Happy 32!! + Nic Happy 5!!

今年係好特別既生日,一定係我暫時人生中最難忘既生日,尋日放完胎,今日全日屋企休息,不過硬係覺得要搵d野搞下先安樂,所以訓足全日之後,都係決定出一出mos食dinner啦,是日晚餐係平時食來食去既金滿庭。

尋晚過左12點,我地已經同nic nic切左蛋糕,nic nic食完之後就到我,我好好好希望我個願望會成真,今年個vero cake好好味呀,我鐘意呢d又甜又酸既蛋糕,咁我揀個蛋糕都咁好味,應該好運會keep住架喇,順利順利,真係好希望自己一切都順利!

今年生日過得最簡單但又窩心,因為眼見既有老公同nic nic係我身邊,仲有肚入面既兩個胚胎,你地乖呀,痴實我呀!!

放胎喇

今日放胎喇,唔緊張就呃人既,唔多唔少都驚d胚胎唔靚,又驚自己身體support唔到,總之胡思亂想係女人擅長。今次好少少,8點前同QM就得,我地8:10去到,都唔駛等好耐就可以見姑娘,當姑娘慢慢同我講,你抽左14粒卵子,咁用icsi有11粒受精(我心諗,都幾好呀),咁其中7粒係有分裂(我又心諗,都ok啦,真係meet到我target,有一半用得返),最後佢話:「有4個分裂得唔好,唔要架喇,宜家得返3個可以放胎」(我個心一沈,唔係嘛???得返3個????1/4都冇喎!!!!)

咁個刻個心係好實,不過又扮冷靜咁問姑娘,有冇講係grade幾呀?姑娘唔知係唔想嚇我,定真係唔知,佢話宜家唔知架喎,不斷分裂不斷變緊,不過好似考試咁,分得唔靚個d唔合格就唔要架喇,宜家個3粒係考頭4名,靚架喇!大佬,我記得睇圖grade 1同grade 4差好遠架,係唔係真係靚架? 咁好啦,講完一輪個姑娘都幾funny,佢話宜家出面好多人呀,人地要返工,咁你放胎都未咁早,你去行下食早餐,9:15先再返黎啦。於是我就同老公去交左錢先囉,去交錢個時都仲ok架,只係唔想講野,不過行緊去canteen度,老公一問我一句:做咩呆晒呀?我就哇一聲喊左出黎,佢氹左我一輪,以為ok就真係去到canteen坐低,我扮玩電話都唔得,眼淚大滴大滴咁滴落黎,到底我驚咩呢?就係冇咩spare個心好慌囉。又唔知自己今次得唔得喎,個心又一早想生孖喎,如果今次唔得,下次得一個雪胎,中既機會好似仲細左,總之n咁多個唔好既問題出現係我個腦度,越唔想諗就越亂,個腦唔知想點,唯一就係喊囉。

我估我當時喊得好衰啦,老公問我返去車度冷靜下好唔好,咁我地就走返上車,一上車冇人冇盛,我仲喊得勁,痴左線咁,我聽得到老公同我講咩,佢講個d野全部都係啱,不過當時聽唔入耳,只係覺得我捱得咁辛苦,又打針,又抽卵,點解去到最後要比個咁既結果我?不過老公話唔關我事,我身體好,又冇判我死刑,問我點解仲要驚,仲要擔心?宜家明明有得試,如果我仲喊,個身體唔好就仲衰,慢慢心情平伏左dd,不過都仲係好樣衰。

夠鐘返去搵姑娘,佢帶左我入病房之後叫我等一等佢,佢又出返去,得我一個人企係門入面,係玻璃度見到老公,又喊過。姑娘係出面見到我抹眼淚,我見到佢問左老公d野,不過聽唔到,只見到個姑娘好快入黎陪我,問我咩事,我死口唔講,最後都係比佢氹下氹下講左,呢個姑娘好好人呀,佢睇完file就同我講,係唔係因為抽左咁多出黎,expectation高左,所以好難接受呀?唔好傻啦,有人有更多卵,不過可以一粒都唔得,或者得一粒可以用,你有3粒喎,仲有一粒spare可以雪,幾好呀!咁我聽完唔係即刻平伏,只係唔想太樣衰,所以我都收左聲喇。坐左入房之後,老公仲有sms鼓勵我,其實今次老公真係比左好多support我,我唔應該衰收尾架!!!好快好快,我要快d收捨心情帶bb返屋企。

