健康院

今日風爽要去打4個月針,之前老公已經係咁話佢要抱爽,我唔比,我話今次要交換,到坐係到等緊,佢都仲要扮爽講,話想爸爸抱,其實我真係好唔明,你做呢d野,到底想我點理解你係冇偏心?我真係覺得公平起見,你上次抱爽,今次咪抱風囉,掉返轉,其實我都好想抱一次仔,一次女架。

今日磅重,兩個重量好到不得了,爽6.19kg, / 長度59cm(自己度),風7.35kg / 長度62cm,只睇重量,爽爽由滿月既3線上到4個月既50線,而風就由滿月既25線上到75線。風風,你已經係中上bb,媽媽唔想你再肥喇,所以你冇得再加奶,哈哈。

打針時,兩個都好乖,第一針冇喊,第二針先喊,不過係喊左一下,之後上到車已經訓覺。返到屋企都ok,都係食完奶就訓,係夜晚訓覺時開始癲,兩個都係想訓又訓唔到,風還好d,喊下又un..un..下,爽就直頭係喪喊,完全冇原因,喊到好慘好慘。

Atik幫我搖左風好耐,佢都訓唔著,爽我就抱左好耐佢都仲係狂喊,我仲以為老公咁生性,主動幫我抱爽,比我休息下,我真係有一刻開心架,咁老公抱左爽入房,我就搖風風,比atik做其他野,因為枱都未執。本來我聽到爽收左聲一陣,我仲心諗老公咁叻既,不過真係一陣,爽又喊返,都喊左好耐下,我咪抱埋風入房問下爽咩事囉,點知唔問由自何,一問個癲人就發癩指住亞風話,最衰係佢囉(係好惡,一定唔係講笑),仲要係碌大隻眼,好似殺人一樣,我已經慶到爆,為咩又鬧我個仔,風都唔想喊,佢都想訓覺,都係一樣打完針唔開心先喊,咁風真係嘈醒左爽,有冇需要咁鬧風風?風風知道d咩?我即刻叫佢同我交換,佢死唔肯,我冇出聲,都一樣好惡同佢對望,最後佢咪同我交換囉,我氹下爽,我覺得對風唔住,不過我得一對手,我可以點?我唔想癲人再抱住爽而嬲風。

最後我抱住爽行下氹下,爽終於都訓左,等佢熟睡後,我再氹風,風風飲左少少水,都終於訓到,由9點車輪氹兩個,氹到差不多12點先搞掂,我真係第一次見風爽咁癲,其實我個心都好痛,佢地打完針一定係唔舒服,又唔識講,見到癲人鬧風風,我更加心痛。不過好,我訓醒就當唔記得,因為我個心只關心風爽仲有冇唔開心,佢地食得訓得又玩得先係我想見到既。

風,對唔住,媽咪保護唔到你,累你冇端端比人鬧,媽咪真係好唔想。