Ivf可怕嗎?

由知道自己要做ivf先可以有bb開始,其實我好好好抗拒呢件事,又成日都問點解要係我,又好怕做個時唔知有咩side effect,總之一諗起就會喊,連去醫院登記我都會喊,成日都好怕好驚。
之前每個月都好希望自己可以自然成孕,次次見到m黎都會好失望,當要做ivf日子越近,我係有3-4個月一見到m黎就會喊,個時個d唔知係壓力,定係真係驚得咁緊要。我仲記得本來醫院叫我12月m到時要打電話去預約登記,我個留言應該係似死老豆咁,好唔開心,聲又衰。一收到醫院話lab會放新年假,要2月先可以做,所以1月m到先再打去,嘩,我幾鬼開心呀。
就係經過呢一個月既起伏,係拎藥前既m到時,我居然好平靜,冇再喊喎。當開始噴鼻時,我仲話其實都冇咩野呀,又唔會好唔舒服,係要成日睇住d時間做人就煩d囉,不過so far都ok,不過係噴鼻期間都係喪喊過一次,因為就快要揀打針藥,我都唔知打咩針好,又唔知對個效果有咩影響喎,總之就係咩都唔知,好煩好亂好唔開心,心情係好低落,會冇端端好唔開心,個感覺好得人驚架!
到決定左要咩針,我就安落喇,仲要拎出去搵醫生打,其實就係只有打針感覺囉,痛又唔係好痛,side effect冇咩,係打到第7-8支針左右,個肚開始有d谷有d漲,但都可以接受既。唔好既經驗就係臨急臨忙搵左個private dr照下progress,佢極之負面,我只係打左針3日就叫我唔好灰心,唔好傷心,痴痴地,如果我打3日針就已經大到抽得,呢d叫反應太大囉,呢個醫生真係好衰囉,不過見完佢,打完比老公鬧完一輪,我又冇事喇喎。直到返qm再照,個醫生係10問9唔應,仲要串我,不過fine,我唔比私家症既錢,係要受下氣,總之你生生性性同我monitor得好就得啦。
其實未開始打針前,我又喊過一獲勁,今次真係好冇理,係我自己意志唔夠強,容易比人影響,好彩宜家老公好醒,佢真係完完全全幫到我。
最後,我一共打左11支谷卵針,第11日夜晚11:00返qm打夜針,呢支針係傳說中最痛既,不過我打個時真係覺得唔痛,但行左幾步出去搵返老公個時,開始覺得有d痺,返到屋企直頭覺得個針位附近都好似腫腫痛痛咁,第二日起身條腰好酸(不過可能係我好懶,所以覺得周身痛),最後我連做手術前最後一日返工都唔返,卡卡。
距離打夜針36小時後就要抽卵,其實抽完卵,真係唔覺得抽卵好恐怖,係等個時最恐怖,晨吉咁早要人0700到醫院,其實要等到1100先可以做,又要一早放我入病房,又冇老公陪,我真係覺得好慘。係呢個時候,我好需要我隻豬呀,我好掛住佢,個電話又冇端端冇晒d電咁,唔夠膽係咁打比佢,其實打比佢都冇用,都唔知講咩,都唔想比人聽到。係落左藥係手之後,我成隻手都好凍,又因為開始驚,又冇左個老公係身邊,我又成日個凍晒,明明好眼訓又訓唔到,個種無助比抽卵苦10倍。
抽卵其實係痛架,不過又唔會痛到唔可以忍受囉,抽完之後可能一直都冇食野,又食唔落,個人好暈都幾辛苦,只係飲下水,雖然探病時間有一個鐘,但老公好似都陪唔到我一個鐘咁,好快就走左,我唔捨得佢呀,佢走左之後,我就一直訓下又坐下咁,等到3點幾4點醫生先黎問我有冇頭暈/想嘔,我全部都答冇,冇同冇,終於都放我走,我即刻打比老公叫佢入黎接我囉,起身個時先見到原來我有流血,又冇人同我講過會流血喎,我咪問姑娘有冇問題囉,姑娘好明顯覺得我係大驚小怪,我問佢借m巾,佢仲比左條厚過平時3塊m巾咁厚既古老m巾比我,真係第一次見,我連面頭個紗袋都唔知應唔應拆,哈哈。
冇氣冇力咁離開醫院,老公買左個蛋糕同朱古力奶比我上車食,食完好似好d啦,不過都仲係好暈呀,恰恰下返到屋企,老公問我仲想唔想食野,我話想,佢就煮左個蝦子麵比我,食完之後先真真正正舒服返,原來我真係太餓喇。
第二日出去見michelle,之後去埋買蛋糕比自己同nic nic,之後再返屋企休息。
放胎當日好少少,可以8點前到,今日心情本來好靚,因為可以帶bb返屋企喇嘛,不過當聽到姑娘同我講,我抽左14粒卵,有11粒受精,7粒分裂(去到呢一刻,我都仲覺得幾好呀,如我所願有一半用得返),點知最後係同我講,靚既得返3個,我即刻呆晒,不過都仲扮緊野,當冇事發生,辦好手續之後,姑娘叫我地9:20先返去,所以我地去比左錢先啦,比完錢之後我終於都喊左出黎喇,點解得返3個架?我有14粒,本來成績好好架?點解會咁架?喊喊喊,喊到入左病房都仲喊緊,連姑娘都安慰我。好彩今日可以同其他同一日放胎既人一齊等,大家傾下傾下,我終於都冇事喇,老公係出面send sms比我,我好感動架。
放胎既時候同做婦科檢查一樣,唔會覺得痛,係有d唔自在,不過可以睇住一點白色野入左個子宮,個感覺都幾開心架。放完胎休息左一個鐘就離開醫院,終於都唔駛返黎咁密喇。