今次等放胎,唔駛訓床,3個今日放胎既女人坐埋同一間房,坐齊左之後就大家傾計,傾傾下我又冇事喇喎,其中一個係之前係bk識,估唔到佢遲我少少開始,最終我地一齊放胎,覺得多個人support,好開心呀! 女人,原來可以傾下計,講下笑,心情自然好,等來等去,我地等左差不多成兩個鐘先第一個比人推走,第一二個都好快推走左,得返我一個係房等,等到我好驚囉,又冇人理我喇。

我自己一個等多半個鐘左右就有人入黎推我,又係見到老公一面,佢叫我比心機喎! 入到去就見到第一個女仔啱啱出黎,佢話唔痛架喎,仲笑晒口。咁我又係waiting chair度等啦,第二個出黎個時直頭同我講,冇野架,好似婦科檢查咁,咁我大概都知道個過程應該係好輕鬆。 今日入到去都係對名,對完名要簽名話我今日放兩個胚胎,一個雪,跟住姑娘會一邊照住u/s,一邊同我講宜家做緊咩,初初佢話管道入左去,其實指左比我睇,我都唔係好識睇,不過話放左胎之後我就知喇,有一粒白點,不過我問我呢兩個胚胎,點解得一點既?佢話要用顯微鏡先會見到,如果u/s就只見到一點白色。Um…放左入去之後忽然好開心,可能我見到個醫生放得好近,好似好易著床咁,同埋bb已經係我肚入面,唔駛估估下喇。最後居然連10問9唔應醫生都同我講:「完成架喇,恭喜晒!」比姑娘推返出黎,啱啱夠時間探病,老公可以跟埋我一齊入病房,幾好呀!推我入房個姨姨真係好好人呀,又好笑容,放低左我之後佢仲恭喜晒我地3對準爸爸媽媽,聽到呢d野真係好開心架!!

咁3 pair人一間房,老婆換好晒自己衫之後就食飯,老公就只係陪老婆,夠1點又要走喇。其實我地3個老婆都好想跟個老公一齊走囉,都唔知仲坐係度做咩,今日都冇打針,個個都好精神。點之d老公走左唔夠5分鐘,有個好惡既護士長入黎問我地兩點走得未?我答:得呀,個護士長又問:咁點半呢?我又答: 得呀!跟住佢想走喎,我咪膽粗粗問佢,其實可唔可以宜家走,要唔要等醫生黎架?亞惡人話: 唔駛,有人接你咪得囉。 我地3個都好開心,個個都話,有呀有呀,啱啱出左去之嘛,於是我地即刻拎袋走人,好開心囉!!! 好野,我地3個都帶左bb走喇,bb們,你地加油,我地好愛你,你乖乖係我地個肚入面分裂成長呀!!!!

針灸 + shopping

我一直都以為要放胎前幾個鐘做針灸,原來michelle話早一日做好d喎,咁所以今日出去針灸。今日出街除左針灸,我仲係放胎前shopping,其實講shopping,都只不過係買skin care – target beyond organic。本來唔知自己想買d咩,諗住買定3k coupon慢慢用啦,點知生日優惠唔知可唔可以買coupon,個店員打左電話幫我問,不過要等覆喎,咁等既同時我就問其實我可唔可以揀product不過唔拎住,同我用先拎呀?咁個女仔好快就答我當然可以啦,keep返張單幾時拎都得架喇,於是我冇再等可唔可以買coupon既reply,就是但指左d野買,卡卡。買得好爽,因為我只係想買我budget內既野,唔知買咩好,是但個一刻想要咩就講,好似唔駛錢咁。最後打左一支cleanser,兩支toner,一支scurb,一支lip balm,再用埋vip point換左一支50 ml yogurt mask同一支6 ml clay mask,好滿足呀!!!卡卡

