繼續鬧

今日都仲係繼續鬧,仲要拎刀行住自己,好似做戲咁,我大住個肚都激我,激到我抖唔到氣好辛苦呀,係唔係想我突然死係佢面前佢先會收火呀?激到我個頭好痛,又抖唔到氣,真係好似就快會死咁架。

鬧交

62今晚突然打鑼咁搵老公,話收到告票,衝紅燈,問老公係唔係個d野啦,總之我只係知道老公同62講到好慶,又掉電話咁。跟住因為一句話最衰都係我,就撩起左今次係鬧交。就係因為上次佢唔同人約好時間,搞到我上堂遲到,跟住衝左燈都唔知,62又唔知點解要覺得咁大件事,係咁鬧個仔,個仔就話返我轉頭。我嬲咪同個老公開火囉,都費時同佢鬧呀,咪自己一個嬲到死咁訓囉。

(其實鬧咩真係唔記得,來來去去都係個d野,我唔明點解佢要懶我囉,一d都唔覺得自己有錯架)

產前產後運動型

今日上堂好開心,因為係1:1既堂,物理治療師好細心,又教老公要點幫我去水腫同處理抽筋,好快就過左一個鐘,學到好多野呀!!!
但今日上堂唔係重點,係上堂前最難頂。我一早同左老公講,今日唔可以遲,因為物理治療師5點後有其他地方要去,所以我唔遲得,要準時4點開始,一早叫左佢好好同個死人師傅夾好時間上黎整電線同冷氣,佢又唔同人講我地3點一定要出門口,仲要約人12點,人地過改1點佢又ok,等到1點唔黎,又話2點先到又ok,最後2:15先黎到,又唔同人講要3點走,任人鐘意點做就點做,激到我死呀!!!!
我已經好有耐性,等到3點都冇出過聲,直至3:15,我已經想自己call taxi走人喇,都仲未有聲氣可以走,就係呢個時候,老公先入房睇下我,我話我要走喇,我宜家call taxi,佢先同人講要出門口,問人幾時整完,人地要整到3:30,佢話半個鐘可以出到黃埔喎,真係嬲到我發癲呀。最終真係3:30出門口,咪開快車囉,發癲囉,我幾嬲呀,去到上堂我都仲係好唔開心架,不過我唔會係人地面前黑面,因為都唔關人地事。所以上完堂我又嬲過,要佢氹返我囉,真係好離譜,如果冇time management既concept。