成個ivf要做既野已經做晒,之後著床就要靠自己喇,以上全部野,打針/抽卵/放胎,其實都真係唔會好辛苦,最痛苦係個心理關口,我唔知我勁喊過3次算正常定多定少,不過有唔開心就係要發洩架啦,係呢段時間,我好憎人同我講道理,咩道理我冇聽過喎,荷爾蒙係會影響我地既情緒,人人都唔同,點解要硬將你既思想放去我度呀?好憎呢d人,好好彩,呢段時間有老公既support,仲好好彩識到一班同樣行呢條路既人,最好係大家都好正面,好努力,無論成功與否,我地今次都賺左同老公既感情同賺左大家既友誼。

去到有結果呢一刻,我真係覺得我得到比付出多好多好多,其實做ivf真係唔可怕,唔知邊個有緣人會睇到我呢篇感受,如果你正正將會接受ivf treatment,你真係唔駛驚,最緊要保持心境開朗,放鬆整個人,唔好心急,當唔開心個時就同老公講,等老公同你分擔,唔好自己一個受晒,都唔好胡思亂想,總之祝各位需要輔助生育既人,想有b就有b,想要孖就有孖。

與兩隻小魔怪見面

今日qm約左我1400,不過因為遲左出門口,去到ifc又要買野拎free parking喎,所以啱啱1401去到qm car park,不過轉到上訪客位都1406喇,等緊lift個陣,姑娘已經追蹤我,問我去到邊,其實都係遲左10分鐘之嘛,不過因為等唔到lift,要慢慢行樓梯,又要行去第二度比左錢先,咁上到5/F已經係1415,哈哈,老公話呢個係我地正常時間。
等既時候因為見返同一日放胎另外兩個媽媽,所以一路等都ok,唔覺耐,但因為我係最後一個,所以到佢地都照完,好開心咁走左之後,得返我一個,人就開始有d緊張。入到去係一個後生女醫生,其實我真係唔鐘意婦科女醫生,見親都有hard feeling,包括以前公司既body check,比個女醫生好似強姦我咁,第二次遇見既女醫生,係負面胡海寧,第三次係qm既醫生仔,照陰超照到我喊,今次係第四次,本來佢冇整痛我,又都幾好禮貌,不過佢除左一放入去照個時話:「宜家有兩個胎囊,即是孖胎」之後,佢係一直都冇講過野,照來照去都好似睇唔到野咁,我又唔知咩叫閃閃,不過好肯定佢係搵唔到,我個心都已經好驚架喇,佢仲要話叫多個醫生入黎睇,個一刻,我個心跳得好快好快,係狂跳,隻手凍晒,老公話佢腳軟同埋想喊喎。
好彩見返亞白頭醫生,都總算見過佢,比佢檢查過,知佢有料到既,佢照左兩照就話我子宮生得高,係難照d,都有清楚解釋我知,同一時間,佢已經搵到大少少既心跳喇,仲要係好清楚架,不過細少少真係好高,所以睇唔清楚,好朦,不過有兩個位我同醫生同老公都係幾清楚見到有跳跳下,不過就好朦囉,醫生有話o個個應該係心跳,不過唔好估估下,叫我下星期再去照過,期間我問左幾次醫生,係唔係真係生得太高所以睇唔清楚?佢答我係,我又問係唔係下星期再大d,所以可以睇清楚d,佢都答我係,雖然心係安左,不過冇一個肯定既答案,我都係唔知點咁,好擔心囉。不過好消息係大少少同細少少都仲係差0.02cm,今日6w2d bb size係: 大少少0.46cm,細少少係0.44cm。