買完呢d野,老公帶左我去vero揀蛋糕,今年生日揀左黑加侖子味,其實我都係第一年自己揀蛋糕,不過算啦,今年有大project,簡簡單單都ok架喇。本來拎返車呢,打算去dog one life訂埋cake比nic nic,點知電話order都得,所以係中環行左一輪就返tko接nic nic囉。

之前叫左媽咪幫我買幾日餸,所以上左媽咪度一陣,去toilet時發現大獲,唔知係唔係今日郁得太多,又流返血,好驚呀,不過唔敢同老公講,因為我係request要出街,亦都係我話自己冇事佢先比我出架,如果宜家同佢講咁多血,佢一家好驚,算啦算啦,唔講喇。 等埋可以接亞仔就一齊返屋企開飯,nic nic豬生日前香噴噴返屋企,好靚仔呀!!!

入院喇!

今日0700要到QM,之前個姑娘又話千祈唔好遲,要7點鐘交左入院紙先,跟住再上K座準備入院,我地真係好準時0700到呀,去到急症個邊交入院紙,個條死肥佬d態度真係好乞人憎,嬲到我死呀! 跟住未夠0730就上到K座 – 等! 又唔可以食野,我覺得個口好臭呀,又肚餓喎,等到8點左右,終於都叫名,今日我有最怕既環節 – 磅重!!!!!!個數字好嚇人囉,卡卡~~

磅完重冇諗就比姑娘叫入房,幫我插喉跟住就入病房,入左病房後就同老公隔離,因為未到探病時間,雖然好早起身,又好眼訓,不過訓呢d床真係訓唔著,又光,又有人傾計,姑娘又傾,病人又傾,我都講下電話啦,不過個電話又唔夠電喎,真係激死人,唯有碌來碌去唔知想點咁,碌到10點左右,終於有人黎睇我喇,幫我打左支止痛針係pat pat,又係手度上左抗生素,一上呢d野呢,成個人都好凍,feel到d藥流入血管,好恐怖呀。

凍下凍下,暈下暈下咁就有人叫我準備,推我去手術室喇,中途會見到老公一眼,其實我有d眼訓,又有d暈,唔記得左有冇同佢講一句半句野。入左手術室大門,其實都仲要等多陣先入得去,等緊個時個推我個姐姐仔話同我講下野,其實我唔想講,因為我好想繼續迷迷糊糊。入到手術室,放左係床上面,有兩個姑娘同我一齊對名,問我知唔知宜家做咩,跟住又打多一支止痛針係手個喉度,嘩,打完呢下勁喇,好wing呀~~

咁好快手就開始手術,清潔完就打左一支鎮靜劑係下體,係聽到有d機器聲,我估已經係開始緊啦,抽左邊個時真係一d都唔痛,只係有少少感覺,不過去到右邊就痛喇,比上次見習照陰超仲痛,又唔會令人叫,不過唔太好受,死頂緊,不過好彩頂左一陣,好快就做完,個10問9唔應醫生話抽左14粒,好好!完左之後就有人扶我起身,推返入病房,訓左一陣,老公就可以入黎探我,我好攰好軟好冇力,唔想食野,有少少想嘔,只係飲左d水又再訓下。

老公出出入入又話要去泊車,最終佢都陪唔到我一個鐘又要比人趕走,不過我真係好暈,比我訓下都好既,um…係床度訓下又坐下又飲下水,其實我覺得都幾辛苦,好想見個老公,又好想快d返屋企。等呀等,等到4點幾終於都有醫生黎,終於都放我走喇,起身想換衫個時見到張床有血,幾驚呀,又唔一早話比人知會咁喎,個問題個d係鮮血,好明顯同m唔同,咁先驚架嘛,叫左個姑娘黎,佢又話冇事架,係正常,咁我咪走囉。

