開始噴鼻的日子

今日第一日噴鼻,一d都唔辛苦,d藥冇色冇味,只係噴完之後,唔多唔少都一定會有少少落左喉嚨就會苦苦地,感覺怪怪地,不過又唔會覺得好難受。最令我煩擾係成日睇時間,因為一定要6個鐘一次,盡量要準時,雖然6個鐘已經可以做好多野,不過硬係成日都心掛掛,噴完一次又怕下一次唔記得左咁囉。同埋一般大壓力係一定要記住拎藥出街,如果冇帶,應該係慘過唔記得拎電話。

新年甲

今年終於都唔再整金色喇,整左偏紅既顏色,其實唔算好新年feel,不過有紅又有花,都ok啦。小玲一到新年就會開turbo,就算又鵰花又畫花又痴石都好快囉。 Color宜家大個女,d毛靚左得意左,成隻電兔咁係咁跑,真係好想帶佢返屋企同nic玩下,卡卡~~

欣賞Kelly

自從睇完kelly公佈做人工受孕而懷孖胎既報導之後,我都真係幾欣賞kelly呢份真性情,講真佢講唔講出黎都未必有人會知道佢係做人工受孕,宜家佢自己講,我真係覺得佢好勇敢,而且佢講出黎既理由真係好reasonable,就算係假,我都覺得毫冇問題,至少佢真係好正面。不過睇bk,有人開左個topic出黎話kelly係濫用呢個方法,話佢之前都係自然成孕,今次冇需要做人工受孕,其實有冇需要個個人都唔同,kelly都話左係跟醫生建議去做,有咩問題呢?仲有就係佢年紀真係唔細,38歲喇喎,心急都係可以理解,再加上有一個reply真係答得好好,佢隨左話唔覺得kelly有問題之外,仲話個個想有bb既人都想自然成孕,好人好姐點會想做人工受孕,其實做呢個療程,女方要面對好多困難。

係喎,如果有得揀,如果真係可以,其實真係冇人想做人工受孕,發表呢個topic既人,一係就係好憎kelly,一係就係佢好死幸福,想生就有得生,身邊仲要個個朋友都一樣,想生就有得生先會咁講。所有有了解過咩叫「人工受孕」既人都清楚知道冇人會想拎呢件事黎玩囉。點解d時間好似好夾咁既呢?係我就快要做既時候,kelly公佈呢件事,再一次另我覺得要做又點?有咩大不了?最緊要就係我可以擁有自己既bb。不過我真係好想好想多d人知道,人工受孕唔係真係講咁易,唔係肯做就一定得,亦都唔係講咁輕鬆,都係抽卵呀,放返個胚胎入去咁囉。

如果懷胎10月,10個月都會令媽媽對bb有不同既擔心,咁要做人工受孕既媽媽,呢d擔心係要提早50幾日,就由一開始呢個treatment就會擔心,唔知身體會有咩變化,唔知個變化是好是壞,而最恐怖都唔係打針,係放完胎等結果個14日,我見好多媽媽都真係好驚,又好想放鬆自己心情,但係又好怕今次會失敗。做私家人工受孕既人,有d仲受財政帶來既壓力,做私家既錢好多人都會有,不過如果失敗,成舊錢係冇晒,bb又冇,苦又要受,真係好大壓力架。所以好想趁住今次kelly既事,傳媒可以正面d講下做人工受孕對每對夫婦帶來既壓力。同埋衷心祝kelly生對健健康康,得得意意既bb~~~~

Bakery and Restaurant Story

係iphone度玩呢兩個game真係令我廢寢忘餐,成日顧住玩,又要整野食,又要送禮物比人,哇卡卡。
其實玩來玩去都係想儲多d錢去裝修間舖,整到佢靚靚咁,好似開心好多。
玩呀玩,真係玩到痴晒線!!