睇返huggies bb會,6w既bb size reference係4mm,咁同醫生講既一樣,size係ok架,你地加油要乖,要一齊長大,爸爸媽媽同nic哥等你地出世架!

*暫時唔叫兩隻小魔怪做風風爽爽喇,我懷疑佢地唔知係唔係兩個風風/兩個爽爽,所以唔高興就嚇我,唔比醫生照心跳,咁未知性別之前都係叫佢地做大少少同細少少先啦。係u/s見到上面o個個係細少少,下面o個個就係大少少喇,卡卡。

Markus 3歲生日party

不經不覺又一年喇,上年既3分鐘事件好似係好近既事,原來都已經一年喇。今年markus生日會係麥當當,其實我覺得都幾好呀,因為有人serve野食,又有人切蛋糕,d野又熱喎,主人家都可以坐定定同朋友傾下計呀。因為今次好好彩,我負責拎禮物比markus,所以markus以為所有浮誇玩具都係我送比佢既,真係開心死我,哈哈。
開完party,老公去左cwb剪髮,我就同魔魔集團去放血,其實都冇新野玩,都係睇返我地hold既野,原來hold得都真係會要晒,我今次連試都唔試,見個樣似啱著就買,因為宜家真係冇咩氣力玩咁多野,加上老公叫我一定要坐,咁是但啦,唔啱著/唔好睇先換囉,今日買左好多好多野,痴左線,其實同我個個月去係一樣囉,下次都係連ka lam既相都睇少d,卡卡。
今日好大矇,冇帶銀包出街,買野要竹太幫我比,連買支水飲下都要心心借octopus比我,真係好醜,好似個細路同亞媽出街咁,哈哈。
玩完一輪其實都6點幾喇,我地約左7點食飯,係竹太屋企坐左一陣又落去panda度dinner,今日同埋奸商食飯,都ok多野講喎,不過我又係一到9點幾就呆晒,因為真係好眼訓呀,今日返到屋企搞左一陣呢呢路路就訓覺喇。

Another shock again

今晚新聞老公見到我亞姨出現,一定唔係好野啦,真係估唔到會有咁多唔好既野發生係亞姨身上,佢條命真係好苦,我都為佢幾難過,不過冇咩影響我,我都只不過係亂左一晚,第二日都冇晒事lu,希望亞姨快d收拾到心情,唔好太過傷心。

