最後一個廿字頭既生日

終於都過左黑色28歲喇,到左最後一個廿字頭既生日,究竟係咩心情呢?
一早起身,因為覺得老公從來都冇諗清楚同plan好今日要同我去邊,搞到我嬲到發癲
我一早講左我一定要去disney拎生日pin架啦,佢又話一係唱K一係去disney,你plan得好d就唔會只係可以去一個地方啦,衰人
今年生日過得極平淡,因為今年真係好窮,搞舖頭搞到我地冇晒蚊蚊,正常既我,係老公生日時,就算蚊蚊唔係多,都為佢安排左一個有少少既surprise既dinner,but我頭豬係絕對唔識做呢d野囉,唔會預先買生日禮物比我,我都叫做預左,真係冇諗過,我攬住左個chip & dale cushion好耐,佢都冇買比我,唉~~~真係今時唔同往日,昔日要風得風既小公主,宜家同乞兒冇分別,好慘,好慘,希望出年我可以買一份我極愛既禮物比自己啦(請注意:我只係希望自己可以買比自己,其實心裡頭,我已經對老公完全失望,我已經唔再想佢會主動買野比我,苦~~)
去完disney,唯一覺得好開心既,就係終於都去左我好想試下既mr steak晚飯,灣仔間mr steak,我之前同同事同老公都食過lunch,係覺得好好味,有一次去過cwb個間食dinner,覺得麻麻,所以始終都好想試下係灣仔食dinner,果然係正過cwb好多呀,大家都係buffet,不過灣仔真係正好多,叫佢先會拎出黎,而且樣樣都好好味呀,一次過食晒我最鐘意既鵝肝同牛扒,真係正正正,回味無窮呀!!!
今年生日快樂嗎?我希望出年會更好,希望以後都會比今年更好,希望兩年後既生日會有爽爽陪我,希望nic nic可以同我一齊過每一個happy birthday,希望nic house可以發揚光大,希望…希望…我既能力會一年比一年多同大。

奇想

奇想 - 我冇時冇刻都可以諗到好多出黎架,例如:中左mark six要點洗啦,又或者舖頭生意突然好好,我就可以去日本參加人地d exhibition啦,又或者係nic nic變左一個真人啦,真係有冇可能實現既野,我都會諗一大餐,我唔係因為好多時間,就算以前返工好忙,我都會諗架,我覺得唔天馬行空下,個腦會壞架,哈哈
今期我又諗咩呢?其實自從有左nic house之後,莫過於都係想要爽爽,尤其當d人一定要搵粉紅色比個囡時,我真係好想自己有個囡,著晒d好型既衫比你地班人睇,同埋邊個話細路唔可以型,一定要可愛架?邊個話女仔一定要著裙唔著褲架?都唔知係d人太冇品味,定係我d品型太與別不同,宜家呢個年代既小朋友真係可以好型好靚架,同埋我最鐘意就係mix and match啦,都唔知點解d人下下都要問有冇set賣,自己襯仲靚啦
不過要爽爽呢個念頭,老公要我達標先可以諗喎,呢樣野對我黎講真係好難,首先要有50萬cash係手,跟住就係家庭總收入要有5-6萬囉,真係難到呢?我諗40過後都未必fulfill得到,哈哈。老公開出呢個條件,係因為佢話我咩都要好,買野比個女仲唔係下下買最好最貴咩,咁就一定要我有好多錢係手先比我生,um...說真的,我真係會咩都要好架,不過都會有個譜既,好似佢問我,如果要買架bb車,你會買幾多錢,我答佢二千幾啦,我一定要買chicco架,因為我家姐都係買呢個牌子,就算唔一樣,我都要一樣咁穩陣,你唔可以叫我買幾百蚊,得幾枝鐵枝個d,一陣推推下成架散左你就知死,跟住佢又回敬我一句,佢d同事就係話chicco貴,唔駛買咁貴喎,用得個幾年,買貴野好嘥喎,咁又真係唔係咁講架喎,2xxx用到3歲,一年都係幾百,有幾貴呀,買千鬆d既,可能用年半就要換,咪又係嘥氣?佢又忽然好似覺得我好有道理,又冇再同我係呢個話題上再講,我唔知我呢d係唔係歪理啦,總之我唔一定要用最top既野,不過一定要過得到我自己囉,我諗係父母既,都會想比最好自己既子女架啦,基本上我覺得如果有爽爽既出現,肥豬鍚佢會比我鍚佢多10倍囉,佢話佢一定唔會做打仔囡o個個喎,佢就真係識揀喇,做好人梗係好啦,我就要做醜人,我真係唔得佢死呀,噓~~
呢個奇想我已經諗左幾個月架喇,唔知唔知幾時先會成真呢?希望呢一日唔會離我太遠,嘻嘻