嘩,抽完之後每一次起身坐低 or 坐低起身都好唔舒服,唔可以叫好痛,不過個隻唔舒服係好深層,好難受。同埋原來我好餓,放到屋企老公煮多個蝦子麵比我食,就舒服好多,不過我都仲係要訓覺,實在仲係暈呀!! 抽卵冇我想像中咁恐怖,不過其實唔係冇咩野囉,都ok舒服架!痛下痛下,暈下暈下咁就過左一日喇。

半偷懶的一天

本來今日係要返工,不過尋日2300係QM打夜針,打完都真係幾痛,返到屋企訓得都過左12點,今朝起身個時覺得個針位附近好痛呀,成條腰好酸,個肚好谷,咁老公又叫我休息下,所以今日都請假喇。訓到自然醒之後其實已經冇咁痛,不過個肚都係谷住谷住,總之係好唔自在,可能聽日又要入院啦,都唔係唔緊張架(縱使不停叫自己唔好諗,其實邊可以唔諗呀),所以成日係屋企都發癲,唔係發脾氣又係度搞呢搞路,老公都冇晒我乎,就係咁癲癲下過左一日喇。 其實今日好浪費啦,應該出街行下開心下,因為之後一直都冇時間出街,有時間都冇氣力。

抽卵前最後一次陰超

好彩之前計啱晒日子,老公今個星期放假,全程可以陪我。今日第一次平日揸去qm,估唔到7:45出車都塞都痴痴地,最終我要8:38先到5樓,仲要交錢又唔係平時交個度,老公趕唔切過黎meet我,搞到我今日自己一個人入去照u/s,好衰唔衰今日要比個見習幫我照,佢啱啱放入去都還可以,點知度size個時我懷疑佢左右手唔協調,隻手度緊呢,另外一隻手好似亂撩緊咁,同埋佢睇黎睇去都唔識睇,搞左好耐亦都搞到我好痛,我已經係咁縮,又有抖大氣,10問9唔應醫生只係拍下我隻腳叫我放鬆d,我覺得自己好慘呀,點解我要比實習撩喎,真係好xyz痛呀。

一出到黎見到老公係門口等我,我就對住佢喊喇,最怕受呢d苦,我覺得自己好可憐呀,好似一隻白老鼠咁,任人照又唔出得聲,問野又唔答我,我仲要專登見個見習行過,再喊大聲d添呀!!!!

坐左一陣有人叫我入房同我講解抽卵同放胎既事項,要簽返agreement,跟住打左今日支谷卵針同抽左血,拎埋入院紙,今晚打夜針既notice,咁就可以走喇。

打針後第一次qm覆診

今日成8:20先去到qm,不過咁樣反而好喎,唔係點等,搞掂晒都係9點,泊一個鐘車,最抵架喇。今日去到原來連血都唔駛驗,只係照u/s,今日見個醫生係10問9唔應,呢d就係政府醫生既服務態度,救命。佢手勢痛上次prof ho咁好,痛多d,不過都可以忍受,但最妙我問佢已經有幾多粒夠大,佢答我:你冇一粒夠大喎,啤一聲既我,唯有轉問,咁有幾多粒係比較大呢?佢先答我5-7粒,我又問咁細個d呢,答:個d好細。算啦,我都知你唔會同我逐粒數,總之有over 5粒我都ok架喇咁我又問佢大概幾時可以抽,佢答我唔知(其實我想開始發火),不過佢最後都話估計係星期四啦,不過打多3日針再返黎照先決定到。都好啦,起碼都有個時間可以請假,咁都容易d。希望所有野都生生性性,on schedule咁進行啦!