Hello to my sweeties

今日係我第一次產檢,其實從來都冇諗過可以咁快見Dr Yu架。今日係5w3d,我都預左冇特別野可以睇,最多都係睇到一個定兩個,同埋志在比老公都見下Dr Yu,睇下佢o唔ok,如果佢ok,我就confirm佢架喇。
約左4:10,3:55上到診所,又要磅重,真係唔開心呀,不過居然比抽卵個日輕左0.4kg喎,簡直係奇蹟呀!等左一個鐘多d,人越來越多,我由唔係好急等到好急,所以去左toilet先啦,去完返黎先位都冇得坐,好彩飲左兩杯水,企左一陣就到我喇。
好開心原來Dr Yu仲有我之前係tko睇佢既record,咁我唔需要再解釋我個background佢知喇,咁傾左幾句就開始照u/s,今日真係好醜,唔知係唔係o係慣qm做陰超,仲以為今日都係,點知姑娘唔駛我除褲就叫我訓上床,只係叫我拉底d條褲,救命呀,比人見到我用橡筋cool住粒鈕,真係好醜,好樣衰~
一照個時,Dr Yu話我卵巢都幾漲喎,可能之前抽唔清,不過我又唔記得咁佢咁會點喎。跟住Dr Yu問我放左幾多個胎,雪左幾多個,我未答佢囉,答完之後佢話:咦?咁我個胎囊既?唔係放左一個咩?我又重複我放左兩個呀,咁佢仲要話,係喎,真係兩個喎,佢仲叫我自己睇,我話我都唔知睇,你唔好呃我呀,係唔係真係兩個架?佢話係囉,不過我好開心叫左一聲好野之後,佢又話好唔好野一陣先再講,咁我叫我起返身出去再傾,之後佢就講左一堆我唔係好聽得明既野喇,其實我估大致佢想叫我唔好太快開心,要睇埋心跳先穩陣d,咁so far我同老公都覺得佢ok呀,所以我估都幾firm會搵佢生架喇,決定得好快,哈哈。

*今日5w3d胎囊size: 大少少係1.14cm,細少少係1.12cm

Shocking Day

今日有個好壞好壞既消息,令我好唔開心,好不安,但又唔知自己可以做咩,但求無論結果係點,都一定要身體健康,身心都快d好返。
我成個下晝都冇做過野,真係好想快d返屋企大覺訓,咩都唔諗。

Nic Nic散散步

今日老公終於都比我同nic出去散下步,不過我今日冇拖過佢,又龜速行路,都唔知點解會行到咁攰,真係好辛苦,仲要第二朝個肚扯到痛醒,真係嚇鬼死我,好彩完全冇分泌,如果唔係,我會仲驚囉。今日好大霧,天氣都幾差,nic nic都好似行得好辛苦,其實中途我有坐底休息下,不過都係唔得,原來我宜家連散步耐d都唔得,睇怕都係繼續食完就訓,訓完就食把啦。風風爽爽,唔該你地兩個乖d,唔好成日嚇我,你地要健康出世,健康成長呀!!

Belated Bday Gathering with 魔魔集團

今日係魔魔集團為我同心心搞既遲來的生日gathering,因為我同心心既生日日子附近我都真係唔可以亂出街,所以約到咁遲,但都好開心啦,新年之後都冇見過面喇。
本來唔想遲到架,不過去到佐敦好塞車,最後豬宅係最遲先到。我今日主要以麵包食飽,因為salad唔食得,風乾火腿唔食得,意粉又得返好少,所以叫老公切個牛角包,佢食入面d ham,我食個包,再之後我同姐姐再叫左兩個意粉,咁食埋意粉就飽晒喇。今日markus佢地玩得好開心,我真係好鐘意佢粗聲粗氣叫狄狄,真係好搞笑,又拖住左abby一齊跳,好cute囉。
今日切蛋糕個時,派左markus做代表,佢真係以為自己生日咁,好搞笑,一直都含羞搭搭咁,卡卡。
返到屋企先拆大家送比我既gift,真係驚喜萬分,好鐘意你地專登揀既面盤老底囉,哈哈。

有時諗諗下,魔魔集團既組成真係好難得,好難得一堆完全唔識既人,因為結婚而相識,宜家又成日一家大細出黎gathering,睇住大家一個一個咁有bb,生bb,呢d友情係好難得,我地一定要keep住呀!我好想廿幾年後,到呢d bb結婚個時開一張魔魔集團既枱比我坐架,卡卡!!!

