Happy Shopping Day

今日睇完michelle,偷偷雞去左global essence入貨,今日真係狂買,因為唔知自己幾時生,所以要買定幾個月既skin care慢慢用,順便要買禮物比姐姐,買緊野時,媽咪有打比我問我睇完中醫點,我因為掛住shopping,敷衍講左兩句就算,過得黎港島,唔差在去埋太古買餵奶bra同收腹帶,點知去到冇一個款啱我,收腹帶又冇我size,真係玩野,咁一場黎到就是但買左兩個啪鈕款,同埋唔知搞咩會買兩套好貴既睡衣,真係癲左。買完一輪其實我真係好攰,連call的士都冇氣冇力咁,好不容易先等到的士黎,啱啱上左的士,老公就打黎,我咪呃佢話返緊屋企囉,哈哈哈哈。


今日真係買左好多野,買到我好驚呀!!

血壓高入院

其實我已經血壓高左一星期左右,不過影相前我一直唔敢講,因為一講,老公一定唔比我去影相,唔比我呢樣,唔比我個樣,本來約左30/9去QM覆診,但我唔想星期五先比人捉入院,所以今晚同老公傾完決定入院。撞鬼呀,入到醫院血壓又ok正常喎,少少忽高忽低,但因為我係孖胎,所以醫院都會留低我觀察下,今次入院準備充足,電話有電,又有得沖涼,very good呀。不過check check下,原來我開始有少少蛋白尿,其實已經要開始注意,因為血壓可以升得好快,如果血壓同蛋白尿都升,我就已經係確診妞娠毒血。今次好順利,第二日就比我出院喇,仲要係自己出院添呀。

靚靚大肚相

終於都到左影相既日子喇,好耐冇比人影過相,其實有d緊張囉,出到tst泊好車,係美麗華食左碗拉麵,whatsapp埋marc就行過去jimmy度。嘩!!撞鬼呀,要行樓梯架喎,真係行到我半死,上到去,連講野都唔想,呆呆滯滯咁,我要休息一陣先可以開始化妝,老公好醒目咁落去買野飲比我,我一路化妝一路出汗,真係好辛苦呀。


到化好妝set好頭要影時,其實我都仲好不在狀態,因為覺得自己太肥,好唔自在比人影,唔似結婚個時,都叫瘦瘦地呀,不過好彩都叫係識jimmy,都好快投入到,但原來影相都幾鬼攰,又坐又訓又企又定型,老公就知道我死頂,但我為左影相留念,幾辛苦都會死頂。影左三個鐘左右,中間睇preview時,真係覺得冇揀錯,jimmy影相係勁靚,marc set頭都好好,至少match返我,唔會9唔搭8咁,睇相時我真係覺得好magic,連我宜家腫成咁,又唔知點解黑晒咁都可以扮到咁靚,影得咁好,真係好開心。

由於影完相實在太開心,所以過左the one行一陣同食野,仲買左幾個charm送比自己,開開心心又一日。

信心生日會

挺著大肚子出席信心生日會,今日小仙女同姐姐都幫我買左奶煲,搞到好似係我生日咁,哈哈。啤生覺得我個肚好大,其實我又唔太覺,不過係好攰囉,企下都辛苦個隻,事隔太耐,都真係唔記得有咩要寫喇,只記得啤太今次揀個場地好好,至少有熱既食物同埋有個位安安定定咁坐。


生日會完左,我又扭要去新城市,其實係想去一田入貨,要買bb清潔用品同埋body wash,有bb展硬係要八下咁,其實冇咩特別野要買,行左一陣費時返屋企又肚餓,所以好快我地又再食野,我見自己都唔餓就話食壽b啦,因為我食少少熟野就得,老公可以食生野,點之兩個人食左個少少都要3百幾,宜家食野真係貴呀,食飽飽回家休息。

瘋癲一日遊

首先帶左Nic Nic去洗白白先,放低左nic之後,我地就出紅磡去德國寶開倉喇,部養生機係我既target,一去到已經所餘冇幾,只好揀個比較新淨既,好快試埋機就決定買,跟住就一直諗好唔好要埋光波爐,要又放去邊呢?但老公一口話咁大個,放邊呀,咪同焗爐一樣,唔好買啦。好啦,想買個電煲,用黎坐月用,老公又話唔好,唉,咁算啦,一部攪攪機已經開心,最開心係想走個時見到個6刀杯,仲好好彩個亞姐比我地換喎,就係咁,我地部機只係個機身係display,個杯係全新架,幾抵呀~~