呢個係我較早前既setting:

因為覺得放得唔夠多枱,所以set到宜家咁:

呢間係我既restaurant:

呢間係我dream restaurant,好靚呀~~

車車の慳錢大計 (第三回)

今次已經係第二個星期一次過買幾日餸,一為慳錢,二為健康,三為冇咁肥。始終出街食飯都唔係長久既方法,好鬼肥,又悶,食來食去都係個d,同埋少數怕長計,晚晚食200都唔係平架喎,不如平時煮多幾餐,開心既時候出去食一餐大餐好過啦。
今星期餐單如下:

22 Jan 11
白汁雞扒意粉
煎豆卜
油麥菜

23 Jan 11
炆牛肋骨
梅菜肉餅煲仔飯
蒸魚 (第一次蒸魚,我居然向魚踏出第一步,好勁呀!!!)
蒜蓉西蘭花

蕃茄薯仔湯

24 Jan 11
炆牛肋骨 (一炆就兩日份量,好抵食 – 抵唔係價錢,係慳左好多功夫,炆多日又好味d,卡卡)
梅菜肉餅煲仔飯 (居然要食冷飯,因為尋日食條魚同飲湯都真係好飽)
蒜蓉生菜 (d菜唔用蒜蓉煮,真係唔知可以點煮囉,卡卡)

25 Jan 11
蠔汁肉碎豆腐 (翻炒上星期既菜,因為一次過買兩盒豆腐平d,又唔可以放得耐,咁咪食多次囉)
煎鴨胸
上湯菜心

南瓜栗子湯

26 Jan 11
炸菜蒸豬肉
照燒汁雞翼
上湯紹菜

今個星期衰到連生果都慳埋,因為我又冇咩生果特別鐘意食,成日都係食蘋果,一買就會買多d,貪可以放得耐呀嘛,呢d就係懶得就懶囉,卡卡~~

時間到

我既生育大計終於都快要正式開始,反而殺到埋身,感覺好似冇之前咁緊張,亦都冇咁負面,唔知係唔係我個d「船到橋頭自然直」既心態啪著左,成個人都好似冇咁down喎,係好事黎既。
1月10醫院約左我今日去拎噴鼻藥,約左8:30,我地都已經7:30出門口揸車出中環,點之我地係8:20先係中環打的上醫院,都唔知點解咁早都會塞車,好煩呀!
去到醫院已經8:45,好鬼驚囉,我要開機send個email扮開工架嘛,咪快快手係canteen online再send mail,然後再去5/F拎藥囉。點知去到5/F,原來係拎藥單去比錢先,由K座又去返S座,要我行來行去真係好鬼驚呀,其實醫院應該唔會見到同事,不過好驚比人知道我唔係o係屋企開工架嘛,行完呢度又要拎返收據去K座,不過K座d姑娘好人好多架喎,比左收據之後,等左都唔知有冇兩分鐘姑娘就叫名,教我用藥同埋講比我知黎緊幾時又要返醫院,今日個姑娘教用噴鼻藥教得好清楚,冇平時個d hard feeling,同埋我又問左佢好多野,佢都答得既仔細。
拎完藥,約好晒之後,我既schedule如下:
30 Jan開始噴鼻,一日4次,要日日同一時間噴,噴到取卵為止(即是要噴around 24-26日啦)
本來醫院suggest時間係0600,1200,1800同1100 (最後一次早少少噴),本來姑娘話如果0600太早,可以改0700,1300,1900同1200,不過我覺得1300同1900噴都有d煩,1300我同同事食緊飯,1900又會等緊/搭緊車喎,咁我諗多兩諗,我會改0700,1200,1800同1200噴囉,都會係一次隔5個鐘,一次隔7個鐘咁,又唔駛咁早起身喎,幾好呀。
好喇,跟住1 Feb老公要交sample,呢樣野唔關我事,純update下佢宜家個status,冇咩特別。下一次我要到醫院既日子係12 Feb,非常好,因為個日係星期六,呢日返去係照超聲波同埋驗血,實則我check黎做咩,我真係唔太知,只係知道呢日佢地會比埋打針藥我,如果個日收唔到電話,我就展開10-12日既打針生涯,每日一支。如果個日驗血唔pass,要噴多一星期鼻先可以開始打針,希望唔好postpone啦。

所有野都如我估計,2月就會放胎架喇(即是我生日附近),如果係咁,上埋我只係中一個bb,咁40 weeks既時候就係老公生日,呢份大禮真係巴閉~
爽爽,你乖乖地呀,你真係要乖,比媽媽做一次就係我肚裡面健康咁生長啦!!
爸爸媽媽同nic哥都好想快d見你呀!!!!