向上環出發

Michelle真係好好人呀,唔知係唔係因為知道我不嬲都係睇上晝,而今個星期六佢上晝又唔係診所,所以去左佢屋企睇呀。本來老公係準時去到michelle新屋附近,不過比架對頭車嚇嚇下,轉左入條小路就好似一條不歸路咁,要兜去西環再落返中環先可以上返上環,足足兜左20分鐘有多,痴痴地。
上到michelle屋企好光猛好舒服呀,一個人住真係好好架。我一見到佢套sofa就覺得我對cushion好襯啦,哇卡卡,實在太好喇。上佢屋企好relax,咩都可以傾下,連把脈都好似脈耐左咁,今次我兩隻手既脈都好左,不過我不嬲左手都係唔錯,佢話我再強左d,而右手呢,個脾終於都摸到少少,我覺得好開心喎,michelle都話係好事,因為我胎氣夠先會咁喎,咁希望兩隻手既脈都一直一直好落去啦。
今日我終於都迫埋老公再睇返michelle啦,佢話唔睇一排好似好冇精神咁,我諗住叫佢隔一個星期,一係一個月睇返一次,keep一keep住,如果一個月一次都唔係好貴姐,咁可能佢心理上又好d,身體上都應該會keep得好左既。

Go Shopping

好野,今日係check到+ve以黎,第一次shopping呀,所以好鬼開心,不過可惜今日落住毛毛雨,令人好唔舒服呀!
搭巴士出到灣仔警署,老公已經係度等緊我,感覺真係好幸福,因為除左返工,老公冇時冇刻都會照顧我,好開心架。我地兩個就慢慢行去cwb,中途經過dog one life,更係入去買下野比仔仔啦,搬左既dog one life細左好多,好似冇咩好買咁,咁只係買左一d零食比nic同bob,再買左兩舊骨骨比nic玩,咁又用左400幾個大洋,佢地d野都幾貴喎,其實我都唔係揀左好多之嘛。
行完呢度就殺左去franc franc,今日出街既目的係要買野比michelle,一來賀下佢新屋入伙,二來真係好多謝佢一直陪我地行呢條路,佢做既比一個醫生多好多好多,佢真係好照顧我地兩個既感受,好多謝佢呀!揀來揀去,都係行行地揀左兩個cushion比佢,老公話用黎墊下都幾好,咁我都估michelle未咁快買cushion,所以揀左個好似麻色base color,有少少桃紅圖案點綴既cushion比佢。
買完野其實我已經好攰,就咁上左樓上既とん吉食吉烈野,又食日本野呀,真係唔怕死咁架,哈哈。

食完野其實都未夠10點,但係我已經筋疲力竭,所以要打道回府,不過行一陣街,又唔係買野比自己都可以好開心呀,所以我成日都比人話我係「殺街保長」囉,hehe~

返QM

今日晨吉咁早返QM驗孕,唔知點解又好鬼勤力唔話sick leave,去完醫院仲要轉來轉去返mega box,其實我係極度眼訓囉,唔知點解我今日要咁勤力返工。
今日好開心,除左可以確定一下自己個result,仲知道另外面個同一日放胎媽媽都得左喇,3個放,3個都得晒,真係好好呀,我地放胎個日一定係一個好日子,卡卡。
原來當醫生又一次同我講「恭喜晒」時,都仲係會好好好開心,不過因為bb太細,照唔到,所以約左兩星期後返去照心跳,今次唔可以朝早去喇,因為約左2pm,老公就可以off half day。

爽爽風風,爸爸媽媽下星期二會帶你地去見dr yu,希望你地清清楚楚比醫生見到係一個定兩個啦。下下個星期一就睇閃閃喇,記得要閃比爸爸媽媽睇呀,卡卡~~~

Bingo後第一次見michelle

其實我真係誤解左michelle,佢真係以為我好緊張,所以先叫我一直check到返QM,其實我check左3次都好confirm啦,唔駛再check喇。
Michelle係第一個好大聲講「恭喜你」既人,我又開心到想喊,哈哈。佢係醫生,講恭喜我冇問題姐,今日連michelle都覺得老公開心到合唔埋個咀,其實我咪又係一樣,卡卡。
老公宜家鍚到我濃,平時佢會車我係昭隆街對面落,我自己過一條馬路,然後佢去ifc泊車,不過今日我話去左泊車先會太遲,佢堅持唔放低我先,佢泊左架車係街市隔離,請願有機會比人抄牌,都一直陪住我去睇醫生,唔比我自己一個行,哈哈。女皇生活,萬千寵愛在一身,我要好好享受呀!!!

