所謂「百日宴」

由未生到生左,其實我一直都冇諗過要大事慶祝滿月/百日,就算要搞,我都只不過係想兩家人食餐飯。宜家地點又唔到我揀,日子又比人話事,總之咩都比人安排好晒,我家人唔會到,我唔會理,只係出席當食餐飯,最後一張相都冇影,我不停暗我兩隻魔怪訓覺,都費時理咁多,其實有d親戚我幾鐘意,佢地幾識做既,不過我一見到數字人就唔開心,都費時理咁多,情願比人話我唔識大體好過辛苦自己去做個好似識大體既新抱。

小插曲:99冇啦啦同我講,要我比爽爽62抱,超~你自己同個仔講啦,同我講把鬼呀,我面口更黑囉。

嬌姨探風爽

開工日,本來今日約左放工去見輔導,點知嬌姨10點幾打比我話想黎,本來佢見我要返工都話第日先,不過我lunch又打去同佢傾電話,佢話都係黎喎,所以我冇去見輔導,一放工就即刻返屋企喇,6:30前返到屋企,真係快到呢。


一返到屋企,又見返嬌姨,真係好有以前個感覺,好似我坐完月去街返屋企一樣,唔會太心掛掛風爽,因有嬌姨係度,一返入屋好熱鬧。佢攬住風爽都唔捨得放手,佢地兩個又好似認得嬌姨咁,玩到好開心,今日仲留低左嬌姨食飯傾計,真係好開心呀!!嬌姨,風爽成日都好掛住你,你多d黎探佢地啦,其實我同atik都掛住你架,哈哈!!

返工了

前8後12的假期終於完結,第一日返工,因為要比工人有個過渡期,所以今明兩天都叫左老公放假,所以呢兩日返工都有人車返工放工,返工可以訓晏d,放工可以6:30前返到屋企,所以唔太難過,加上老公會影相比我睇,都可以減少我思家之苦。返工冇冇聊聊,主要都係做返個self assessment同埋叫傾下2012年有咩「大計」咁囉,其實我2012年既大計係每日準時放工,次次wfh成功,最好有得比我連埋d紅假放,放盡d大假,等我多d時間留係屋企就最好。

風爽兩個月大喇

(今日係2013/2/5)已經完全唔記得當日發生既事,只記得我地出去左海港城行街街,影左三眼仔聖誕樹

我的2011

2011係我暫時人生中最開心亦係最悲哀既一年,開心,當然係我ivf順利,成功懷有雙胞胎,一直都順順利利,連老細都好體諒我,比我提早放sick leave,就係因為早左放假,所以我先可以保住風爽過左36週先出世,如果一直要返工,我諗我應該會早產,因懷孕後期已經又蛋白尿又高血壓。風爽亦都好乖,知道我想佢地係111出世,所以111凌晨已經開始肚痛,雖然痛到入院又唔係好痛,以為今次又係得個桔時,下午兩三點又開始痛,四點幾姑娘就幫我駁機,一直到生前先離開,最後風爽係2011年11月1日晚上9時11分同13分出世,個下既感動係好不由自主,聽到佢地喊,個滴眼淚係由心滴出黎,我既仔女終於都出世,終於都見面喇。本來風爽既出世係令我無比開心,但粗心大意,沒理我感受既老公,令我情緒失控,我活係黑暗中,每次見到老公都會唔開心,我連見到99打電話比我,都會覺得抖唔到氣,我已經同老公講我好唔開心,叫佢留意我,但佢冇關心我,不停鬧我,同我鬧交,我從來冇試過咁心淡,冇試過連續大半個月都係一冇人見到我就喊,好彩我仲未想死,更好彩係我見親風爽都好開心,冇諗過傷害佢地,再更好彩,我搵到個好陪月同好工人,佢地真係分擔左我好多工作,比我有更多時間休息。風爽真係我最大既成就,你地健康快樂就係對我最大既回報,媽媽要你地開心,所以媽媽係2012一定會解決情緒上既問題。