錢錢錢錢

隨住爽爽就快入肚既日子,越發現我係應該有更加多既儲備去迎接佢,越諗就越覺得自己搵得好少,用就好多,真係好鬼作死,計計數先知好恐怖,咁大個人又冇saving,成日以為自己拎到option會好有錢,其實唔係囉,到2012年都唔知會唔會meet到我target升到上$120,我一定要$120先放架,因為我好想拎到我個target amount。
老公久唔久會問我,其實我地係唔係落錯車,以後都上唔返車,我答佢更係答得好+ve啦,我會話當初如果唔落車,我地又搬唔到屋,搬左過黎,個感覺真係好好多,雖然係放棄左好大舊錢,但當其時有邊個會知真係會升到痴晒線呀?如果從心情上去睇呢件事,我覺得搬左係好架,因為舊屋真係同我地好唔夾,又成日鬧交,又成日病,係連nic nic個時都要成日去睇醫生架喎,搬左之後,感情好左,身體好左,好多野都好左,得到既野係無價,冇左既野係有數得計,咁算啦。其實我知道老公好想快d有返層樓,不過宜家真係唔係時候啦,想生bb,我始終都唔想有太多改變,加上當時想搬,根本就係為左將來bb比99幫手睇住工人湊而決定既,如果宜家買樓,買得邊呀?之前都睇唔啱mos既樓,宜家更加唔啱啦,又貴又唔好住,叫我買村屋我又好唔想喎,就算買,我都唔會買宜家個度,咁即是要搬屋啦,唔得唔得。
所以我個target一直都係2012年打後再打算,不過諗多兩諗,又覺得係呢個生仔project上其實好多駛費,單係為身體作好準備,我地兩個已經個個星期去睇中醫,睇足1年架喇,每個月要用4千幾蚊,正正可以cover第日請工人既費用。第二,去做icsi又要2萬,雖然唔係貴,不過都係錢,仲要養下身呢,放胎前後要密少少做針灸,呢d都係錢。好喇,到生個時又點呢?雖然我有9成係會去仁安生,不過諗諗下,係唔係去政府都ok呢,去政府我既選擇係東區/廣華,兩間都係比較好既醫院,不過我好驚冇老公陪我痛既時間,我會唔會發花癲架?如果去私家,就可以比老公一直陪住囉,到底多幾萬蚊比老公陪,係唔係真係值得呢?我連做icsi都捱得到,生仔姐,應該都ok架,真係有d動搖,同埋我又有d驚,唔知有d咩事,係私家度生會貴過expect好多囉。
好喇,因為我想day time放99屋企,night time同weekend自己湊返,咁所有用品都要set up兩份,少數怕長計,樣樣都double都唔少野架喎。
好煩呀好煩呀,點先可以搵多d錢呀?快d升我好唔好呀?我想搵多少少呀!!!

車車の美女廚房

我已經好耐冇煮飯喇,要我指揮就得,落手落腳自己煮好似自從搬左之後都冇10次,點解呢?一來老公鐘意煮,二來我呢d懶得就懶,真係一拍即合架。
老公經過一輪訓練,佢煮野好味左好多,亦都少左煮d古怪組合出黎,終於都聽我話,煮d唔會話好好味,但一定唔會難食既野,我真係好還得神落架喇。呢一輪住家飯,我居然要出手煮兩晚,實驗證明我煮飯真係快好多,煮3餸1湯同老公煮2餸冇湯居然我仲可以快少少,真係好離譜囉。
上個星期,老公終於都買左個砂煲返黎煮煲仔飯,所以由星期六開始就挑起左一條煮飯癮,宜家記起呢個星期食左咩先。