朝9晚12

今日返qm產檢,其實booking係9:30,不過想同老公一齊出門口,所以未夠9點就去到中環,諗住有時就去搭小巴啦,同埋順便去大家樂拎個紙杯(政府醫院好煩,又要人驗尿,又唔比紙杯人,要自己拎去。但我見到好多媽媽都拎個膠樽去,用完又洗,我覺得好核突呀,情願次次去大家樂拎個熱飲杯好過,用完即棄)。小巴站唔算多人,但等左一陣,我發現自己開始腳軟唔多掂,所以打算行前少少打的啦,點知行開冇耐就有小巴,因為我又要排返隊尾,所以上唔到車(前面仲有2/3個人度,如果我冇走開就上到),個心好亂,連行多一步都唔想喇,好彩咁啱有的士係正正小巴站落車,我即刻上左去,坐低左就好好多喇。
去到醫院都已經冇咩事,加上飲埋水就更好。今日好順利,連埋等都係1小時15分鐘就走得,今日繼續係見女醫生,佢肥肥地都幾nice,我話比佢知我都暈得幾密,佢都話冇辦法,唯有唔好成日出戶外走到,同埋要有人陪,如果連坐係度都暈,下次要同佢地講,如果係坐同訓都暈,就要入急症。今日冇藥,唔駛抽血,咩都唔駛,所以見完醫生再去約下一次期就走得,開心死,卡卡。
落返中環都係11點幾,見自己又行得走得,所以慢慢搭扶手電梯上global essence買野,其實我冇用eye cream好耐,真係好想買返,雖然係慢慢上去,不過都辛苦呀,一入到人地舖頭就話我要坐坐先,仲係咁隊水,真係失禮。抖順條氣就開始揀野喇,買返我最常用既dr Alkaitis,有serum同soothing gel,我真係好鐘意呢支soothing gel,4xx大大支夠抵用,又爽喎,想潤d加兩滴treatment oil就已經好夠,但冇eye cream,我好迷囉,我一心係好想買eye cream架,所以問下亞shop mgr有咩介紹啦,佢介紹左我一支勁貴既eye gel,一次用一滴,最好一星期一次用2-3滴去按下眼,佢話好補水,可以連我個d類似油脂粒既野都去埋,同埋會有firm既效果,講到10級好,試上手都幾唔錯,見自己有錢就手痕,買就買啦。再揀揀下,佢又介紹我用油黎當night cream,佢話宜家開大冷氣,其實用cream都唔係最好,用油會好好多,同埋用1-2滴就成個面,好抵用,上手有少少立,不過好香,夜晚我立得架,咁又係講到咁好,咪試下囉,反正一支用成年都得,算抵過用night cream架。玩玩下,連mask都玩埋,係清潔mask+沙磨,敷2分鐘就可以按下個面洗左去,上手真係好一流,用完d皮膚好軟好白淨,不過我用咩上手都好靚架啦,但真係唔貴,4xx一盒,size唔算細,貪佢方便,咁又要啦。想埋單個時唔知點解pat痕問人地有冇foundation喎,其實我都用左jane iredale同only minerals既powder好耐,但不忘foundation個種似化妝既感覺,所以就問下,點知真係有,試左兩個brand係手,一個coverage高d,好膏狀,用佢已經夠,唔駛再上碎粉,呢一隻好似一般上粉底咁,上完濕粉再上碎粉,呢隻似返以前化妝個感覺,上左兩層都仲好簿,同埋個碎粉係sell水份好重,所以唔會咁易出油,雖然話coverage冇咁高,但我點都唔可以cover所有面上既衰野,上完叫好左少少就ok啦,好過成個粉人咁,每樣都係3xx,ok啦,買埋。埋單嚇死人,買完一次,真係半年都唔可以再買skin care啦,不過我生之前都仲要上黎多一次,因為要買body wash,cream比風爽。
買完等緊車落中環時,老公已經打黎問邊度lunch,好彩有的士,拿拿聲上車落ifc meet佢,老公居然冇留意我係global essence買左野,卡卡。比佢知道左,又叫我唔準再上去,講來講去都係咁之嘛。
食完飯,行去過去太子買禮物比朋友,老公送到我過太子大廈入左舖就走,但唔知係唔係行太耐,個頭好痛,好彩揀下揀下都冇真係暈,不過唔係好有心機揀,因為好攰呀,買完就搭地鐵過小玲度整甲。
本來今日唔係咁趕既,不過我一陣又要過返中環睇michelle,所以改左小玲個booking早d,點知去到佢上一個客都未走,我足足等左成個鐘,整左個勁簡單款,拿拿臨返過中環啦,好攰呀!
遲左15 mins上到michelle度,不過都要等一陣先入得去,因為暈得密左,所以都係見一見michelle穩陣同心安d,michelle話我冇咩事,試下幫我補下氣血,睇下會唔會好d。睇完之後老公都仲未放得工,所以我去左失樂園食tea,叫左份西多同咸檸7,真係正到爆。慢慢食飽飽就行返去ifc搵老公,再之後就去太古買bra bra,哈哈。
冇辦法啦,得太古個間Wacoal有孕婦bra bra賣,我唔想入個d孕婦專門店,我覺得佢地有d搵笨,同埋d款真係好亞婆,不過Wacoal都唔多款,仲要正式孕婦bra得一款啱我,sales姨姨好好心機同我逐款試,佢話唔想我著一陣就要換,所以同我揀有少少鬆又可以扣到最埋既款式,仲要個wire要軟身d,等我舒服d,眼見d size越試越大,我真係冇眼睇,個cup好似個花盆咁,甚至當帽都唔誇張,我覺得自己好似一隻乳牛囉,好恐怖呀。同sales姨姨傾下傾下,仲試埋條托腹褲,嘩!好舒服呀,托得條腰啱啱好又實淨,所以買埋去,但因為sales姨姨太好心機,一試就試左兩個鐘,比完錢都9點幾10點,老公發左毛,我都好肚餓,jusco呢邊已經冇野可以食,想是但係附近搵野食啦,係隔離商場見到有mos burger,揀好晒野老公出去買先,個收銀先話收左,癲人開始發癲,又話唔食,又叫要走,其實我好肚餓,點可以唔食呀,好彩和民仲可以食,一入去就叫叫叫,同埋可能太餓,覺得佢d野好味左喎,哈哈。
食飽飽已經成11點,我地搭左巴士過北角,以為680會有位坐啦,點之爆到傻,等左一間我都唔想再等第二架,所以搭mtr返鑽石山再轉巴士囉,好攰呀,玩死喇!!!
最後返到屋企係12點幾,我今日出左成日街,成個散晒,不過買左好多野,好鬼開心呀,卡卡!!!!