因為係開倉度玩創左個心,所以係咁扭要去行街,最後去左又一城行街街,主要係陪老公買西褲同鞋返工,因為佢個summer dress就快過喇,之前鞋又爛,褲又迫,唔買唔得,我自己係長期冇野啱買,玩完一輪食埋野先返tko接nic返屋企。

$10店收獲

今晚返媽咪度食飯,因為出親街都要搭的士,所以出左西貢之後就轉巴士去將軍澳中心行$10店,今日主要係買膠盤同盒比風爽洗pat pat,洗面,洗呢洗路用,其實都唔知買幾多個,行行下,睇睇下就買左兩個膠盒,4個膠盤,行完仲買多幾杯許留山返欣明苑。只要係買比風爽用既,連買幾個膠盤都覺得好開心,哈哈。

贊育產檢 (32wk2d)

今朝自己一個出去贊育產檢,之前聽nanny講,今次會係最後一次去贊育,其實搞到大家都好似好緊張咁,好似準備好,見埋今次就要生咁,今日同平時一樣,都唔會等得好耐,比姑娘照完同醫生照,我通常都會盡量不停問醫生問題,死唔蝕咁,但我今日真係冇特別野想問,因為爽始終都冇追返上黎,我連續食左幾日雪糕都冇令佢大得快d,咁算啦,爽爽,你只要健健康康就夠,你唔想大隻就唔想啦,我放過你。今日風風有1.9kg(4 lbs 3 oz),爽爽有1.5kg(3 lbs 5 oz),照完同老公食埋lunch再去埋michelle度就返屋企喇。

$140買三日餸

完全唔記得$140買左d咩啦,只記得去左百佳買少少野,拎左$500出黎,諗住去買餸啦,點知日本城係唔收eps,夾硬用左我個$500,搞到我得返$140買餸,又唔想排隊禁錢喎,唯有慳慳地諗掂去啦,$140仲可以連埋買左一份蘋果同橙,我覺得自己好叻囉,哈哈。

AC + jusco + 執衣帽間

好早之前已經約左小仙女今日去ac,而我亦從不講比老公知我出街,下午去到ac,係舖度玩左一輪,買左一件衫一頂帽就同karen一齊tea,講笑講到我牙都軟埋先捨得走。之後同小仙女打的過左吉豬島行街街,大家一齊好開心咁摷堆$39.9,同埋買左兩pack手印布框比風爽用,其實我真係冇咩點行,但都已經好辛苦咁,想係吉豬島直接打的走又冇的士喎,唯有搭返小巴出地鐵站啦,出到去諗住搭綠的平d,點知等左我成半個鐘先有車,嘩,我焗到好想暈呀,超辛苦。


返到屋企,休息左一陣就執下個衣帽間,我都唔駛老公執架啦,只係幫我搬搬抬抬,但佢都仲係咩都話唔好搞,搞唔掂,唔掂咪搞到掂囉,唔知點解咩都唔掂囉,痴線架,日日都要我激氣。

執閣仔之一肚氣

中秋節翌日,一早同左老公講要幫我手執閣仔,點知又係執到一肚氣,一早講好要聽我話,點放就點放架啦,叫佢拎呢樣又話拎唔到,個樣要掉又話唔好搞,我坐係閣仔已經熱到頭暈,仲要激我。個屋企已經亂到爆炸喇,風爽又就出世,都仲係呢樣話唔得,個樣話唔好,咁唔執屋一係住多一層樓囉,如果唔係,邊有咁多地方放野呀?一有小朋友,屋企就要好多空間架啦,真係激死人呀!!!


