失去cookie的第四個星期

今日係cookie四七,其實我冇任何宗教信仰,不過跟佛教個概念去諗野會令我覺得安心一點,之前睇過話動物同人一樣,都會輪迴,有7次機會去投胎,今日已經係cookie既第4個機會喇,唔知cookie去左投胎未呢?如果投左胎,唔知宜家開唔開心呢?做返動物定可以做人呢?
無論cookie做咩都好,最緊要佢過得開開心心,好似做cookie一樣,因為都訓,食,懶洋洋咁enjoy her life!!
Cookie,我今日搭車返工個時又向住個天同你講左一陣野,希望你真係開開心心,唔好再掛住我地喇,我地會放你係心入面,你開開心心咁再面對你既新生活啦!雖然我每次諗起你都仲會好心痛,好難過,難過係如果我一早知你有呢個病,我唔會要你做手術,會比你食好多好多野,等你食到飽飽先走,同埋唔駛打開個肚,唯一我諗到做左手術既好處就係你走個時個肚可以平返,唔駛帶住個腫瘤離開,點都好啦,你走左係事實,我可以做既都做晒,希望你係過去14年係如我所見,你真係開心過每一天,好多謝你陪左我咁耐,thanks cookie!!!
I LOVE YOU!

Snack from Japan Trip@2010

今年去日本雖然係去左3個唔同地方,不過冇咩時間買當地特產,最後一日,好夜好夜先去是但買,所以d野唔太好味

圖1: 買比bob bob同nic nic既零食,原來tokyu hands有狗狗零食,大部份都係made in japan,仲要好多hk都冇,買既時候以為好多,原來分開比兩隻,一隻都係幾6-7包,不過已經要6xxx yen喇,好貴架!!
圖2: 尾2晚,舖頭就收舖先入去買野食,叫做買晒關西限定既野,不過唔係樣樣都好味,得個拎字

圖3: 最後一日因為搭早機返hk,等機場巴士個時,都唔放過要去便行店買多轉零食,呢d好味好多,總之一早去便利店掃好過啦

後記: 第日都一定要搵d時間掃超市,如果唔係買唔到好味既零食~

出發喇~

今日凌晨機出發,今日好多野要做,11點要出去睇michelle,睇完michelle要返屋企繼續執行李,以為可以休息一陣啦,點知都夠鐘要出發,拎埋行李同nic nic出去。
首先係入元朗放低nic nic先,佢要住酒店喇,開心到發晒花癲,拖到我一仆一碌。放低左nic nic係酒店,就去九龍站check in左先,跟住去唱k等到夠鐘啦,點知check in前我拎一拎個細喼,點解入面好似有野咁既,怪怪地,於是叫老公打開黎睇一睇先啦,點知…之前借左比99,佢放左d冬菇湯包入個喼度呀,好彩睇一睇姐,如果唔係要帶埋去日本囉,超傻仔。
跟住打比大家姐,諗住約佢拎d print out啦,點知佢又唔記得帶喎,最終搞亂晒我地個計劃,冇得去唱k,最後係拎住包冬菇去左ywca join大家姐,再一齊返tko拎print out,再等到加鐘為止,去左大家姐屋企食左餐飯,放低冬菇,拎print out,10:30左右先離開。
入到機場時間非常好,等左一陣就可以上機喇,嘩,今日好攰好眼訓,我仲以為可以係機度訓得到啦,點知都係唔得,又眼訓又訓唔著,咪係飛機度發晒脾氣囉,卡卡。

旅行前

旅行前係1-2星期都忙碌得很,一早已經說過沒有時間plan行程,工作上很忙,加上cookie既事,心情好差好差,之前一直都冇試過連去日本都一d都唔興奮,其實又唔係好想去,不過請左假又比左錢,冇理由唔去姐。
最終我要去到17/9熄左機之後先可以relax,先覺得聽日要去旅行,先覺得有d開心~
日本,等我吧!!

GOODBYE MY LOVELY COOKIE~

Cookie就係o係11:50am離開左我地,佢好似訓左覺咁,個身仲暖,不過個咀同手已經凍左,今次cookie訓左就唔會再起身喇,cookie,我好掛住你呀!!!!!

再見了,Cookie~~

9月2日,Cookie離開左我地喇,我好唔捨得你,我覺得係我累你,如果我唔係堅持要你開刀,你可能唔駛咁快同我地say goodbye架!!!
今朝本來想早d起身入tko一齊湊cookie做手術,點知自己又懶,訓到夠鐘先係西貢等cookie,去到未見醫生時,已經同左cookie講,你要加油,千祈唔好放棄,好快就可以好似以前咁,食好多好多野。一路聽醫生講解個時,一路係度喊,喊係真係好驚cookie捱唔到,好擔心佢呀!
做完blood test,簽晒紙,睇住cookie訓左,我地就離開西貢,因為我唔記得左拎cheque比fei e,所以要返一返屋企拎。臨離開醫生房時,我仲叫醫生一定要盡力醫cookie,醫生仲好肯定同我講,佢一定會,所以當時鬆左一口氣。返到屋企見到nic,本來好開心,仲同佢玩,不過我地準備離開屋企(我準備返工,fei e準備返屋企)時,醫生打黎話cookie o個個係血管瘤,唔係小腸氣,個手術有d難,不過都會盡力,呢一刻我唔係好擔心,因為我只係覺得可能要做貴d手術費姐,咁我地繼續出返西貢啦,到差不多落車個時,醫生又打黎,叫我地去診所睇一睇cookie個情況,一路行去個時,個心開始慌,cookie你點呀?你頂住啦,我好想救你呀。
去到診所,醫生有問我地怕唔怕血,唔怕先好入去。入到手術室,成個房都係血味,係cookie既血,個瘤好大個,一塊塊凝結左既血塊係cookie個肚度,醫生話佢個小腸氣其實好少事,如果只係小腸氣,佢手術係好成功,不過個瘤好大,如果要同佢割,可能連唔返個傷口,就算連得返,都好可能會爆,同埋血管瘤係可以周圍生,唔知下一次會生去邊,cookie會好辛苦,一路喊一路聽,我估cookie之前真係好痛,因為個瘤唔細過佢個頭好多,唔怪得佢一直都唔肯食野,一定係壓住個胃好唔舒服啦。最終我地都唔想cookie辛苦,決定比佢訓落去,臨離開之前,我再摸下cookie,真係好唔捨得佢呀!!!!!
之後既事,就只有喊,喊同埋喊!!

老公拎左pm leave返屋企,一見到佢又喊,我地3姐妹都好傷心
Cookie希望你係過去14年半同我地一齊係活得開心,你宜家走左,我都好希望你去到另一個地方繼續開心,多謝你比左好多回憶我,多謝你陪我成長!!!
如果有機會,我希望你可以繼續做我隻狗/做我朋友/做我親人,希望我地有機會再相見!!!!

再見喇,Cookie!!!!!!