帶風爽食魚生

今日一早帶左nic入tko bathing先,跟住我地就出去見城食魚生,其實我一直都唔敢食,主要係怕有箘,冇理由食d唔係最美味既魚生而搞出事架,不過見自己都就生,黎緊呢兩星期我都話要食好野,好好迎接風爽出世,最後分別問人,都係話去食見城,就咁gogogo啦~~

見城個mgr好細心,見到我大肚,一坐低就叫人比一杯水同一杯茶我地,我揀左delux魚生飯,d生野好好味好新鮮,但可惜佢應該係太正宗,個飯底有d薑粒,我就唔係咁鐘意囉,最後叫多一客帶子,呢粒帶子真係勁好味,令呢餐飯得到滿分呀。

似乎爽爽好鐘意食魚生,平時我食野,佢地都會郁架喇,不過不嬲都覺得風郁得勁d,今次係爽好開心,係咁R我個肚,呢個女原來鐘意食貴野,真識貨,卡卡。

食完飯行返去拎車,其實都已經令我好攰喇,行死我。但我又點知原來今日食飯,已經係風爽係肚入面最後一餐好野呀,總之拼埋條命,食多餐同行下街添啦。

肚痛被迫入院

今日個肚陰陰痛左成日,老公返到黎係咁叫我入院,但我真係覺得冇事,係陰陰痛之嘛,我死唔入佢又鬧我,又講比99知,99又講比媽咪知,好煩呀。我都只係聽媽咪話所以入院,唔代表我覺得佢地一個傳一個咁迫我係啱囉。入到醫院check心跳咪又係冇事囉,不過又因為我d高血壓同蛋白尿,又要我留院,好悶呀!


今次入院撞見nanny,都算有個人傾下計開心下啦,佢就好啦,佢見家鄉,111就開刀喇,我個期係118呀,風爽,可唔可以一樣111出世呀?

生前最後一次Dr Yu產檢

今日係生前最後一次見Dr Yu喇,仲以為老公可以一齊,點知佢趕唔切黎,我已經入左去lu。今日我遲到,所以Dr Yu都好似好趕咁,又可能我唔係搵佢生,佢又唔算係敷衍,但真係比之前有唔同左,我問親佢咩,佢都覺得冇問題,咁又真係唔係d咩大問題既,但我話我只係36週咋喎,仲駛唔駛見多你一次呀?佢又話唔駛,又話我下星期就生得架喇,生完先再見,咁是但啦。


今日睇唔清楚兩隻野個樣呀,除左度size,我都唔知照左d咩,仲有就係驗箘囉。出到黎老公黎到,同佢等左一陣就比錢走人,今日風已經6lbs+,爽就都過左5 lbs啦,希望呢個磅數準啦。

風爽,準備見你地真身喇!

租奶泵

今日老公補假,可以陪我去街街,好野!今日梳洗完就去西貢拎郵包,分別有能恩奶粉同埋我支桃紅MJ香水,卡卡。拎完野去左松記食車仔麵,第日抱住風爽,應該冇咩機會食架喇,我例牌食到一身都係,老公又係例牌揀左d唔好食既野,哈哈。


食完lunch,去左藍田諗住幫襯一間好多人讚既bra shop買產後bra,點知今日day off喎,冇緣,咁就算把喇。再之後就出發去tammy度租奶泵,好耐冇見佢喇,大家都仲係好好傾,不過佢要開舖,其實我都有少少阻住佢呀,咁我揀左少少野同問左個泵點用就走喇,搞搞下,都搞到黃昏先走,返屋企食晚飯,咁又過左一日喇。

疑似穿水,在K9的三日兩夜

返到屋企,見到底底真係有撻水積喎,咁點呢?好驚喎,又唔知穿水係點,魔魔又叫我入院check下穩陣,咁我就打左電話比老公,佢去醫院等我,我就拎埋野打的過醫院。都已經唔係第一次入院,其實都唔算好驚住醫院,係怕真係穿水姐,咁醫院都好快就同我檢查,又照u/s,風爽一切正常,冇穿水,係我血壓高,蛋白尿又高左先麻煩,我都預左要留院,但冇諗過一留就要留三日兩夜,仲要不停留vv,真係好悶呀,唯一可以做,就係不停whatsapp。


事後:99同豬講我可能係漏尿喎,我聽到之後勁嬲囉,有冇可能漏尿都唔知呀,都唔同,痴痴地,佢自己蠢就唔好當我都一樣啦,最癲係我老公覺得99講得啱,都低能架。

工人殺到

其實星期日,ivy已經話工人到左香港,仲問我出唔出去接佢,我以為可以遲d先接,點知佢尋晚打比我,問我點解仲未去接,所以今日佢一早帶工人去mos。突然間,我好冇心理準備,唔知點面對工人,所以叫埋99一齊接佢,仲有就係我未ready佢去我屋企,諗住叫99帶佢返佢屋企先,點知99第一又要遲去車站,第二又話要出去沙田,問我留工人自己一個係屋企得唔得,咁人地第一日黎,更係唔得啦,突然間,又要我為帶工人返自己屋企而苦惱,我都唔知叫佢做咩好,屋企亂到9彩。


