腰骨痛

腰骨近呢幾日都痛呀,不過今朝起身真係覺得好痛,痛到好似郁唔到咁,所以唔返工啦。媽咪一早打比我唔知講咩,順口講佢知我腰骨痛,佢叫我搽下油,涼涼地試下會唔會好d喎。咁我油就冇搽喇,搽左for leg個支tomtom mama,涼涼地果然係有用,我見舒服返少少就即刻再訓,訓醒又痛痛地,我咪又搽囉,搽得幾次真係鬆左好多,呢支野果然有relax作用,老公就叫我唔好成日搽,都唔知可唔可以搽腰同背脊,不過我覺得呢支野係比孕婦用,又係organic,都應該冇事啦,唔理喇,我之後都keep住日日搽,好好多呀。
不過我個抽筋問題始終都未解決到,晚晚咁抽,好辛苦姐。

再接再厲+一田shopping

今日又去飲糖水喇,好有陰影,我唔驚飲,係好驚又嘔,唔想再去多一次啦,真係好早起身,好眼訓呀。今日我已經跟足kitman比我既tips,用盡10分鐘慢慢飲個杯糖水,今日比上星期早半個鐘去,原來一早杯糖水係暖架,檸味淡左好多,其實比上次難飲,不過我都仲頂得順慢慢飲。不過我一飲完就覺得有野頂住喉嚨,其實唔舒服架,不過kitman叫我飲完唔好坐,要慢慢行下,冇事先坐低睇下雜誌,所以我出左lift口行囉,一路行一路有氣ur上黎,ur完會舒服d,不過都仲係頂頂地。直至老公夠鐘出車,我先至坐上車休息下,不過都仲係唔多掂咁,好想嘔呀。
出完車之後我會一直係car park,因為我有風舒服d,但因為有少少急,又有少少唔多舒服,我就話要上返去toilet先,好彩我古古惑惑去左4/F toilet,入面冇人,不過我一入去嗅到廁所味終於都忍唔住嘔左少少出黎,不過真係好少啦,比上次少兩倍有多啦,去埋toilet照下鏡,我要make sure自己唔可以有一個嘔樣比老公知,因為我怕佢知要我講比姑娘聽,其實我真係嘔左好少架咋,不過我一出黎,佢都問我點解去咁耐,我唯有話件衫好麻煩要整好耐,好彩過骨,哇卡卡。之後就去返car park行下,又係車坐下,但殘忍既老公居然買早餐坐我隔離食,不過算啦,我知佢餓,但佢呢個行為真係好殘忍,我好肚餓呀!!!!
坐下又行下,時間都算過得快,出多一次車就可以上返5/F等抽血,可能我早到啦,抽血都冇咩人,今日好彩一次就抽到血,唔駛篤來篤去。止埋血之後,終於可以走喇,好野!
老公今日比我去一田行街街呀,所以佢買左個孖賓蛋糕比我係車食就直接去沙田。去到沙田麻麻地迫人啦,不過比我想像中好,行到去一田時,人係多左,不過都仲可以行既,我當然只會去睇bb野啦,其實冇咩目的,最想都係睇下我鐘意左好耐個件細菌人同毒菌妹妹毛巾衫特價,點知又冇喎。但都ok,kids wear都有7折,買左兩套衫比風風,一套衫,一件top同一條褲仔比爽爽(其實襯埋都係兩套呀,哈哈),呢d野同yen價差不多,不過唔駛比運費都抵既。揀完衫去返上次買包被個counter但唔見上次款水玉包被,反而揀左樣野比心心,又揀左紗巾,開緊單個時我問下有冇個塊包被啦,佢話收埋左喎,其實價錢同上次一樣之嘛,都冇平,不過我想買比風風呀,所以就算佢叫我遲d去拎,我都照比錢。去到cashier,見到對面就係sinomax,老公個枕頭要買過,見到有款做今日特價,2xxx減到6xx,仲要6xx係買一送一,咁真係好抵,因為平時訓開個隻減價都要4xx,比老公拎上手,佢覺得ok就叫人開單,拎左單啱啱到我地比錢,勁慳時間。比完錢拎埋枕頭之後,人越來越多,有d恐怖喇,老公拖住我戰鬥格咁離開一田,跟住去返市中心個邊lunch,開開心心悠悠閒閒咁食lunch,又買左野,好開心呀!
食完飯放左野落車就同老公去左行細細舊舊個d商場仔,其實係想睇下老公會唔會睇中iphone case姐,點知行成都冇睇啱,一d都唔靚,咁就算把啦。3點左右離開沙田返屋企訓覺,開心死我,最鐘意行街買野,仲要返到屋企都仲可以訓覺,哈哈。
風風:

爽爽:

大家一齊用:

Shop@ Wing On & 見見鬆弛媽

尋日行完sogo,老公見sogo冇wing on個set平靚正煲set,已經係咁話要去wing on買,今日嘔完糖水就去左上環食早餐,食完就行去wing on shopping。第一件事我都係要去睇下baby野架,不過冇咩好買,張aprica high chair係平過南豐少少,不過又唔想咁快買,所以放棄啦,點知比我地撞到QM個net fd喎,佢買和尚袍,不過我又覺得唔係特別平,唔買。
之後落左B1睇煲,老公明明係一定會買,我都唔知佢企係度左諗右諗d咩,又話睇睇先,我見越來越多人就問佢到底買唔買架?鐘意就買啦,佢都唔正面答我,咁我又問係唔係真係好鐘意呀,係唔係會用呀?咁佢答我係,我就即刻叫人開單比我比錢走人。麻鬼煩煩,鐘意又覺得有用,又之前已經諗好晒,好心就買啦,嘥時間,買完佢又鬼死咁開心架喎,真係要佢唔順。
行返去拎車個時,老公以為抄牌,所以自己行先啦,我叫佢如果未落簿咪同人講老婆大緊肚要去洗手間,通容下啦,點知都唔係抄牌。亦因為今日嘔糖水失左預算,鬆弛媽未放工,所以我地係車度hea,我直頭訓左一陣,卡卡。
等到夠鐘就落cwb會合鬆弛媽, 鬆弛媽第一次見我大左肚個樣,佢好似仲開心過我,我身邊既朋友真係好興奮知我有風風爽爽囉,尤其佢係契媽啦,更開心。開開心心食左一餐飯,之後又去左買貼紙,行左去zara睇衫仔,又估你唔到zara d衫都幾ok喎,幾似gap,第日可以買,不過我想特價先買囉,哈哈。玩左一個上晝,我已經好攰好攰,要返屋企覺覺lu。

嘔糖水

今朝去飲相傳好難飲既糖水,之前問過大家姐,佢叫我唔好留係個口腔咁耐,因為係甜到爆喎。今日程序係先係reception拎籌,等叫number入去抽血,再拎糖水咁。等抽血其實好快呀,幾個幾個人咁入去,不過今日抽血好唔順呀,拮左入左手之後,出左一陣血就唔出,個姨姨仲話試下郁少少,嘩,好痛架,大佬!真係出唔到血,唯有拮右手啦,其實我好怕右手架,因為右手出唔到血次數多過左手,好彩都抽到,今日要抽3支血,唔知點解次次都要抽我幾支血,救命!
係我拮緊右手個時老公好緊張「裝」我,因為佢話見同我一齊入d人都出晒黎,我都未出,所以佢擔心喎,咁我抽完出黎返同佢講因為一隻手出唔到血要再拮,所以耐左,佢即刻話自己黑住我喎,不過是但啦,都抽左,其實個姨姨都唔粗魯,我覺得唔關任何人事,係我唔好彩姐。坐定定之後就打開杯糖水睇,嘩!傻架,成杯外賣凍檸茶杯滿晒,冇冰,但其實飲落真係冇野架,又好重鮮檸味,幾ok架,因為好驚留係個口嘛,咁快快隊晒一杯,仲同老公講其實好味喎,仲影左張相。冇幾耐,老公話要去toilet,我就係咁篤電話,仲有講有笑,不過篤篤下係覺得有d頭暈,係咁死頂等老公返黎,老公返到黎話要出車,又話唔同我去,帶我覺得自己有d想暈,所以死跟。