堅胎動

今日第一次好明確咁感受到風風爽爽郁喇,好開心,個種有野係入面郁郁下,伸伸下既感覺真係好奇妙,好得意。風風,爽爽,你地又進入另一階段,開始可以同媽媽玩喇,哈哈!

Tidy Up 第三擊

今日繼續執書房,努力地清左鞋櫃3個櫃桶,同埋一個5桶櫃既頭兩格。今日成績麻麻,但已經好攰喇,所以唔可以再做野,下次繼續啦。

暈陀陀+產檢

因為竹太話睇性別唔會次次睇,上次老公冇睇到,所以今日想叫佢一齊去睇下,大家都睇清睇楚佢地係風風同爽爽,所以叫左老公拎pm AL。所以今日早d出去同佢lunch完先去睇dr yu,出去之前我去西貢拎包裹先,今日有少少雨,有又d焗,打的去到郵局門口好開心咁入去拎野啦,拎完之後去禁錢,點知等緊出錢個時個心跳得好快,隻眼好朦,腳好軟,好辛苦呀。等出錢個幾10秒真係生不如死,一見到d錢出黎就入左銀行企左一陣,都係唔太掂,所以問個姐姐仔比個位我坐,坐左一陣好少少咁我就走喇,不過一路行去搭小巴都仲好驚呀,好不容易先上到小巴。
一上到小巴就打比老公,叫佢係正小巴站等我,我驚行一步都唔掂呀。出到mk見到老公個心終於都安落,因為有咩事都有人係我身邊嘛。行都唔敢行得遠,係附近坐低即刻食野,老公不斷話係佢黑仔,如果唔係佢陪我,我就唔會有事,自從上次飲糖水嘔之後,老公就話佢陪親我都有時發生。咁唔通佢全程都唔陪下我咩,其實都係咁啱之嘛。食完野其實都ok架喇,行唔辛苦,都冇再腳軟。Hea左一輪就過去美麗華睇醫生,今日約埋竹太一齊睇,嚇鬼死dr yu,卡卡。
今日等左個幾鐘先有得見醫生,一入到房dr yu見到竹太真係好驚嚇,佢誓估唔到我地係識,仲要一齊去睇佢,老公出返黎之後猛話我地玩野,搞住晒,其實都冇野呀,係多d野問之嘛。今日風爽好合作,比爸爸睇晒佢地真係男仔同女仔,好開心呀,其實我真係好開心我一次過有晒風風爽爽架,感覺係極之奇妙。
*我問左dr yu到底幾時會有胎動,佢本來話一個月內,我再問要一個月呀?唔係19-20 wk就有喇咩,佢就改口話10日內會有,好期待呀!