15 Jan 11
臘腸煲仔飯
油麥菜
午餐肉炒蛋

16 Jan 11
窩蛋牛肉煲仔飯
炆叉燒汁排骨
XO醬大蝦翠肉瓜 (呢個好好味)

南瓜栗子湯

17 Jan 11
臘腸+鼓汁排骨煲仔飯
午餐肉生菜(又係d奇怪組合,唔知點解煎好左d午餐肉唔可以就咁上,一定要炒埋係d菜到,好怪!)

隔夜南瓜栗子湯

以上3日都係老公煮,每次都要個半鐘左右,真係人都癲,仲要所有肉都係我‘yip’,幫手一齊prepare材料,唔知點解都可以煮咁耐。
星期二,由於難忍老公煮得慢,加上佢今日放得晏,順理成章我試一試自己可以有幾快

18 Jan 11
粟米肉粒
蒜蓉油麥菜
煎鴨胸

青紅蘿蔔粟米湯

今餐用左1 hr 15 mins,時間上係快過老公,不過可能真係太耐冇煮飯,全部都唔好食囉,wahahaha~

19 Jan 11
蠔油肉碎豆腐 (呢個好好味,因為我加左少少豆乾同少少炸菜,口感好左好多)
黑椒牛小排
蒜蓉西蘭花

黨參湯

今日同尋日用既時間差不多,今日d野就好味好多喇,一來煮緊個時老公已經返到,唔駛拖長黎煮,二來practice左一次之後,控制時間會好左。仲有,今次煲黨參湯終於都唔乾水又出味喇,但係我係差不多用晒d藥材先識煲囉,真係救命,不過咁, 黨參湯我要長期飲,咁宜家煲得好都已經好好架喇,哈哈。總括呢5日煮飯仔,大家都只會感覺到攰,不過唔煮,又係要買外賣,食外賣又冇咩益,又唔係好食得去邊,亦都同我煮既野係一樣咁悶。唉,呢個晚飯問題又再開始喇,初初一齊住,鐘意就煮下,鐘意就出下街食,食到頂唔順就返媽咪屋企,宜家一星期先返一次媽咪度,想食住家飯就一定要自己煮,自己煮又好攰,出街食又好悶,mos既食店比tko少得多,又唔好味,食得落既就只有味千,金滿庭同美心,好厭好厭呀,點算呀????

車車の慳錢大計 (第二回)

話說由天氣凍開始就已經覺得老公唔夠衫著,top又冇咩,褸又冇件暖,叫佢著多件就好似要佢去死咁,所以真係好想買返d厚衫同暖既褸比佢,上個星期行過下collect point,有件羽絨係幾好款,不過佢鐘意既色又冇碼,我覺得冇問題既有碼色佢又唔鐘意,咁是但啦,我諗都係要幫襯返IT旗下既自家品牌架喇。
今日睇完michelle就谷佢去行街啦,地點apm,貪佢有齊5cm同izzue,仲有之前係quicksliver睇中左件褸,又可以順便行埋。第一站izzue,買5件半價,第一個回合揀左4-5件top去試,得兩件啱,所以我又好努力咁係咁同佢揀,咩都迫佢試,最終係揀左5件izzue同一件neighborhood crossover,雖然件crossover係冇任何discount,而且又零舍貴,不過埋單總額除開都係300多d一件,咁ok啦,件件都係sweater,都厚厚地咁。
第二個放血地方 – 5cm,一入去就睇中左一件幾ok既羽絨,仲靚過quicksilver個件喎,咁咪叫老公試下囉,都幾ok呀,sales見我地好似一定會買既樣,好熱情招呼,又話得返last one,主動hold起比我地,仲叫我地去返izzue入分,可以當cash用,咁hold起左之後,我同老公行一行quicksilver睇下邊件褸好睇d,um…咁又真係5cm個件好睇好多既,quicksilver個件再睇返好似好笨咁,所以唔駛諗,去完izzue入分之後就上返5cm繼續揀衫,呢間個promotion係4件6折,呢度d衫唔係好靚,不過就有d薄薄地既長袖可以打下底,襯下衫,係老公好唔情願既情況下迫佢買左兩件,最後一件死揀爛揀是是但但咁買左件恤衫,老實講,我覺得唔靚,不過老公就係會專揀d唔靚既死物(希望佢揀生物係最叻,就係揀左我同nic nic,卡卡),呢度又買左2k,好痴線囉。
好喇,點解買咁多野都係慳錢呢,其實老公一年先買一次衫,除返開成年真係一d都唔多,同埋佢真係有需要,d衫著來著去都係個幾件,好似我虐待佢咁,新年前點都要入返d貨架嘛。至於慳呢,就係慳在我見到佢買咁多野,我居然自己冇買野喎,因為通常我見到佢買,我會好唔抵得咁自己又要揀架嘛,其實係d-mop我有野啱架,不過揀到梅梅臭臭咁都係得個8折,8折完又唔係平,同我買正價日本衫又係差不多囉,咁點解我要買特價野喎。不過以前既我係絕對唔會諗呢d野架嘛,買左先算,今次冇買,真係值得嘉許。
為左減低老公既罪惡感,買完衫之後會連煮5日飯,真係好慳錢架,卡卡~~