點知搭緊lift去停車場,一出lift就ur一下好勁出黎,係好似想嘔咁,我好驚囉,唔嘔得架喎,嘔完又要再飲,老公仲係咁問我野,問我覺得點呀?唔舒服呀?想嘔呀?都話唔好行架啦,更係架lift chok親啦,etc。我通通都唔問答佢,我只係好辛苦咁叫佢唔好講野,之後佢再講野,我就一直用手擋住佢,跟佢上到車,佢話未駛咁快出車,叫我坐定休息下,又再問問題,又話頭先你都冇事架,仲識講笑,點解冇端端會咁唔舒服架?????跟住坐左唔夠1分鐘,我就打開車門狂嘔出去,哇卡卡,其實唔chok唔辛苦,真係要嘔就成啖水嘔出黎,嘔完一次不突止,仲黎多一野,我估我嘔左兩大杯出黎囉,一嘔完就舒服晒,嘔緊個時老公好緊張,係咁問我點呀?點呀?老婆有冇事呀?慣左佢呢d性格,真係覺得好好笑,點解佢明知我講唔到野,佢仲可以咁多野問既呢?哈哈!
嘔完之後出車,諗住上去同姑娘講再飲多一杯啦,點知上到去同姑娘講,講完正想拎多一杯糖水飲個時,姑娘叫住我話唔係今日再飲,係要第二日再飲呀。下????? 冇陰公,早知唔講我嘔啦,即刻好失望呀!!!
最終約左我下星期六8:30再飲呀,又係晨吉咁早,好眼訓呀!!!

最後得到呢張紙~~~

遊sogo

今日係sogo thankful week第一日,小仙女打算今日去,所以我死跟,哇卡卡(好難得老公比我去架)。我全日都好期待放工,其實唔知自己有咩好買,不過就係好想去趁下囉。
當我去到灣仔時,老公仲未走喎,我唯有自己一個慢慢行過去cwb啦,順便買埋包一陣一路行一路食。入到sogo係門口等小仙女,係完全睇唔到佢係邊囉,幾鬼恐怖呀,打左幾個電話先可以相認。跟住我地就直上7/F睇寝室用品,我地兩條友仔係咁睇rapee床單,小仙女心水款式又冇佢size,我又覺得同jusco價一樣,都唔駛專登買,不過為左等老公上黎,諗諗下早d買又可以早d車bb set,咁反正一樣係95折,我都係買一套啦,就係咁,一路等一路食包,買左今日第一樣戰利品。之後一齊碌去睇童裝,一心想買托腹帶點知係得010選擇,咁所以冇買,於是又睇下有冇d咩靚靚地日本衫仔,好鐘意個兩件叮噹叮嚀得個9折,又唔係好想買。跟住見到一檔d衫都幾靚,不過夾衣又唔平,所以唔想睇。點知兜左個圈唔見左小仙女,咁又去搵佢啦,佢原來係我行開搵佢個時去左我覺得靚個檔野揀緊,我見80cm以上既衫都幾平,掛係度d夾衣又唔特價喎,好彩我多口話點解夾衣唔特價,原來佢唔係件件都有貼$99喎,掛響度個堆都係$99一件,於是我雙眼發光咁係咁揀喇,卡卡。啱碼既衫,好多都係女仔款,又係買比爽爽多,揀來揀去,有一件係啱風風架喇,不過70cm,不過度來度去都係同80cm差少少,算啦,我估都ok,我見拎上手好似大件過我平時買個d,咁70cm都應該啱掛,最後揀左4件爽爽,1件風風,臨比錢前搵到條$100牛仔褲,又係爽爽。不過等緊比錢個時,見到有張被都幾抵,$199幾軟幾大張,所以又買多兩張比佢地兩個。
之後再去睇大人衫都冇咩好睇,連香水都冇興趣睇呀,行到8點幾好攰喇要搵野食,過左world trade食dinner,食完就打道回府,好開心呀,最鐘意就係買到一手都係野咁返屋企,卡卡。