順利續租

今日新業主約左上黎簽新租約,莫講話新業主,其實我地連舊既都冇見過,只知道舊業主個把女人聲好難頂。新業主係個男人,原來佢都係做地產,好彩佢都覺得我地住既呢度買得平,所以平租都ok,都冇收足我地街價,不過以呢個新價有咁大間屋,其實都算幾抵架喇。
新業主算係一個容易講野既人,一講比佢知屋企有咩唔妥,佢都話係要搵人黎check check,所以好快就約左下星期六搵人上黎睇喇,希望佢換個房冷氣比我地啦,真係好鬼熱呀,同埋快d整返房d電制就最好。

Tidy Up第二擊開始

今日開始我要挑戰垃圾房,書房同垃圾房係冇分別架,因為平時d唔用既野又掉入去,有人黎唔想比人見到既野又掉入去,亂到9彩,加上上星期搵人黎整電,移開左櫃比佢check,宜家係亂過垃圾房,係少左一陣垃圾味姐。
趁老公移開左d野可以執舊鞋櫃,我都快快手搞搞佢先,呢個櫃兩年黎都冇開,入面d鞋其實都唔著多架喇,主要都係掉掉掉啦,一見到d鞋放到殘殘地就最開心,因為可以唔駛諗就甩,一共包左兩大袋垃圾袋,另外有d真係好新,即管問下99會唔會要,仲有一d半新不舊就會拎去回收。
清空左個櫃就叫老公抹乾淨,以後都唔放鞋lu,將會放一d唔常用又唔會掉既野入去,然後吉多d膠櫃桶出黎比風風同爽爽用。呢個鞋櫃仲有3個櫃桶要執呀,連開都唔想開,同埋今日quota已經用晒,成個人散晒,老公亦都唔比我再執野,佢話我做到個樣好衰喇,咁唯有下星期繼續。
祝我好運,我希望3個星期會執好晒架!!!

樂天 [gachapin]

我好鐘意既gachapin冇端端有一堆特價冬天衫走出黎,仲要好平,所以一夠鐘開賣我就上網買。終於都買到我好鐘意個件長袖造型衫,又有兩件都ok厚既夾衣,仲有立立雜雜,連泳衣都有買,睇下啦,呢d就係前前後後不停係樂天買既gachapin,我真係好鐘意呢隻野,好得意呀!!

Tidy Up第一擊

踏入懷孕4個月,係時候真係執下屋,宜家自己買既野同買比爽爽風風既野都一堆堆係廳,真係好恐怖。同埋我個closet再唔轉季,我著來著去都係個幾件新買既衫,好悶呀,仲有d鞋,見到d boots都放晒出黎就嬲喇。所以tidy up第一擊,當然係我個carmana’s closet啦,hehe~
上一個星期,好努力咁拎晒d夏天衫出黎再放返冬天衫入衣物袋,其實用袋真係幾好,一袋一袋易疊起又易執,我冇咩用腦咁掉衫,總之真係好唔順眼就拎佢出黎囉,新個d想拎返tko比媽咪同大家姐睇一睇先,因為有d真係全新冇著過,如果佢地要就好喇,如果唔要,唯有回收箱見啦。
其他冇咩特別唔順眼都照分類,掛既掛,接既接咁放出黎,用左一個下晝+夜晚就已經搞掂喇。仲有closet既鞋部同袋部未執,留返下星期啦,真係好辛苦喇。
黎到今個星期,都係用左一個下晝+夜晚去執埋其餘部份,好彩之前叫老公同我砌左兩個層板櫃,叫多左地方比我放袋,仲可以放埋d leggings過去,仲有一小盒風風爽爽既用品放到添,不過呢盒野,遲下都要拎返去書房group埋一齊啦,費時呢度有d個度有又有d。今年算捨得掉鞋,前前後後都掉左一袋架,但原來我冇咩平底/矮踭鞋,所以放得好返出黎咋,即刻覺得好唔靚呀~~