悲哀的一天

今日係我冇左wfh後第一次返既星期五,本來causal wear都幾開心既,不過lunch完之後就知道日本大地震,仲要好嚴重,未睇到相之前,我都仲覺得日本人ok既,佢地處理呢d事好快好團結,唔駛驚啦。到差不多放工個時望下d報導,真係好驚,原來真係xyz咁嚴重,個心好唔安落呀,希望所有日本人都安全渡過呢個艱苦時間,希望佢地快d收復,回復繁榮。
放工個時,去下fb睇下d人點講地震啦,點知見到有個記者舊同學係fb話今日係咩鬼日子,陳慧琳失去孖b,對於我呢個啱啱驗到孕既人黎講,真係好驚架,一來為左佢,我個心真係一沉,佢一定好痛心,二來係我start ivf個時,佢啱啱宣佈自己有左孖b,我入院抽卵個日佢宣佈係孖女,咁啱我check到有左既同時,佢流產左,令我幾擔心架。
雖然我知道成孕後,自然成孕同人工受孕既bb流產機會係差不多,不過佢個case同我太似,我真係好怕,我即刻個心同孖b講,你地要乖,痴住媽咪個肚一直健康成長,直至安全出世。爽爽風風,你地知道架,你地知道爸爸媽媽為左你地真係付出左好多,你地都要對爸爸媽媽好d呀,知唔知道呀?

負能量

我真係好唔明點解有d人全身都係負能量,諗野一定係要諗唔好,要諗點反擊,我真係覺得同呢d人做朋友好辛苦呀!!!
話說係呢間公司,我都唔多可以傾到計既朋友,宜家有兩個,有一個好好人,咩都冇所謂,佢都話自己係亞信,有一個唔係唔好人,不過太鐘意錢,又鐘意諗埋一邊,同佢講野有時好辛苦同埋好嘥氣,比如佢自己病又驚比人誤會,又要諗一輪先夠膽sl,未講之前又怕人地會難為佢,其實最終冇人難為佢囉。我同佢講親d野,佢一定會嚇我架喎,好似今日同佢講,我放完產假一定要拎core leave,我真係唔放心個bb太細就比奶奶同工人,咁跟多兩個星期都好呀,不過我知我會撞正正我個line mgr婚假+core leave,咁其實唔批我既機會係有,我都有諗過。
但係我真係好大條理由話工人未到香港,屋企冇人可以照顧,所以我一定要放假黎做理由。仲有生仔,結婚呢d係大事,唔會唔比姐。如果佢真係唔比我core leave,我直頭想apply no pay leave添呀,佢又話佢結婚個時都想放,不過唔批,喂,你結婚個時連放左兩個core leave,都差不多一個月,人地都冇難為你啦,你仲想拎多一個月no pay,人地更係唔批啦,同埋有咩理由去apply呢?我真係唔明
我個時完全唔同,我講咩佢都叫我小心d,又話死肥野好cheap,咩都唔比,講真,佢可以點唔比呢?如果我話我屋企真係未有人照顧到,咁我返唔到工,佢可以點呀?死要我放工,留低兩個兩個月大bb係屋企比nic nic呀?同事又話死肥野會叫我自己諗掂去,咁我會叫死肥野幫我諗掂去囉,佢唔結婚唔生仔,唔代表結婚生仔唔重要囉,其實我唔覺死肥野係呢d時候真係咁衰。
最後我係嬲到叫個同事唔好再嚇我,我唔覺得係一個問題,再講再講,我只會越講越嬲,媽咪叫過我唔好勞氣架。