熱烈歡迎爽爽&風風

唔知點解見到dr yu零舍開心,可能因為佢好人啦,又唔會唔出聲,同埋就算之前兩個星期都有見大細少少,個心都仲係好想好想知道佢地性別呀。今次產檢,居然聽到一個同名同姓既人,仲要係啱啱係我前面睇dr yu,第一次叫名時係叫佢,我又有應,第二次姑娘叫我名時,佢自己都有應,其實佢啱啱先睇完,點解仲會應呢?不過呢個人好怪,佢睇完出黎既時候,唔知係佢眼真係有問題,定佢啤得我好行,佢真係轉晒頭咁啤住我架,不過是但啦,我黎睇醫生之嘛,唔理得咁多啦。
今日等左大半個鐘就有得見dr yu,真係開心。入到房,我當然要問一問oscar結果既問題,dr yu都唔suggest我去抽羊水,佢覺得頸皮厚左其實好多原因,同埋我兩個bb都只係厚左少少姐,只要做結構個時睇清楚個心就應該冇問題,總之佢叫我宜家放心啦,咁我就放心囉,但佢就suggest我政府同私家都做一次結構,確保安全。
講左一輪,係時候去照下大細少少喇,雖然近呢兩個星期都係見過佢地,不過都係比dr yu照好似開心好多,同埋今日有機會見到仔定女嘛,卡卡。
一開始,dr yu都係度下長度,頭仔,肚仔同腳骨,跟住我就問佢見唔見到仔定女,佢指住細少少某個部位話睇仔女就係呢度喇,跟住就唔出聲喎,我好期待架嘛,咁我咪忍唔住問佢即是點,佢又問返我睇到咩喎,我唔理咁多,其實我都唔識睇,我咩都話係女囉,佢答我: 女?咁清楚都話女,你睇清楚d啦,我再睇就話唔識睇,咁唔係女即是仔啦,但dr yu好堅持話咁清楚都睇唔到,其實我真係唔識睇,佢係咁指住,我咪覺得好似係有條野咁囉,都唔肯定架,你係醫生,你話係仔我就信你啦。但個心開始有d驚,因為驚大少少都係仔,因為我兩星期前立左一眼細少少,根據點同線既定義,我明明見到係線架嘛。照大少少個時,唔知點解dr yu睇得好快喎,好快就話呢個應該係女,唔知點解就算聽到應該係女我都已經好似confirm佢係女咁,唔理啦,醫生咁保守都話應該係咯,咁咪即是真係女囉,哇卡卡。
好野,聽到個一刻真係好好好開心,真係估唔到自己有仔有女架,我成日都覺得自己唔會生仔,只會生女,真係一次過咩都有晒,個心係好開心,出返大廳,唔理好迫,隔離好多人,我都即刻打比老公叫佢估下,唔知點解佢又好醒喎,我叫佢估仔定女,佢估每樣一隻,我同左佢一齊7年喇,當佢聽到我答係之後,佢係即刻笑出黎話好開心,真係好開心,我終於都感受到佢既開心係表達左出黎,我同佢講個時唔知點解有少少眼水,如果今次係同佢一次見大細少少,我估我地真係會喊出黎囉,哈哈。
開開心心同魔魔集團/大家姐講,真係好開心好開心,全城雀躍。風風爽爽,原來你地真係風風爽爽,哇哈哈!!!!!

