個心好傷好痛

今日返工主要都係喊,唔開心,不用多說。

悲哀的生日

今日係2013年1月23日,如果要我記返起生日呢日發生既事,我估我仲可以記到,但唔開心既野,不如唔好再記得太詳細喇,總之今年生日係好唔開心,喊到眼都腫,心淡心灰咩都有,算啦!

Birthday Lunch with 風爽 at Disney

一連4日既生日假期,今日係我話要入disney食點心既,今日食飯好開心呀,佢地兩個又乖,雖然一個接一個咁poo poo,不過都OK啦都係行多兩轉姐,但我食得飽又食得開心,食完仲可以周圍影下相先走,玩左佢地一輪都好攰,我地都返屋企休息下喇。

風爽出征見michelle

今日風爽第一次一齊見michelle,其實係我要減肥想睇michelle,又夾到時間就帶晒兩個出黎喇,針減肥位冇咩大感覺,輕輕鬆鬆又針完。之後去左gap & zara shopping就返屋企喇。

Twins MaMa group BB expo

比人魔魔下,今日約左兩個孖媽一齊去bb expo,其實我唔知有咩買呀,不過上年8月冇去,我覺得點都要去趁下囉。約左兩位孖媽9:30食早餐,我居然係最早到喎。今朝好似著錯衫咁,一落車時好鬼凍呀,不過好彩食完野暖返少少,再行來行去,直頭係好熱呀。

其實本來今日請左假,星期一b-day leave,一連4日既假係令我好開心架,不過個白痴老公星期三時因為又咩都亞媽令到我好嬲下。算啦,唔再講呢d,講返bb expo。

其實人人都話8月個BB expo先夠大夠多野買,不過可能第一次去,我又覺得呢個都OK喎,至少我可以買兩箱奶粉,又買左兩個睡袋,仲有一D即食BABY FOOD,都算好滿載而歸,為左慳返唔搭的士過海,我居然可以拎住D野由會展行返出車站附近食LUNCH,之後搭巴士再轉小巴,今次真係勁喇,玩左一個上晝,返到屋企又見到可愛既風爽,真開心!

幼稚園

近排忽然好怪獸咁係咁睇幼稚園,其實我都係心儀保良局架喇,差在係沙田定馬鞍山姐,沙田間保良局就多人講d,不過我又鐘意馬鞍山個間雨川小學喎,仲有就係唔想佢地搭咁耐車啦,所以咪同老公傾下有咩睇法,唔知點解講學校之嘛,冇端端又要話近d好,有咩事上雅典居度,我都唔知會有咩事要上雅典居,如果係病唔舒服,就返屋企啦,一係就我帶佢地去睇醫生,上雅典居做咩姐?又係咩都搵亞媽,好討厭呀,我反應係好激烈架,因為我真係覺得好討厭,如果你覺得近就要上去得一得,我唯有揀沙田架咋,妖,我真係好想開戰呀!

Shopping @ chocolate

之前收到小仙女message,其實都冇咩心動架,因為我不嬲都唔會睇同埋覺得d野都唔會啱我著,點知大家姐話chocolate不嬲都唔會減價,又好想去睇下喎,咁所以今日last day就去睇下啦,原來揀下揀下又幾開心架喎。

好開心咁試完一堆,揀完一堆之後,原來唔可以即刻比錢,要等個staff收工先可以開單喎,咁我地唯有周圍行等下啦,其實都只係等半個鐘姐。當我知道要等個時,我已經打返屋企叫左atik開飯比先生食,我會遲返,安排好晒先打去比隻豬,點知隻豬問長問短,又話我好去街,我係cam度見到佢打完乞痴又摸落爽度,我叫佢唔好,佢仲要鬧我,宜家佢好想搞對仔女呀,你唔返屋企咋。超,我遲兩個鐘返屋企姐,工人唔會唔點架,佢全日一對二都係咁架啦,係你自己唔顧下衛生,自己病又唔睇醫生,根本佢病就係因為自己凍唔著衫引起,咁呢d係唔係抵死先,好q乞人憎,我真係唔明點解你遲返,你去街就得,我去個一陣就唔得囉,痴線。

明明本來好開心既shopping都變得唔開心,更加唔知揀兩件衫比你為咩。

第一次一對二

今日我第一次冇出街而係屋企一對二,大致上係冇咩問題既,如果冇老公係屋企應該可以更好,因為佢係度令到我好緊張,一喊就話我搞唔掂,咁係bb都會喊架啦,氹下玩下咪得囉,痴痴地線。

