風爽出征圓方

今日帶左風爽出街,第一站係帶左nic去沖涼先,跟住我地就約大家姐出element,我諗住個度夠大,可以推下bb車同埋行下zara呀嘛。

本來去到好興奮,諗住行完zara仲可以行埋h&m架,點知我同大家姐係zara已經玩到short左,估唔到呢間好多款下喎,又多啱碼既衫,所以買下買下,買到short左,買左廿幾件野,要排隊比錢時,我已經忍唔住要出去餵奶,真係好驚老公搞唔掂。

最後我地就坐左係zara出面餵奶,餵完先去換片,不過我呢個媽媽真係經驗不足,無論點都應該換左片先餵奶,搞到爽爽濕晒先換,我仲要即刻去買過件衫同褲比佢,因為我唔想換件夾衣,好似好肉酸咁,都唔型,嘩,上一上h&m睇,好似好多款囉,我好想揀呀!

換緊衫個時,老公出去搵野食,我地要快快食dinner之後返去接nic呀,所以拿拿聲邊間有位就去邊間食,好耐冇出過街食飯,唔知點解好唔慣,覺得d野好重味精,食完快手快腳就一齊返tko接nic,我地就返屋企喇,今日好開心呀,除夕日同左風爽出街,今日仲出奇地,12點時佢地未訓覺。

風爽,happy 2 mth呀!!!!

Zara shopping

今日帶左爽爽出去搵爸爸lunch,其實我主要係想去zara shopping呀,卡卡。今日第一次帶bb出街會老公,唔知我自己一個掂唔掂呢?之前都係帶bb出去會見到大家姐,咁有佢幫手一定冇問題啦。

本來出去話食翡翠貓麵,但太多人喇,唯有去d貴夾唔飽但唔駛等既地方啦,食個包都要百幾蚊,真係好貴,不過好彩佢比左個梳化位我地,我都算坐得好舒服,又可以去埋toilet。食完飯就去左zara掃貨,咩住爽我都揀到野都真係好叻架喇,最叻係點左老公去排隊先,我揀多一陣再出黎,老公居然見到竹太,我真係好唔客氣咁就打左人尖,同竹太一齊比錢,哇卡卡。

袋zara我就比左老公喇,之後同爽去左換片,本來老公又話叫我帶爽上公司,換好晒片之後,佢又話好忙,唔要亞爽,我咪慢慢行去michelle度比佢見下爽爽囉。上到診所,michelle都未返到,咁爽爽又夠鐘,就餵佢先,餵餵下michelle返黎,我地傾左幾句影左相,搞掂晒玩多一陣我地就走喇。之後我同爽去左行gap,今次冇咩特別野買,主要係買比風風,爽得好少,不過算啦,女仔衫好易買。

一連4日聖誕假

今年由24 – 27號都放假,其實都冇咩野玩,只係26號叫左大家姐二家姐黎打邊邊,我地只係負責去買野飲同用品,其他咩都唔駛買,佢地係tko買過黎,今日d海鮮好抵食呀,tko買咩都好過mos,其實我真係唔鐘意住mos囉,都唔知點解d人咁鐘意,如果唔係西徑好住,我真係好想返去tko住,不過西徑養狗又真係好好既,就算以前荒島咁多狗,上上落落都唔係咁方便。

嬌姨last day + 5週年結婚紀念

幾鐘意嬌姨都好,終須一別,今日係我地結婚5週年,雖然我唔開心,不過都搵左朋友準備今日晚餐,之前我仲訂左個蛋糕叫你幫我拎返黎。

嬌姨走個一刻,我真係好唔捨得呀,我,嬌姨同atik都喊晒咁,嬌姨,其實我好希望有機會生多個bb,等你再黎做我陪月架,又可以湊下風爽喎,不過我諗我冇呢個機會啦,今次生bb生到我個心好痛呀,點解冇人明白我既?點解個老公唔理我?點解個老公唔理都仲未夠,仲要刺激我?

夜晚我準備晚餐大家食,但我已經冇左以前煮飯比你食既開心,全部野都係做樣,冇heart架,到底你係留意到但冇理,定係你根本唔知?

h&m + gap shopping

今日約左michelle比佢把把脈同本來約左毛豬一齊tea下,點知佢隻手係醫院搞左好耐,咁我咪路過九龍塘時去左h&m行下囉,嘩!未生個時都唔覺得h&m既bb野ok架喎,宜家覺得好掂喇,我買左勁多野比風爽,不過男仔始終都係少野揀d,我都只係買左兩條褲同兩件tee比風,爽就有兩條裙,又有兩件底衫,三條褲,d褲有2-4m size,真係超正!!