贈品滿載的一天

今日係我第一次去qm產檢,已經好早出左門口,不過一直都好塞車,塞到9點先去到中環,所以打的上qm啦,冇耐仲落大雨添呀,個死司機好地地又唔停有蓋個邊,係都要停另一邊,雖然都唔會好濕身,不過明明一滴雨都唔會有,最衰就係呢個司機,好想鬧人呀!
上到5/F見到好多人,不過好好彩,又唔駛等好耐喎,首先係拎左我個file先,跟住去度高磅重,然後排隊量血壓同埋驗尿,跟住比左張form我填,填完比返工作人員再等姑娘叫名。等左大概半個鐘,姑娘已經叫我,呢個姑娘好nice喎,解釋比我知每次去都要做既程序我知,又問左我d資料,又解釋左某一d小冊子我知,最好就係解答左我會唔會抽羊水既問題,搞完一輪,佢叫我出去等見醫生。
仲以為等醫生要好耐,原來都唔係喎,又係等左唔駛半個鐘又有得見,不過醫生叫得好細聲,我好聽到自己個名,但就聽唔到邊間房,聽左兩次都聽唔到囉,卡卡。到第三次,醫生都應該有d嬲,所以大聲左,我就即刻入左房喇,今日係女醫生,不過好彩都幾nice,我有野聽唔明再問佢都唔會厭我煩,不過就係冇得照bb唔好囉,醫生話會寫紙比我驗血,飲糖水,book下一次qm/贊育時間同埋拎藥喎,佢話葉酸佢開幾多就食幾多,唔係食到3個月就夠,咁是但啦。
出左去之後又係等左半個鐘左右,姑娘又叫我,比晒d紙我,話比我知邊d要拎出reception,邊d係拎藥既,邊d係驗血。咁我就拎住d紙比reception先,之後就等驗血,其實蠢左啦,我應該咩都唔好做住,放低藥紙先。好彩我見驗完血,贊育仲未覆返,我就落去放低藥紙再上返5/F等啦,等又等,藥又未有得拎,贊育又未覆,係醫院坐左個幾鐘先有藥,原來醫生開左好多藥比我,有鈣片,維他命同葉酸,全部都係16w份量,所以有好多藥拎走,仲要唔駛錢,好抵囉。拎完藥咁啱贊育打比我,叫我下晝去睇喎,佢就唔fax返去qm,我直接上去就得,所以我去返中環同老公lunch完先去贊育。
去到贊育比我既感覺係 – 舊,舊到lift lobby好似冇冷氣咁,指示又唔多清楚,好似入到去見到有人既地方都涼既,不過好暗囉,未去過醫院係咁暗。又係好好彩,交低左qm比我張紙之後,啱啱開始拎個iphone出黎玩就比人叫名,已經可以入去照喇喎,我仲以為普通照下u/s,原來又幫我度頸皮喎,我仲以為我話左私家做左oscar,佢地唔會再理我添。呢個姑娘好nice,講野好溫柔,同埋係咁叫我淑雯,醫生ok,唔會衰又唔會好好咁,唔知點解差一星期之嘛,今日醫生都冇request我要飲水,要膀胱漲,一黎就照得喇喎。同上星期一樣,細少少好快就度到,唔知點解大少少明明好定啦,又睇得好清楚,醫生都係唔照落去架喎,真係唔多明,最後兩個頸皮都比上星期厚,我問醫生咁算唔算厚時,呢個醫生比冼世源好,佢話唔可以就咁講厚唔厚,要計埋數先得架喎,個心忽然覺得好舒服囉,上次真係比呢個Dr Sin嚇死,我真係好驚架。係贊育檢查,最衰就係唔幫人抹返個肚,成肚gel,又唔比紙巾,我又以為蓋住我塊布唔用得喎,最後自己入toilet抹囉,激死!上晝係qm聽完心跳,個姨姨有幫我抹架。
一出贊育門口,好似bb會form湧埋黎,當你企定定填緊,就會有第二張第三張form放低,連帶放埋小禮物比我,雖然全部都係一d唔值錢既野,比如口水肩,手套,尿片sample,不過感覺好開心,因為當我填到手都軟埋時,見到放係我面前個堆野好大堆,好好笑,最後我夾硬塞晒落袋,個袋係漲晒囉。Check up左成日真係好攰,本來仲想周街行下,不過真係好辛苦,最後落返中環就打道回府囉。返到屋企再睇下自己個袋,真係覺得好搞笑,成袋野都係唔駛錢既,卡卡。