一對二其實好開心,如果可以有工人,又日日係屋企但有糧出就好喇。

Meeting with Joe Joe & Fion

約左都幾耐下,終於都可以帶風爽見下joe joe喇,其實同joe joe呢,又唔係話好fd好fd,不過就久唔久都想見下面,今日我既任務係比風爽碌下佢張床,比d luck佢,希望佢快d生返個bb啦,仔女都好啦,唔好只係忙女,其實仔都好得意架。

太耐冇見技安,好似好生外咁,加上時間又短,都未warm up就話要走,唯有下一次玩耐d啦。

去完joe joe屋企,約左一個孖媽見面,佢地就係食飯,我地就真係坐低食少少,因為叫左atik煮飯,我地要返去食飯呀,下次再見面啦。

Shop online: breeze 一日買兩round

自從fo kids轉左旗下牌子名後,貴左好多,不過冇端端比我發現今日有減價喎,我係公司咪好開心咁買囉,全部剩返d 80碼,好彩我兩個應該啱著既,買下買下越買越多,一早係公司一次,跟住發現下晝又另一個online shop又減,仲魔埋其他人一齊買,不過第二次戰績唔好,買到8樣野咋,但狂買過後,個心真係跳得好快呀,痴線!

第8個情人節

原來鬧下鬧下,日子一日一日咁過,今年已經係第8個同豬一齊既情人節,仲記得第一個情人節,我地仲係mc做野,例遲既我,一返工就已經比receipt打爆電話,要我出去收花,有花收係意料中事,因為第一個情人節喎,冇就抵打啦,但點解唔係百合既?我對花認識唔多,來來去去都只係鐘意百合,收一百次都唔會悶,但唔知點解豬久唔久就要搞搞新意思,送非百合比我,之後既情人節,應該都有一半日子係送百合比我。

今年係公司等了又等,其實我估到佢會送,我呢d咁浮誇既人,當然係想佢送去公司啦,一過左lunch,我就知唔會有花去公司,其實都真係嬲嬲地架,都唔知有冇搞錯,就係呢估嬲嬲地既情緒驅使下,放工搭左車去沙田,既然去到,咪行一陣先返去囉,點之個老公係咁打黎問我係邊,又話過黎又盛,其實我好憎佢死跟,所以最後原來佢係揸車出黎接我,我都係好憎,麻鬼煩,又要我等又盛,本來我係zara比完錢就可以走人架喇嘛,等左佢成廿分鐘先到,仲要係度呃我話好近,話黎緊,激死。即使我一上車已經聞到花香味,我都死唔望唔睇,因為好嬲。

泊好車,我一支箭落車,老公叫住我,話我仲咩就咁就走,其實到佢拎盆花出黎,我都係唔開心架,心諗:搞錯呀?又唔係百合,搞咩呀?今年係送一盆花比我囉,我初初以為要種添呀,嚇鬼死。揸左車返工都唔黎接我放工,我真係覺得唔高興囉,激死!直至佢送埋張卡比我,我先覺得好感動,冇諗過佢會咁有心機整張卡比我,好開心呀,不過因為仲嬲緊,唔可以突然開心返,所以個樣都仲係好衰,哈哈。但其實個心已經開心晒,張卡我好鐘意。

食完晚飯,仲有兩個好靚既蛋糕仔食,多謝你,希望我地可以一直開心快樂。

魔魔集團團拜

一年一度團拜,都仲係打搞緊姐姐,因為我地實在諗唔到有咩地方好過姐姐屋企,呢度真係最好,地方夠大又多野比小朋友玩。繼08年後,11年係魔魔集團有大量新血既一年,代表有mysha,momo同風爽,遲下仲要有埋二妹,一共10個魔魔「二代」,呢個場面真係好正。

大合照,場面非常混亂

風爽100日大快樂

其實我都係返返下工先醒起今日係風爽100日正日,今日我硬係覺得有d野,但又唔記得係有d咩喎,坐坐下終於都記得,如果一早記得,我好可能call sick架喇,卡卡。今日好順利呀,一落樓下就有shuttle bus出地鐵站,跟住去左美心買個mini cake,再去到車站等左一陣就有架半full既車,上到去都仲有位可以坐,未夠7點已經可以落車,咁啱接住一架299上緊人,即刻跑上去,返到屋企都係7:05,今日係破晒紀錄,快得黎又有得坐,真開心。返到屋企爽爽起左身,咪同佢玩下囉,玩到咁上下,風都起左身,我就放晒兩個去床仔度一齊玩,我坐隔離睇住,其實真係望住佢地,知道佢地係身邊就已經好滿足,好開心。