食完早餐,我咪同工人打的返屋企囉,返到屋企,我又要為食lunch而煩惱,平時我是但煮罐湯/通粉食就算,今日唯有叫pizza啦,原來冇豬肉既pizza係極少,好鬼難揀。今日教左佢幫我抹地,抹梳化,食完飯我真係好眼訓,咁教左佢抹廁所用咩,我就訓覺喇,真係好辛苦,好彩nic都接受到佢,佢又接受到nic,大家和平共處,我就訓下先。

訓醒左,佢清潔晒就去99度食飯,我都真係好踏出第一步自己一個去99度食飯架喇,其實我覺得勁悶同唔知做咩好囉,d野又唔好味,又要搵野黎講,又唔自在,我覺得今日好攰,好似不停要我用腦,冇relax過咁,當係99度走時,一企起身,我就覺得有d水滲出黎咁,死喇,唔知係唔係穿水呢?不過我都好冷靜照打的返屋企,費時同6299講。

開始洗衫

風爽應該仲有唔夠一個月就出世喇,見天氣晴朗,開始幫佢地洗衫,我呢d冇聊人,連洗衫都要分類,晾衫又要排得靚靚咁晾,其實為風爽洗下衫,唔知點解都已經好開心,見到d bb衫就開心架喇,每日洗一機,應該一星期就洗晒全部架喇。


風爽,媽咪好期待你地出世呀!!!

海港城shopping (Lola)

老公放假,我通常都好想扭去街,但其實自己又唔行得耐喎,今日出左去尖咀行下,真係得個行字,冇特別野想買,但見到lola出左新香水,所以閃電式購買,宜家d香水越來越貴,我就快唔儲架喇,成7-800一支,都痴q線架。

QM檢查 + lunch + michelle + 返QM拎藥

33wk6d QM檢查,今日又係見到mimi seto,我覺得佢算幾好人同埋講野好清楚,所以次次見到佢都會好開心,唯一一樣唔好就係,我次次問佢可唔可以約開刀,佢都話言之尚早,咁就算啦,我都知政府係有程序既,今日mimi仲開埋d「補品」比我,但我費時係醫院等啦,所以落返中環同老公lunch,再睇埋michelle先上返去拎藥。


Lunch完自己一個慢慢行過去michelle到,michelle次次見到我,都話我個肚又大左,其實我又唔係好覺喎,係落左同埋我個人攰左囉,宜家只係把脈同食藥,所以次次都睇得好快。搞掂晒又行返去搭小巴上QM拎藥,原來可以三日內拎藥,早知比張單老公,佢lunch幫我拎,我唔駛上上落落咁多次啦,我好攰架,宜家體力真係好差囉。

喪買AD+

今日出去mos本來係想買定少少ad+做存貨,因為用來用去,都真係覺得佢既洗面,沖涼,洗頭同hand cream係好好用,所以趁未生前要買定少少。點知今日去到,見到買滿$500有一張$50 coupon下次用,咁下次買夠$500,有又一張,由於係shop已經冇左vip 9折,所以見到watson’s有呢個promotion覺得好開心,於是博命買,係我買得好開心之際,豬叫左6299過黎一齊喎,我好怕比佢地見到我買咩,亦好怕99係咁問我呢d咩野黎,個d咩野黎,最終99真係問我,呢d美白黎架?好好用架?咩野黎架?我又唔識喎,真係激死,好彩既,就係佢黎個時我已經係比緊錢,如果我揀緊,佢一定仲多野問。我買定左好多hand cream呀,因為諗住必要時係比風爽搽面用,呢隻hand cream無論質地同成份都實在太好喇,卡卡。

九月之星生日會

今次gathering去左間樓上café,我覺得幾好喎,因為中午時間都冇其他人,又不停有熱野食,不過我大住個肚,完全唔想郁,成坐山咁坐係度唔郁,卡卡。小朋友食完野就係咁跑來跑去,好瘋癲,心心b有少少融入到,但一一好似當迦南三寶係傻咁,想玩又好似怕鬼左佢地咁,搞笑。


Gathering完左我又要去一田行街,因為bb展就快完,其實我仲好想買多d body wash同清潔用品,宜家bb展真係平囉,我由一田行去新城市已經好攰,仲要等位,本來老公叫我坐starbuck等佢,唔知點解仲有一張枱就到我地,老公叫左我過去,我都仲要企好耐先有得坐,個肚好重架,要人等咁耐,嬲死呀。入到去,其實我都唔食生野,所以係咁叫蛋食,燒玉子呀,蒸蛋呀,仲有熟蝦都可以既,老公又話飽,唔駛食咁多,其實我地真係叫左唔多野,唔知點解都要食3xx,宜家d野真係咩都貴,好普通食一餐都要過300,以前普普通通食係200左右架咋。食飽飽又過返一田拎車,我諗多兩諗,都係反兜買多少少野等我夠存貨用到下一次bb展,哈哈。

好緊張

太耐喇,已經唔記得自己緊張d咩,可能係指自己血壓高掛,真係唔記得左。