鬧完一輪交,總算有d成績,掉左好多野,已經好好架喇,仲有好多野要搞呀,我邊有咁好氣好力呢?唉~~

中秋BBQ

老公話想BBQ,所以今日出去買少少野返黎燒野食啦,知道大住個肚唔可以同人迫,又買得唔多野,所以都早左去街市架喇,去到時都仲見到有鮑魚,諗住買埋粟米先返轉頭買啦,點知唔夠5分鐘,已經咩都冇得賣,所有魚檔都係得魚,冇蝦,冇鮑魚,冇扇貝,冇象拔蚌,總之所有可以用黎bbq既海鮮都冇晒,所以是但係街市買少少野,之後去左百佳買塊靚扒開心下。出一出去,的出的入都要成舊水,其實我宜家出街真係好唔抵,去最近既mos都8x,唔好話去更遠既地方,真係冇事出街少破財,不過我都真係好enjoy製造小驚喜,如果我話想食咩,老公為我準備,我真係會好開心架。


買完返屋企,將所有野放好晒就要午睡,唔訓唔得掂,今次係我地一家三口最後一次bbq,下次再燒時,風爽已經出世架喇,希望一家五口,樂也融融。

煩人大舅父

已經唔記得左呢個金毛過氣古惑大舅父有幾煩,我估都係不停講,有bb要點要點掛,不過當時有record低呢個subject,就照打d野當紀錄啦。

二家姐生日飯@西貢

慶祝二家姐生日,成堆人去左西貢食泰國菜,我宜家好似冇咩食得咁,辣又食唔到,生又唔敢食,食來食去都係串燒,蝦餅,不過一家人堆埋一齊食飯真係好開心,有傾有講咁。食完晚飯,拎埋我買個mini cake去左食糖水,因為人多,比左間房我地坐,好有privacy,勁正囉。我只係夜晚出去食一餐飯,行去食埋個糖水,都已經攰到行唔到去拎車,要老公揸車去滿記對面接我,同埋返到屋企係好似打完仗咁囉,體力消耗得勁快。

產檢@翹康

今日專登約最後一個booking見Dr Yu,因為我想老公可以見多d肚入面既風爽,繼上次贊育話爽細一週之後,我已經好努力食不同既野,睇下爽鐘意食咩啦,點知今日爽係細左兩週,其實我好唔開心,同Dr Yu講到眼濕濕,但Dr Yu既冷笑話又令我喊唔出喎,不過一出病房,我就係咁同老公講,我唔擔心爽唔健康,我係擔心佢細過週數,如果突然要出世,佢一定麻煩d,始終大隻d好湊d架嘛,唉~爽呀爽,你乖d,吸收多d,過5磅先出世啦,乖乖豬呀。而風就好正常,完全乎合週數,以孖胎黎計,風真係好叻仔,哈哈。


p.s.今日Dr Yu仲影左一個肥嘟嘟既風風側面比我添呀,幾得意呀,哈哈~

Aug Gel Nail + 八珍

去睇Dr Yu前去左整甲先,因為入過醫院,開始驚突然生得,所以開始左整全透明甲,快到爆炸,小玲仲要幫我整左磨沙面,我自己就一d都唔覺有gel甲囉。


整完甲,順便去八珍買埋醋,其實去街市買都得啦,不過嬌姨又話驚街市賣假貨,咁貴少少都係八珍買同加錢送貨囉。

探momo

MoMo出世時,我去唔到醫院探佢,今日係同momo第一次見面呀。首先上去心心屋企,實在太守衛森嚴,上平台又登記,去到座頭又要等,等到我呢個大肚婆攰到痴筋,是但見到有位就坐,哈哈。


上到心心屋企,第一眼見到心心,真係覺得佢好勁,佢瘦過未有bb時呀,至少手已經幼左好多,魔魔集團應該除左我,個個都係瘦底,真係慘呀。由於我企多一陣都唔願,其實我全程坐係度,唔知做咩,最開心係不停偷食薯片,因為係屋企唔比食,去到人地屋企就係咁食,同埋今日markus趴左係房入面,睇到佢既相真係笑死,點解呢個小朋友有事唔高興時會趴係度咁得意架?

去完心心度,去左uniqlo買左兩pack底衫比風爽,跟住又去南豐睇玩具同拎車走人,宜家每次出街只可以數小時,太耐會好辛苦,連行都行唔郁咁。

飲糖水

連續三日都去QM,真係去到人都癲,其實我蠢左,早知係醫院時叫姑娘比我飲埋,唔駛今日再去一次,宜家個肚大左,成日都會好餓,仲以為今次飲糖水會好暈同好餓啦,點之反而宜家大食左,飲完糖水唔覺得頂,只係有少少暈姐,好快就過左兩個鐘,抽埋血走人。


之後泊低左架車去中環睇michelle,再上埋global essence買野,以為會大手買入啦,點知sales姐姐話一田bb展賣baby boo仲平,所以我就留手去一田買,今日只買了eye cream同cleanser,之後返中環拎車返屋企,玩左大半日,好攰呀!