忽然愛上Rody

係公司冇冇聊聊就係度search下有冇靚d既bb車墊,因為eva話好用,方便洗,但大家姐就話冇用,魔魔集團都冇人用,不過pat痕痕咪上網睇下囉。搵搵下見到rody都幾靚,搞搞下就變左search rody,rody唔算好多bb野,不過都係夾包仔個夾啦,音樂轉轉轉,車墊,被仔,床單等等既野。
係樂天度search左16xx個baby rody items出黎,睇呀睇,雖然係好多野repeat,不過唔知點解價錢係有出入架喎,好似我睇中個音樂轉轉轉,雖然得兩間有得賣,不過一間賣8xxx yen,一間就5xxx yen,所以都要比d心機睇埋價錢架。之後click click下見到除左可以單買個被夾,仲有一set夾+被既組合,單買夾立過下最平唔過1000 yen,set裝就1600 yen左右,睇到尾聲,冇端端見到個set裝有間65%off,808 yen喎,痴左,睇來睇去都冇錯呀,同一款黎架,點解呢間咁平架,雖然好想買,不過屋企個電腦未用得,所以買唔到,不過就成晚心掛掛,真係作死。
唔知點解rody係四白眼我都鐘意,可能d顏色令人好開心,好colorful啦,同埋唔多人用佢既野,咁我用好似型d,最怕一街都係,其實麵包超唔差,不過一街都係,有得揀都唔想買啦。
風風爽爽,你地鐘唔鐘意rody呀?唔鐘意都冇法喇,因為媽媽鐘意,你地點都有佢既用品架喇,哇卡卡

黑氣滿瀉的一天

去完姐姐屋企其實都已經攰架啦,諗住仲有一日時間休息,點知訓到2:xx am,老公突然醒左話冇電呀,即刻覺得全屋都好焗,又黑麻麻,唔知想點。佢打開屋企個電箱又冇跳制,又閂又開都係冇電,佢一開始話比人整古,之後就話我冇交電費,其實我已經打緊去中電問,比佢講一講,我真係好懷疑自己真係冇交電費,但我明明記得我真係交左架喎,點解呢?
打去中電,個接線生好肯定話西徑村電力供應冇問題,叫我地睇屋企電箱,我話睇左架喇,都冇事,佢就再叫我地落地下個總制再睇,咁我咪叫老公去睇囉,大家開住電話個燈行來行去,我就睇住個仔。老公啪完制我係聽到屋企d電器有叮叮聲架,不過當再開返屋企個電箱個時,一啪一個房button又再全屋冇晒電,又要老公再落樓。End up我地check過呢,唔啪呢個button就係影響所有房既插頭,但天花版盞燈同冷氣都係冇問題既,唯有再訓啦,唔通再試咩。
第二日起身,老公就話要早d出去搵人返黎整,所以出去mos順便食lunch。出去個時我已經係車度話不如睇埋個冷氣咩事啦,滴水我地又唔開,真係會熱死架,佢都冇話好定唔好,咁去約師傅個時我咪講埋囉,咁呢間真係收得貴,但唔通唔理咩。一出人地舖頭佢就鬧我多事,又話人地一聽到我整呢整路就雙眼發光好開心,又話我咁又用千幾蚊,又話我自把自為,我一定係嬲同唔開心架,我唔想大家都熱死呀,佢又試過自己整又整唔掂喎,又因為宜家傾緊租約問題,唔想同業主講,咁咪自己比錢整囉,都冇法架,總之佢就鬧我話晒事,又問我佢宜家為屋企慳錢有咩唔啱。佢叫我去食金滿庭,我就死話要食老麥平d,坐低左大家都仲好嬲,佢只係出去買左個包拎左杯水比我,就話要出去搵第二間問價(呢個係我之前提議架,你估佢咁叻識自己諗咩),掉低我一個係老麥,已經有個學生妹問我有冇人,初初都係佢一個,點知原來佢有兩個朋友,啱啱好坐晒4個位,人地就有傾有講,我就自己一個孤伶伶食包,差d滴左d眼淚出黎,死忍爛忍終於都食晒個包,其實我想鬧氣唔食,袋住走人架,不過我真係肚餓呀,又驚餓親風風同爽爽喎。
買完之後我自己一個走左去,本來拎左錢想自己一個人返屋企,但又驚太絕,又怕自己一個坐小巴有意外,為左死鬥要慳,我又唔會打的呀。老公打左幾次比我,有時聽,有時唔聽,總之佢問我係邊,我就死唔答,之後自己一個坐係公園乾煎又係咁喊,都唔知點解要激我,明知我唔激得架嘛,由於宜家有左真係冇咩骨氣,所以老公d語氣一好左,我就叫佢去公園接我啦,都仲係不停喊,都唔知喊咩,卡卡。
喊完一輪要返屋企等人黎整電啦,返到屋企真係好熱呀,又唔開得冷氣喎,搞左成個鐘,最後只可以駁返書房既電,睡房同衣帽間都唔用得,唔知係邊度有事,我個衣櫃當初個窿個時又開錯左,如果要check插頭,都唔知點樣可以比佢check,好煩呀。
熱過一輪,又喊過,真係好眼訓,所以要去訓一陣,訓左兩個幾鐘,覺得唔可以再訓喇,所以自己一個出左廳執晒廳冷氣下面既野,放個桶係度就開冷氣啦,再咁熱法真係人都癲呀。唔知點解一開始執野就好似唔想停咁,連帶衣帽間兩個衣櫃都執好左,係差鞋未搞,比d時間我啦,我得架,仲有呢,應該風風爽爽既野都可以放少少入我個衣帽間既,盡力啦。斷斷續續咁執野,真係好辛苦,腰骨好痛,救命呀!