Private Clinic Checking

今日放假一天,book左叫做比較好又易book既胡海寧照下卵子生長情況,打針已經3日,除左眼訓,冇咩特別感覺。 1點前出mos打完針就出去mk同程爾雅食lunch,我真係好鐘意叫佢全名,呢個名真係好好聽呀! 食完之後就打的過去胡海寧度,估唔到個的士佬係完全唔識路,一去到油麻地就已經問我到未呀?到左同我講喎,都唔知點揸的士架,唔會連嘉賓大廈都唔識去掛,痴痴地。最終求奇放低左我,係嘉賓大廈又真係唔係好知行左定行右,唯有打去clinic問下啦,好彩落車個位都好近。

上到去一個人都冇,姑娘又好似打電話booking個時咁,不停問我問題,登記又慢,一個人都冇,都唔知點解我都仲要等成15 mins先入到醫生房。 初初坐低同胡海寧傾返我個情況,佢都唔算古怪,只係奇怪我點解咩report都冇,其實我要咩report呢?根本問題唔係我身上,我比其實要做ivf既人checking係少好多,我只係blood test同做抹片之嘛,我都唔駛照輸卵管,咁今次qm啱喎,反正我地個case係唔係都要做,我輸卵管塞唔塞都係咁架啦,都係要做,咁check黎做咩?不過我咁講比亞胡醫生知,佢好似覺得係奇聞咁。

好啦,真係開波照喇,佢照個手勢真係幾唔錯既,唔會痛,少少唔舒服一定有架喇,不過我問佢有幾多個卵泡,佢又唔講我知,又話我個d好細,咁我一早都講左我有比較多卵泡,所以想自己check下打左3日針個反應係咁,我驚over stimulate架嘛,講完又唔聽。

最好笑係著返好衫坐低再同佢講個時,佢話我得一粒比較大,有15mm左右,其他都係細9-10mm only,叫我唔好灰心,唔好傷心,話做ivf唔同做iui,唔係一粒就夠,要好多好多粒,又同我講左兩次,叫我有心理準備唔好以為一次就得,佢真係痴線架,我打左3日針咋,我更係知未咁快得啦,根本以我打3日針既progress係好好,除左一粒,其他都同步成長,好好呀,冇端端叫我唔好灰心,唔好傷心,真係白痴架! 我話過,以後我都唔會睇呢個女人呀,都話左婦科唔要揀女人架啦,最憎婦科女醫生呀!!!

我去mos打針個醫生都仲細心過佢,都會叫我繼續啦,我會得架喇。呢條友仔,唔comfort病人不突止,仲要嚇我,痴線架,如果唔係貪你易book,我真係唔會上去呀,同埋我知道點解咁易book囉,因為個個都係one off呀嘛!!!!!

情人節 2011

返左呢份工第三個年頭,今年係第一個情人節係平日要返工,雖然我覺得老公都應該會送花比我,不過返左一個上晝都收唔到電話,個心仲諗,你個死仔呀,今年一句都冇講,你就咩都唔駛理,今晚鬧到你傻先得,仲要成朝打電話比佢都冇人聽喎,激死我。 Lunch既時候佢終於都打比我,不過當時我準備落樓去打針,佢仲要話啱喇,你落黎啦,我落緊去既時候已經諗佢係唔係今日放假去比surprise我呢? 落到樓下見到佢架車係度,見佢行近後座,我知我要既野黎左啦,卡卡!真係好開心呀,估唔到佢會親自送黎比我,同埋終於都收返百合啦,係大大朵,香噴噴既靚百合呀!!!!因為我又唔想收完就咁比佢拎返走,所以我都係拎返上office先,放返埋位先覺得真係幾大扎,好開心呢~~ 之後老公仲車我出telford打針,本來想去panel診所,點之多人都不得了,唯有亂搵啦,唔睇水牌都唔知原來telford全部都係集團診所,咁是是但但揀左一間最近我當時位置就去問,呢間只係姑娘打針,唔駛見醫生架喎,不過是但啦,姑娘又好,醫生又好,都係咁打姐,不過我覺得mos個醫生打得好手勢d,冇咁痛,同埋我都唔明姑娘打針之嘛,都唔知點解要等咁耐,我今個星期都係要咁打針架喇,唉~ 打針唔痛,不過限時限刻好煩呀!!!

