係比我呢d有問題媽媽係K9既。準備出去病房時,唔知姑娘定亞姐比返風風我攬住一齊推出去,風又係我身邊喇,勁開心,我一推到出去,就見到老公,媽咪,大家姐,二家姐同6299,佢地個個都話風好得意,其實佢係我隔離,我都睇唔到佢個樣,我只係享受攬住佢,但睇唔清楚佢個樣。入到病房,老公只可以入黎同我講幾句就走左喇,我又要自己一個訓一晚,不過我真係好攰,好容易就訓著,就算個血壓機係咁搞我隻手,我都可以照訓,生仔唔痛,不過開完刀真係好辛苦下,可能我有嘔掛。

好野,風爽如我所願,終於係5條1出世,風風爽爽,媽媽真係好愛好愛你地呀!