放假喇

好唔容易先等到放核心假,放假前一日,即是15 Apr,我仲訓覺前係度喊,因為真係覺得好辛苦,又咩都做唔到,想行下街又冇氣力,日日都只可以返工放工食飯訓覺,連接下衫都覺得好辛苦,覺得自己好冇用,負面情緒一發不可收拾。
第二日,假期正式開始,加上知道自己可以鐘意訓就訓,所以心情開始好起黎。本來今日約左wrinkie去佢屋企拎野,不過因為我太攰,再訓返之後起身已經4點幾,咁咪通知佢唔出去囉,點知佢嬲我放佢飛機喎,我有唔啱,不過其實我真係冇約實架,尋晚我真係喊到好攰呀,下次都係唔好亂約人,免左不必要既唔開心。
放假期間,跟本上係好舒服,日日留係屋企訓訓訓,有時會覺得悶,老公會同我出一陣街,不過我行得兩個鐘左右就已經好攰,其實係屋企,我都要2-3個鐘訓一轉,不過一到假期有得扭個老公其實都幾開心,佢都冇我乎。
21 Apr, 返tko食飯前出去ac行街,仲放到一頸血,加上的出的入,今日係近呢幾個月用得最多最多錢既一日,用完都覺得自己好離譜,好過份,唔搵藉口去安慰自己,我真係好曳,明明plan好要好好計劃,要好好為兩隻小魔怪著想,點知一買野又係咁,太…過…份!Easter幾日假期,最瘋癲係約埋大家姐行太古,又apita又jusco兩邊行,買既野越來越多,真係攰到癲,仲要老公快快食完野要返tko接左nic先,我就陪大家姐再買多少少野先返屋企,最終老公同nic係tko等左我成個幾鐘先可以返屋企,冇陰公,我都攰到發癲。
呢一日後,我真係唔敢行街,因為攰得好緊要,加上飲左可樂,個肚好扯呀,係扯到訓唔著喎。直至放完假,見michelle個時,我先講其實我有幾滴啡,個肚又扯,所以佢叫我真係擔心就試下即刻睇醫生喎,由本來唔驚都好似好大件事咁,最終勁call dr yu,終於27 Apr下晝見左dr yu,佢話冇事,有啡唔緊要,個肚扯加埋個位置,佢話好正常,因為子宮大緊,加上我有兩個,所以係會咁喎,今日第一次見到細少少同我say hi,佢又揮手又郁個頭,好得意呀!見自己咩事都冇,即刻覺得可以行快兩步,仲偷雞去左行一田,買左兩張包被比小魔怪慶祝,哇卡卡。
發生過可樂事件後,我都已經乖乖咁係屋企休息,冇咩出過街架喇,日日食飽就訓,訓飽又食,最好係我又訓得又食得,其實都幾開心幾寫意。不過老公一放假我就要扭出街囉,卡卡。

話咁快,18日既核心假就完滿結束,下一次放長假會係產假喇!