Lunch完返到公司,我個low b boss同我講左一d好低能既野,真係嬲到我發癲呀,唔知係唔係我個面太黑,佢居然同我say sorry,不過say sorry又點?我真係好憎佢呀,麻q煩,成日扮funny。

More More Group Gathering 之團拜

今年新年因為橫跨左一個星期六日,所以新十五前就只剩一個星期六日可以去朋友屋企,咁啱我同老公都約左朋友同一日,所以今日要走兩場。首先去左癸涌個邊,好悶好悶呀,男人係度打機,女人坐係度唔知做咩,我為有同唯一一個bb玩下啦,不過唔知係唔係今日打完針,個人好眼訓又好攰,好辛苦咁。
第二站係姐姐屋企,去到都差不多食飯囉,今日最合作,又表現,笑容又多。其他bb都沈醉係d玩具度,個個都冇咩出abby房,好似係一一(定係狄狄)冇端端出黎比過個汽球我,真係有運行喇,哈哈。

今日天氣都幾凍,心情好麻麻,同埋正式踏入打針階段,老公幫我係mos搵左個好好人既醫生幫我打針,我只係去打針,佢都會安慰下我,叫我唔好緊張,感覺唔錯。

情人節前夕既前一天

今日約左竹太去angel度拜年,本來打算同埋老公一齊去,不過因為太早出去覆診又要等睇michelle,大家都好眼訓,既然老公去到都係呆呆滯滯,我就放生佢返屋企訓覺。

幾個女人八八卦卦完幾個鐘後就叫老公黎接我,一上車我嘗試訓覺,唔睇佢車我去邊,不過原來唔得架,坐坐下就會偷睇去到邊,不過一睇個方向,我知道係向西貢出發。

我不嬲都唔鐘意情人節正日出去食飯,因為覺得又貴又唔好味,又限時限刻,枱同枱距離又少,最憎咁樣出去食飯架喇,咁老公又想氹我開心,所以揀左今日同我食呀。原來今日係去匡湖居一間好home feel既餐廳仔,細細間唔多人,感覺幾好,食物都唔錯,好醒既老公原來仲special order件蛋糕比我,不過可能今日心情麻麻,有d苦惱,唔係太enjoy,不過真係好多謝老公為我安排既一切,我知道所有野都係想令我開心,令我唔好再亂諗野。

不過今日我唔聽話呀,我有亂諗野,返到屋企仲發晒癲咁喊,我以為你唔明白我,原來你一直都好明白我,不過你唔講,係唔想我再諗落去,ok啦,以後都唔同人比較,有問題,我地兩個一齊去面對啦! I promise!

噴鼻兩星期後的覆診

拎左噴鼻之後,第一次返qm覆診,今日要照u/s同埋驗血,我諗驗血係睇下我d hormones level係唔係可以繼續treatment啦,u/s係睇下好幾多卵泡,今日好好彩,比姑娘叫左我入私家症個邊,係prof ho見我,本來我覺得佢講野已經夠少,不過之後一直都係睇公家症個10問9唔應醫生,原來prof ho已經係好好架喇。
佢話我右邊卵巢係生得入d,所以照時會痛少少,宜家我分別一邊有9個卵泡,一邊有12個,要小心處理。不過當我再問佢點小心時,佢只係話打針藥既劑量要少d,同埋照得密d,不過照得密d,講緊都係一星期後先返去覆診,搞笑!
如果今日收唔到電話,即是聽日可以開始正式打針,姣緊張呀!