食完飯,我叫老公幫我同佢地兩個影相,今日居然可以影到兩個都笑喎,我睇完張相,再望下佢地,唔知點解會係咁喊,好感觸,感觸在咁快就100日喇,原來佢地冇係我個肚度100日,呢100日過得好辛苦,係我咁大個人未試過咁痛苦,細個以為失戀係最痛,原來冇溝通,對老公失去信心先係最痛。

風風爽爽,媽咪真係好想你地有快樂既人生,係唔係就係因為我太想,所以先比唔到你地呢?我想同你地爸爸可以開心相處,唔知幾時先可以做到呢?anyway,媽媽一定會努力令個家開心快樂,同爽爽個名一樣,有快樂,有希望。

得意人面公仔

返左工幾日,係mega box有開心大發現,就係見到有人面公仔賣,初時唔知原來會整埋張3D相,以為就咁買公仔,知道佢會customize整之後,更加開心,仲要有個新款啱晒我要求,由confirm到收貨都係兩日時間,我真係好鐘意呀。

豬妹回歸

今日安逸既生活就比一個電話令我心跳加速,心情緊張,其實要見面,係唔係一定要咁夜呢?10點鐘黎到,11點走,不過諗諗下,如果一定要見,平日黎總好過用左我珍貴既weekend,我真係唔想開心既weekend要遇上我不喜歡既人,是但啦,冇得我選擇,除非搬入元朗,哈哈。

Monday off

已經係第二個星期一放假,今日回復平靜,得返我,風爽同工人係屋企,好似嬌姨走左之後,我仲放假既日子,訓到9點幾起身,餵奶,陪佢地玩,睇佢地沖涼,自己食飯,餵多佢地一餐奶再玩多一陣佢地就訓覺,我自己都訓一陣,訓到黃昏又可以再玩,呢個生活模式真係好ideal,如果可以一直都放假又有人工,真係發夢都唔會有,但有時可以咁樣放一日假,已經係非常幸福既事。

繼續瘋癲週未

今個weekend真係好full,尋日走兩場,下晝去kelly屋企,之後同屋企人食飯,今日下晝同中學同學lunch,之後去肥仔度,尋日夜晚都仲叫可以休息,今日就全日得我同老公,完全係挑戰人體極限呀。

首先趕頭趕命12:30出門口(人地約我12:30,但我夠鐘先出門口,好彩去tko好快),一去到鴻星,原來佢地都係啱啱坐低,咁我影下相就要開始餵奶,因為爽已經遲左成個鐘未食,風就夠鐘又開始喊,我自己其實餓到痴筋,但冇辦法,一定係佢地食先架啦,我餵風,老公餵爽,風非常合作,食得快靚正,除左原因不明個樽漏奶,跟住我比風老公,我繼續餵爽,爽宜家出街鐘意練仙,八八卦卦唔願飲奶,所以比佢中場休息時我狂食野,之後繼續餵,食左成個鐘先食晒(亞囡,出街唔駛絕食架)。傾下講下,話咁快4點幾5點,本來想係將軍澳中心換埋片先走,由街頭行到街尾先見到換片標誌,去到原來只係喺toilet入面有板而唔係parents room,咁我唔鐘意帶bb入廁所啦,好dirty又多菌咁,最後去返車度換,我已經好快手,點知換完片出車都過左15 min,搞左一輪先出到閘,煩爆。

之後,去到肥仔屋企已經6點有多,一入屋匆匆忙忙又要餵奶,今日好似去每個地方都要餵奶,今次我親自餵爽,但都要食成個鐘,衰豬黎架,搞掂晒兩隻豬影埋相,好快又有野食,風已經訓左,爽想訓又唔訓,係風隔離郁郁下,但風真係好鐘意家姐係隔離,爽點郁風都唔醒架,到9點幾開始走人,去拎車時順便入去unliqo睇下有冇平野,估唔到咁都比我執到4套home wear比佢地出年著。

返到屋企餵埋夜奶,放埋nic,weekend活動終於完結,成個散晒。