出院了

訓左一晚,又早熄燈,又早開燈,係醫阮6點幾就要人起身,簡直係痴線架,因為冇準備入院,又冇得沖涼洗面,個人dirty到爆,個頭立到爆,好彩一早見左醫生,佢話比我出院,我就打比老公,大家商量完就叫左媽咪陪我出院。Lunch時老公同媽咪黎到,我就食埋醫院餐飯先齊齊走,老公跟我地車落左中環先,跟住我同媽咪去馬鞍山,佢幫我買少少餸,等我星期六日有飯食, 我一直都坐係街市出面等媽咪,個刻覺得媽咪真係好好,自己好幸福,第日我都要咁鍚爽爽,照顧佢,風風都要鍚,不過佢係男仔,應該唔駛好似女咁鍚掛。媽咪買完餸就搭車返屋企,返到去第一時間要沖涼洗頭,媽就幫我放好晒d野入雪櫃,沖完涼出黎傾左個幾鐘,佢走左我就即刻訓覺,直至老公返黎煮飯食,回家真好,係醫院真係訓又唔好,食又唔好,好辛苦架。


因為我地都太驚風爽會突然出世,所以個晚老公已經幫我執好左大半個走佬袋。

第一次入院

今日係我sl既第一日,本來打算去睇michelle保健下,約左lunch hour,諗住老公可以陪下我。今日好早起身,慢條斯理咁出馬鞍山搭巴士過海,去到灣仔,個肚開始有少少痛,我以為係內臟痛,仲whatsapp同魔魔集團講,一路傾計又好似唔太痛。直至到站落車,一企起身,原來都唔係少少痛,都幾痛下喎,不過好彩車站好近michelle診所,我好慢咁一步一步行,終於都到埗,當我以為可以見到michelle冇事既時候,點知個金短髮鬼婆原來冇幫我make appointment,我個肚又一直都痛,唔想行,只好一直等老公過黎。


老公黎到,我都仲可以同佢講發生咩事,都話比佢知我有d肚痛,老公問我要唔要入醫院,我仲話ok,本來仲打算落去食左lunch先再返黎等michelle,點知一出診所企係度等lift時,我已經好痛,其實痛又未至於令我喊,個種痛係令我好驚爽有時,點解係爽呢?因為係爽個邊痛,同埋我由灣仔到中環係咁拍爽個邊,佢個反應都冇平時咁好,所以我係好驚佢有事,我驚佢臍帶纏頸,入左lift我不停喊,有個媽媽仲叫我唔駛驚,入醫院好快生得,仲叫老公扶實我,落到街其實我已經行唔到,我好用力搭住老公,拖住隻腳黎行,行到馬路又冇的士喎,老公要過對面馬路搵車,我就坐埋左一邊,好彩有個好心姨姨見到老公搵到車就扶我過馬路我先上到車,上到車我仲係咁喊,我真係好驚爽有事呀,係咁拍佢都唔郁。因為太突然,我都唔記得自己可以直上病房,所以走左入急症,急症都好快有醫生見我,又有得照u/s,見到風爽都有郁有心跳,我個心先定落黎,佢地都算好快就推左我上k9,入到病房比人問完一輪,又要自己行去量血壓,磅重同換衫,老公又唔知比人叫左去邊辦手續喎,我又呆呆下比人捉左去駁機,好彩老公打左返工話我入左院,所以可以陪我耐d,我都唔記得左駁左幾耐機,姑娘話我有3分鐘一次宮縮,嚇鬼我,醫生見我時又話雖然宜家宮縮係疏左,但如果bb真係要出世,會有咩咩咩風險,又要打強肺針,但我當時得29 wk,真係嚇到我死呀,咁快出黎唔得架。當時我連打比媽咪都喊到7彩,始終第一次入院,又突然間咁痛,好彩去到6點前再駁機,宮縮已經冇晒,住一晚醫院冇事就走得。

度過了第一次入院過夜的一晚,之後兩個月,係不停入醫院,真係煩到爆。