車車の慳錢大計 (第一回)

坐言起行,話左要慳就真係要慳,以後可能會少左好多買野post,咁唯有寫下我忍左d咩,好似好醒咁啦,卡卡。
唔知呢個慳錢大計可以實行幾耐,總之制止到自己想買一d明明已經擁有/similar既野時就當一次囉~~

今日放工出左tst修眉,因為今日book得比平時晏,所以之前同老公行下,睇下有冇咩衫可以買比佢,咁睇唔啱喎,到我去左修眉個時佢就自己一個周圍行等我,到我修完眉想join返佢個時,我自己一個行過elysambre,又見到有d疑似好抵既promotion set,今次見到cleansing milk+toner = $399 (有用開toner,一支要$209,唔知cleansing milk要幾多錢),忽然覺得$400唔駛有兩支,好似好抵喎,我宜家用緊個支cleansing milk都要$3xx啦,好想好想買,個sales仲要魔我話宜家買夠$899有scrub送喎。嘩!作死,又好似好抵咁,一包scrub要$159,好似有8折咁喎,更加想買,不過又因為約左老公食飯,咁一來要claim down自己,一來真係趕住會合老公,所以我話我食完飯先再返黎。
點知食完飯,個條好想買野既癮已經冇左,同埋facess已經close喇,真安樂!!!!

點解我會話呢樣係重複既野呢?其實我開始左用佢支toner 2-3 wks左右啦,都覺得好好用,加上價錢ok,我估我會翻兜at least一支,所以見到平平地既時候就會想買定,加上有機會試埋支cleansing milk,又好似幾好咁喎。不過其實cleanser我仲有存貨,宜家用緊amala,仲有半支多d,係日本買左only minerals洗面泡,又有好多粒do organic洗面皂,所以呢,真係好repeat。如果夾硬食夠899就仲浪費,因為之前為左泊車,我已經買左一套mask set(一包scrub,一包moisturing mask),但係我又有一包用左一半左右既scrub喎,即是再買我會有兩包brand new囉,又係得個放字,都唔知幾時會用,所以唔買好明智,哇卡卡~