某一日

近排心情唔多好,唔知係d藥影響我,定係我d情緒控制緊我,總之我宜家係成日都處於不安既狀態,我都唔知點先可以令自己開心d,終於尋晚又喊左出黎喇。我真係覺得好冇助,連黎緊我應該揀邊隻藥都唔知,姑娘就同我講貴藥side effect會少d,方便d,不過michelle又話兩隻藥其實差不多,我自己上網睇,又話貴藥個效果會好d,真係唔知點揀,老公安慰我話星期六一齊問清楚,如果分別只係方便d,同埋side effect少d,佢覺得打pat pat好d喎,因為佢話去診所訓係度比人打就得,唔駛自己打咁驚呀嘛,今次我又覺得佢講得幾啱喎。而我就好怕揀錯左會影響個效果,又唔知會唔會谷唔夠卵子喎,咁我又覺得比多8-10k黎打個10-12日針又真係好貴,如果分別唔大,呢d錢可以慳返啦。貴野又唔一定係好野,真係好煩呀! 呢一刻個心係唔安落度連知道老公會同我慶祝情人節都話唔駛,連生日都話唔駛慶祝,好明顯呢個唔係我黎囉,我明明由細到大都好鐘意2月架嘛,點解呢個2月要令我咁苦惱呀?我成日都係度數日子,數時間,想快d放胎,我知道放左胎之後個14日會更難過,因為要等結果,又會好不奇然留意自己身體變化,會係另一個煩惱。 順提一帶,噴鼻藥真係令到我成日個肚都扯扯下,又好攰好眼訓,真係好難想像到打針個stage個時,我會唔會一返工就要訓覺架?

兔年了

兔年願望一定係ivf成功,一次過搞掂晒! 今個新年可能開始左噴鼻,唔知點解成日都覺得好攰好眼訓,提唔起勁,個人成日都好似down down地咁,連街都唔想行。屋企執左一大半就唔想再執,呢頭執靚靚d冬天衫,不過好快春天又黎喇,其實我可以再一次講,咩衫都可以唔買,因為今年有7成既冬天衫係冇著過,著來著去都係個3成,3成入面我估有唔超過5件衫係新買,但我都唔覺得著到好悶,所以我真係有好多啱著又唔過時既衫。

新衫?等我生完瘦返先再買啦,慳錢一大藉口,哈哈!! 新年奶奶仲係加拿大,老公個邊冇咩新年氣氛,連去黃大仙都唔駛呀~ 大年初一,我地兩個居然訓到4點先起身,施施然返媽咪屋企,坐左一陣就去join老公婆婆食飯,食完返媽咪度竹戰,今年終於都贏喇,之前好幾年都係輸到癲,今年老公決定唔落場,連一舖都唔打,果然好有用,因為我連13么都食得出,真係好開心架!

年初二,年初三都仲係不停訓,只係出過mos同老爺食飯同埋租碟,新年活動都只不過係睇碟,呢個假期睇左「告白」,「冰峰36小時」同「冤家鬥一番」,3套都好ok喎,「冰峰36小時」係最流架喇,不過都ok啦,ok在我地係咁不停問對方,如果我地被滯留係吊車上面,咁應該點好呢?「冤家鬥一番」一聽個名就知係d冇聊搞笑戲,新年咪就係要咁冇聊囉。 其實我幾想睇「我愛香港」架,不過連買飛都懶,又唔想同人迫,所以租碟,哈哈。

係喎,今年連花市都冇得行,真係好冇新年氣氛,唔知出年可唔可以同爽爽一齊行呢?不過個時爽爽3個月都未夠,應該都唔會帶佢去呢d咁多人既地方喇!

爽爽,出年同爸爸媽媽nic哥一齊過年好唔好呀?

Dinner with my best friend

今晚同程爾雅食飯,估唔到有禮物收,雖然佢話本來係買比亞nic,不過如果我鐘意就我要,但我覺得你係買比我囉,隻兔仔超得意。呢排見你多左,不過又唔會冇野好講喎,原來廿幾年前建立返黎既友情呢,好老土咁真係唔會變,好不知不覺我會講好多野比你知,你都會講比我知,大家就係好交心既朋友,好鐘意呢個感覺,就算大家已經冇見好多年,已經有不同既朋友,不同既職業,不同既背景,不過都仲可以有好多唔同既話題,就好似屋企人一樣。 老友記,我地唔好再失聯絡喇,我都唔知自己仲有幾多個廿年可以同你失去聯絡,記得要睇我個女出世呀,卡卡~~~