心靈感應

其實踏入第二個星期,比第一個星期緊張,因為知道著唔著到床都已成定局,宜家只可以係小心保護小生命,如果之前係著唔到床,點小心都冇用。
今日好心血來潮問下wrinkie有左係唔係同m好似,佢答我係,佢覺得比m更痛,有時會拮拮地咁,就係呢小小既對話,令我覺得:係架喇,今日check啦。
其實我一直都唔想咁快check架,因為好驚驗唔到,驚餐飽,比我幻想多幾日自己係有左仲好啦。不過今日真係有感應,所以放工去左買棒棒,其實我屋企有支clearblue,不過唔知點解唔想用佢喎,所以去買左一支曼仔同一盒兩支裝既watson’s。
返到屋企二話不說就去vv,睇住條線走出黎真係好開心呀,一見到條線,我已經出去搵老公,叫佢一齊睇喇,個刻真係好開心,棒棒大大話話我都玩過10支8支,呢支係第一支見到有兩條線既棒棒,好鬼開心呢,我仲問老公我有冇眼花呀?因為初初係朦朦地架。不過過左幾分鐘,我再入toilet睇,原來都唔係朦朦地喎,有50%深色架,咁都幾肯定掛。
我成晚都笑到入唔埋個口,望望下老公同佢講好開心,我又喊左出黎喎,我第一次係純開心而喊出黎囉,呢個感覺好神奇,好開心架。
跟住食完dinner,打埋比媽咪同佢講,佢開心到問我係唔係用「驗尿棒」黎驗囉,笑死我!

如是者,本來我想過多幾日先再驗多次,不過第二日michelle又話其實我第二日都可以用第二個brand再驗,所以第二晚我用clearblue,拿,真係好彩我呢支唔係第一日用,個條線真係淺到爆,我真係好懷疑自己係眼花。所以第三日,我用晨早第一v去試埋曼仔,今日已經係兩條線一樣色喇,斷估都唔會錯喇掛。不過星期五晚我有d誤解左michelle個msg,所以我星期六又再用多一次watson’s驗,得晒,好似盒面個支咁,深色到爆,爽爽風風痴實左我喇,好開心呀~~~~~~~

返工了

今日返工好順利呀,早左出門口,老公車到我去車站,唔駛行,又搭到公司shuttle bus,所以好順利返到屋企。返到公司出乎意料之外係有人關心我,問我好返未,不過冇人追問,實在太好喇。
安安落落渡過左回歸既第一天,總算順利。

女皇生活預演

呢個星期係未知結果前既女皇生活預演,基本上一般著床時間會發生係放胎後5-7日,所以呢一個星期將會係我成個孕期第一個check point。本來我只係請假請到星期二,星期三就要返工,不過我真係冇氣冇力,行多幾步都覺得好辛苦,我連出去行下supermarket都會氣喘,真係好weak呀!所以反正可以放假,不如放埋今個星期啦。

星期一出左去針灸,我同michelle講我覺得好攰好辛苦,又好似成日想暈想暈咁,佢叫老公放張櫈仔係浴缸,有咩事坐一坐先,同埋唔好lock門,有事老公入黎救我。其實我估我唔會成個訓低既,不過會好冇力,都應該都可以夠力行到上床訓,hehe~
比michelle針完好似氣力係好返d,老公唔駛趕住返工,佢就陪我食lunch之後去巴士站搭車。不過搭到返mos個時真係好攰好辛苦,又好似冇晒氣咁喇,唔知幾時先可以恢復原氣呢?

一直都係屋企訓下食下睇下電視,其實都真係好鬼開心,最好就係想訓就訓,唔知係我體力未恢復定係塞藥令我好眼訓,總之個人係好訓得啦,每日訓到自己醒,整少少野食,睇一陣電視又可以再訓,夜晚老公返黎就煮飯我食,做晒d家務,我根本就係坐係度享福,哈哈。

星期四,第二次睇michelle,今次夾唔啱lunch hour,老公陪唔到我,咁自己一個睇啦,今日明顯舒服左,個人都冇咁攰,michelle話我除左條脷,其他都回復返ivf前既狀態,太好喇,個心都安樂晒,今日係我放胎day 6,本來想睇完michelle去行下街,不過都係唔好心野,個街好多人,唔想比人撞親,所以行左去vero買左西餅就等車返tko喇,我都覺得自己好乖,明明好想行街都唔行喎,咁都有止一止d shopping癮,買左蛋糕囉,卡卡

星期日喇,第二日就要返工,有d緊張,唔係緊張返工好多野做,係緊張唔知有冇人係咁明我咩事,最怕當然係死肥野啦,搞到我成晚都訓得唔好。