行完kln tong就繼續出發去中環,其實搵michelle都係傾下計同等佢幫我relax下,每次同佢講完都好似會鬆d既,加上今日買左野,所以心情又好靚,睇完michelle,我仲殺埋去gap,第一次去hk gap都幾開心呀,雖然baby唔多野買,不過我有兩個,男女都買得,其實都可以買得好開心呀,買完晒就返屋企,又拎d衫出黎比嬌姨睇,真係勁開心,哈哈。

國金軒lunch

我冇開心過,所以我食野全程都玩電話,你唔出聲我咪玩囉,反正我冇特別野想同你講,連望你一眼都唔想。最開心應該係終於都買左notebook,我可以返屋企玩相喇,其他?我咩都唔記得,我只係知道同你出街好悶,唔想搵野講,好討厭。

Gel Nail + Shopping

今日最早booking整返d手指,終於都可以整喇,我自己整到好肉酸呀,本來想整得簡單d快d,點知搞搞下畫個花都唔係好快,不過是但啦,今日都預左出黎一日,總之6點前返屋企就得啦。整完手指行左過去風月堂食tea,終於都可以享受一個人既快樂,其實之前帶住肚中既風爽出街,我都好開心架,總之唔同老公一齊,我就開心啦。

食完tea就搭車過去tst,點之都未去到我想去既polo,就已經比city super吸引住,我都唔知咩事,今日全場都有折,好多人都去買食物,不過我真係唔敢睇超市,一睇就大件事架喇,我咪去睇下有咩野可以買黎係火雞大會交換囉,真係話咁快就揀到,揀左一塊毯同一支酒黎交換,買左兩塊毛毛scarf比風爽影相用,仲有買左兩支洗衣液,嘩,原來呢d野都幾重呀。買完之後,由city super行過去polo都想死,我仲要去mothercare買埋揹帶呢,買完揹帶就去換左件polo,跟住行去碼頭個的士站又係想死囉,攰到我呀!

返左屋企拎晒d野出黎影又覺得好開心,總之我一買野比風爽就係開心架喇,哈哈。

崩潰

我都唔記得左由邊日開始冇出過聲,我唔講野你又唔講野,我真係癲喇,我啱啱坐完月你都可以比我自己一個人走出街,個街好凍,個心好痛,個肚行樓梯行到好扯住,跟住仲要同我鬧交鬧到搵我媽咪黎,我好憎你,好想你係我眼前消失,唔好比我知你去左邊,唔好再返黎。

我咁大個人未試過攬住屋企人喊得咁緊要,你痴線架,我好歹身體都未好返晒架,點解你要咁對我?

我本來好相信你唔搵女人架,但點解我連去生緊仔個時你都要whatsapp人呀?雖然我都知道你宜家唔係有第三者,不過我覺得男人始終都信唔過,你都唔係一個值得我信既男人,我更加恨你。

風爽滿月喇

風爽滿月喇,一諗起夜晚要見到數字人我就好唔開心,係下晝個時睇住佢地沖涼,又幫佢地影相,我真係好開心呀,風爽大個仔大個女喇,滿月之後要繼續乖乖呀!

爽爽個面開始脹出黎,好搞笑,風就明顯大個仔左,隻眼大左好多,哈哈。

嬌姨幫我煮d餸好靚呀,仲買左串好靚既提子比我地,話滿月要有生果,生生猛猛喎。佢走左冇耐,6299爸爸媽咪都黎到喇,我一見到佢地就覺得好煩,一見到佢地笑就覺得好乞人憎,拎煲翅黎做咩姐,又講到好巴閉咁,又話用咩煲,又話呢度幾多翅咁,我真係唔想再食喇,仲有喎,我都冇話過我鐘意食,係佢地個女鐘意食之嘛,冇端端又話係我鐘意食先煲黎,又拎一疊二疊報紙亂放我屋企,真係好討厭呀。我見到佢地抱住我風爽就唔知點解好嬲,好唔想見到。

當佢地走個時,我先可以鬆一口氣,唔該唔好再黎喇。

p.s.第二日嬌姨問我係唔係好高興,我話我唔知喎,佢地好高興囉,又問我有冇影相,我話冇呀,完全冇左件事,我真係唔想影囉。

其實我呢個時候都真係已經好討厭成個梁家,點解冇人發覺,其實就算我講,d人會明咩?只會發癲,我到今日過左三個月(8/3,打blog日)都仲好痛,我當時應該真係有病,點解我完全得唔到家人既照顧?仲要怪我生完變晒,簡直係痴線。