Half year gathering @ 姐姐家

今日只得一個節目,就係去姐姐屋企搞個half year gathering,冇咩特別架,大家聚下,傾下計,同埋帶d細路玩下,大人就玩下炸機囉。今日一一唔舒服,啤宅出席唔到,3個迦南院有好瘋癲,佢地真係有一齊玩,唔係各有各架喇,仲好嘈添,第日我屋企都係咁架喇,你估兩個細路唔會瘋癲,唔會追來追去咩,佢地癲,nic nic又癲,全家都short晒,哈哈。
今日係姐姐屋企完全冇停過口,一去到鄭生同abby係天台落黎之後就係咁拎野食出黎比我地,有蛋撻,薯片,又有姐姐為我準備既利實立喎,已經飽飽地啦,點知心心黎到之後,仲要買左50蚊腸粉出黎,久唔久食幾舊食幾舊咁,都好鬼飽架。仲要鄭生整左薯條同雞翼出黎,因為好想試,所以點都要食下。呢一刻已經飽到唔想再食,但只係休息左一陣,姐姐又為我地準備好dinner,救命,飽死我,我隨便食左少少意粉就離枱睇電視喇,卡卡。
坐左一陣間又有蛋糕食,因為今日係ddd生日嘛,點都要切下蛋糕開心下,咁雖然只係一個家庭食一件,不過都好勁飽,今日好滿足,舒舒服服咁傾下計食下野,睇住d細路由手抱到周屋跑,感覺好得意呀,兩年幾後就加埋竹伊恩,momo同風風爽爽,真係仲恐怖呀!!!
今日真係食得好飽,返到屋企個肚好似好多風咁,以後都係唔好食得咁雜喇。