心情 on my day 1

到左最後一次機會既揭盅日子,結果都係同過往12個月一樣,冇驚喜,m照黎,係有d失望,不過冇上一次咁失望喎,可能上次癲過,所以宜家好似冇事?定係我真係可以接受得到?
我都唔知,只係知道我不斷同自己講,死就死啦,殺到埋黎一定得架,有咩冇試過姐,唔駛驚喎,應該要對自己有信心,只要著床,只要健康成長就得架喇。
好啦,不停咁remind自己原來都幾ok,at least今次冇喊過,好勇敢咁fax左張紙去QM,等佢地打黎約我去拎藥。姑娘打黎個時其實係有問必答,態度都幾好,希望你地個個都對我好好,我唔會再有hard feeling啦。終於都約左21 Jan拎藥,問左姑娘,我既day 21會開始噴鼻,而我自己記得係講座度聽過,噴鼻大約14日,照超聲波(唔記得照黎做咩),如果ok就開始打針,打針要打10-14日,如果又ok,就可以取卵,等細胞分裂,各樣都ok就可以放胎,咁就禮成,其他就靠我身體喇。
又再不停同自己講,28日姐,28日後就放爽爽入我度,再等多14日就知道爽爽係唔係確實存在,好快姐好快姐,日子點都係會一日一日咁講架啦,我ok架喎,我得架喎!!!

Okok,自我麻醉既日子開始喇,我好怕d懶係鼓勵性既說話,我需要一d好實在既開解,希望老公做得到,希望我自己都做得到,如果順利,我諗我真係要送一份大禮比自己,因為我實在太叻女喇。

Btw,計計日子,如果一切順利,好大機會係我生日正日/前後一兩日放胎,呢份生日禮物真係大得恐怖,另外如果唔係twins,11月7日o個個星期會係40週,都有機會做6條1 bb,勁有趣!
仲有,如果真係所有野都預期進行,係中晒我中學時所講既野,我講過想32歲生bb,因為我媽32歲生我,我覺得自己好叻,如果我都係32歲生b,個b都會好叻。第二,我覺得天蠍座既人好聰明好獨當一面,所以我都想bb係天蠍座,根據我以上既推斷,全部中晒!!!痴左線~~~~

電影

自從聖誕放假冇鬼聊聊去左join個租碟course之後,我地差不多個個星期都租戲睇,仲要狗屎垃圾都睇一餐,好似完全唔駛錢咁,其實都要17蚊一套架,不過好就好在,租完就還,唔駛留佢係屋企,哈哈

記低下睇左咩先,只作紀錄,冇特別意思

On 25-27 Dec:
血聘 – ok好睇
秋田犬八千 – ok touching
志明與春嬌 – 好好睇喎,好似好現實咁,不過老公一d都唔欣賞 (自己購入,唔係租架)

On 1-2 Jan:
心魔 – 悶到做完都唔係好似佢做完,睇返演員訪問,真係完全feel唔到套戲原來好多層次
生命中最後一個月花嫁 – 好好好悶,又唔覺得好touching
綫人 – 好睇,我覺得好睇過証人喎

On 8-9 Jan:
槍王之王 – 好睇喎,吳彥祖真係喪爆型,古天樂拍左埋去都冇得fight,仲覺得古天樂黑得好奇怪,個咀又好怪
Iron man 2 – 完全冇睇,一d興趣都冇,老公睇緊個時,我係度行來行去扮執野
兩公婆今晚玩大左 – 好好笑,典型搞笑西片,夠白痴,唔駛用腦

心情@4 Jan 2011

要面對ivf既日子一日一日接近,上個月以為已經要面對,情緒失控,當收到QM電話,話要下個月先開始,覺得好開心,覺得自己仲有一次機會。
好喇,今日已經係day 26,唔知點解好想記得宜家既心情,其實今日我算幾開心,因為眼前只有兩條路,一係驗到今個月可以自然bingo,一係就真係開始ivf(實際係start icsi),好似爽爽越來越近我,希望呢個心情可以keep住,唔想再失控。

我知道一開始左,我應該會覺得好難受,其實我好怕打針會打到個人脹晒,見d人話打完針個肚會痛到訓唔到,唔知呀,我估肉體上既辛苦我應該可以應乎,我最怕係我個心魔唔走,好怕自己又再一次不停問點解,唔想面對,其實我仲好怕唔知點同公司請sl去醫院,唯有見步行步。

雖然我唔係一個真係好樂天既人,不過我都唔想自己既心情長期處於一個唔開心同擔心既狀態,希望我真係可以面對得到!