Dr Yu來電

等左幾日,竹太話今日翹康應該會打比我,一返工就開始等,不過原來佢地唔會咁早打黎啦,所以又唔心急喎。
等到放工都未打黎,我仲以為要過埋個假先會知結果,點知係搭緊巴士個時,有個怪電話打比我,仲要搵我全名,下一句佢話佢係余啟文醫生,真係嚇死我,因為我一直都覺得冇事就係姑娘打黎,有事先係醫生打架嘛,我第一句就問dr yu,點呀?有結果呀?你親自打比我,我好驚呀!點知佢又同我講笑,佢話余醫生唔會嚇人架,更係冇事先打比你架嘛,咁佢話驗血結果好好,一個係1:1700,一個係1:1080,係頸皮真係厚左少少,不過叫我唔駛擔心,做結構就得。
唉~~個心即刻鬆晒,亦都即刻打比老公等佢唔駛擔心,其實佢應該比我仲擔心,因為我又喊又唔開心,佢都要顧我感受。
開開心心今晚同michelle一齊dinner,其實佢真係好叻好謙虛,佢先係一個真真正正叻既人,唔似公司個d白痴仔,以為自己拎住個1st horner就係好叻好醒,咩人都要聽佢講,佢講既就係啱,痴痴地。

Oscar Checking

今日做oscar超級唔順利,首先去到話要等8個,我已經覺得好不妙,15 mins一個都要等兩個鐘呀,咁好彩今日有老公陪,有個真人發聲,時間都仲算好過,直到入去見Dr Sin時,惡夢就開始。
Dr Sin同Dr Yu好唔同,佢講野唔會望人,Dr Yu次次都會同我有eye contact,但呢個冇,不過佢都有禮貌既,問完一輪野就開始照bb啦。一開始我都知道佢度緊bb size,聽下心跳咁,仲有度頭仔size,之後我就唔知佢想度咩,睇來睇去都唔知佢搞咩,最後結論佢話我膀胱唔夠漲,照唔到,叫我飲多d水喎,咁姑娘就話如果我覺得再急d個時就話比佢知,等佢再安排再照。
比人踢返出黎個時已經係7點,老公去左7仔買支水比我隊,隊完等左半個鐘就話比姑娘知ok,其實我由頭砌到尾都急,都唔知幾時先係膀胱漲。再入去個時,Dr Sin都係唔望人,叫我直接入去照啦,咁好快就訓低又比佢睇,佢又話我都係一樣,問我有冇飲水,我話我飲左好多,已經好辛苦啦,又搞左一輪,佢話落唔到手,叫返我出去等喎,呢個時候已經係7:45,好鬼夜啦,好彩clinic仲有好多比佢趕出黎既人,哈哈。
其實我已經一肚水,好辛苦,不過好想快d照到,我又再飲多半支水,坐左係度呆晒,個肚好漲呀,又急喎。再等多30-45 mins,姑娘再一次叫我入去,今次好順利照到細少少,但Dr Sin話佢頸皮厚左少少喎,我問佢真係點,佢又話要睇埋驗血先知,不過係厚左少少喎。大少少照左好耐,其實我同老公都睇到好多次係照得好清楚啦,都唔知點解佢唔落手照,又係咁震我個肚,我自己就唔係咁鐘意囉,最後照完佢話呢個踩界,我又問佢即是點,佢又答我要睇左report先知。
妖,其實我驚到好想喊囉,點呀?你又要同我講厚左,又唔同我講會有原因令到厚左,叫我等report,咁你不如唔好講啦。照完都已經8:45,我已經攰到死,想唔返媽咪度食飯,媽咪又要我返,我已經好唔開心。講晒成件事比媽咪知時,我都冇咩野,係冇心情,不過一出媽咪門口,摸住個肚,我就喊左出黎喇,真係好驚呀,大細少少係我bb黎架,我要佢地健康出世呀,媽媽好努力先可以有佢地,佢地唔可以咁嚇我架,我唔想失去佢地是但一個呀!所以攬住老公癲左咁喊。返到屋企又喊,終於攰得滯就訓左喇。

大細少少,爸爸媽媽真係好愛好珍惜你地,你地乖乖地,健健康康出黎見我地好唔好?

新款Gel Nail @ 3 May

今日係假期最後一日,開開心心出去做下gel 甲,今日有時間,所以可以整個冇咁simple既款,所以揀左呢款帶粉紅既花花款,好春天,好開心嘛~~