辛勞的一天

今日行程好緊密,因為尋日62問我地今日飲唔飲茶,我見佢出得聲,所以話飲啦,但今晚因為返tko做節,我又book左4pm帶nic沖涼,真係好多野搞呀。
2點半左右出到mos同62飲茶,其實好鬼悶呀,因為老公同62都冇野講,62又唔會好似99咁講過不停,只係食,食同食,哈哈。走個時都差不多4點,仲要去入油,不過因為老公講左d我好憎聽既野,所以我一直都係忟口忟面,返緊屋企時我仲不停玩電話咩都冇睇,點知突然感覺老公勁剎車,一望出去見到對面線架車飛緊過黎我地度,好彩老公停得切同埋o個個車都轉到彎冇飛過黎,不過唔知點解我又唔係好驚喎,只知應該係有車係村出對面線時撞人地,突然兩邊線都停晒,但老公都算醒,上左行人路兜過架車繼續返屋企,不過佢話覺得好驚喎,佢問我仲會唔會掛住嬲,其實我都唔驚,我點會唔嬲喎,卡卡。
返到屋企快快手接埋nic落樓,拎埋野飲上車飲就返tko沖涼啦,約左4pm,宜家已經4:45喇,遲得離譜,今日遲到連哥哥都要打黎問我地會唔會到,好醜囉。去到新寶城快手拖左nic去沖涼,之後我地過去東港城拎褲又行左個圈咁囉,仲有帶左老公去sugarbaby度睇衫仔,個老闆娘知道我係留衫個人就問我係唔係龍鳳呀?我話係呀,咁開開心心咁傾左一輪,運左一個吉就返去拎車過去媽咪度。又行過千尋犬舍,咁我係門口望下亞仔沖涼未啦,原來佢好嘆架,一個姐姐同佢沖身,另一個哥哥摸住佢個頭,佢個樣傻下傻下咁,我真係覺得佢係開心架喎,望左一輪就走左喇。
返到媽咪屋企試下啱啱改好條褲,正呀,變窄腳款,似返平時著既褲,唔會覺得好大條,所以我叫媽咪幫我拎去改埋其他個3條褲。好野,改晒之後我真係夠晒返工同牛仔褲著,咁唔駛再買喇。傾左一陣已經夠鐘去食飯,等一陣先有得入去,入去冇耐已經收到電話話nic nic ok喇喎。所以我一定要21:15離開去湊佢,老公就話咁既安排好急,我又覺得ok啦,我一早講左21:15一定要走架嘛,是但啦,一次過返tko就做齊晒d野,幾好呀。
湊左nic,約左兩個家姐同nic行下街,全程都拖住,但好景不常,冇啦啦有兩隻雪橇撩交打,我個仔好嬲,個樣好惡,老公當災,唔知比邊隻狗整損左隻手,其實只係冇左少少表皮,唔嚴重,不過兩隻雪橇主人都幾過份,明知自己隻狗惡就拖啦,又唔拖又唔係叫得聽,任得佢地蝦我個仔,我都嬲架,老公又損左,不過我又做得咩呀,知道亞仔冇事,老公冇事就即刻走啦,唔想再行。唉~~本來開開心心架,最衰都係個兩隻狗,我亞仔又唔知做咩行到唔想行喎,成日訓左係地。
今日真係好攰呀,返到屋企成個散晒,好辛苦,老公例牌又叫我唔好咁安排節目架啦,佢完全唔比我辛苦。其實我知佢咁錫我,我真係好開心,覺得自己好幸福架,哈哈。

Note: 後尾先知亞仔唔知幾時都擦損左隻手,所以行路唔舒服就唔行囉,返到屋企仲有少少拐拐下,真可憐。

胎動?

踏入16w,真係幾期待胎動,其實唔知係自己營住定真係feel到,總係覺得有少少野好似跳跳下/彈彈下咁,不過放隻手上去又感覺唔到,同埋都幾微弱,不過有時又好似會踢到我扯扯下咁。有一次我郁個肚,又會冇端端扯扯下,唔知佢地係唔係同我玩緊呢?
風風爽爽,媽媽好想快d真實地覺得你地郁緊架,唔知第時我會唔會覺得好煩呢?唔知你地會唔會好打力呢?又唔知你地會唔會係入面格住都打交呢?哈哈~爸爸就唔會咁快感受到喇,因為宜家真係好微弱,得媽媽一個知咋,卡卡。