細少少急起直追

今日繼續係自己一個去見醫生因為之前老公陪我太多,唔想佢咁快用晒d假,所以見Dr Yu同去qm都係自己一個去,今日本來約左2:30架,不過上次個姐姐如果唔想等咁耐可以早d到,所以我都係當2:00咁黎啦,去到已經見到同日放胎既其中一個媽媽,傾左兩句,連另一個孖胎媽媽都黎埋,我地又一齊係咁傾計,一路傾一路等,其實都ok,唔覺過左好耐,不過當有一個照完既時候,就會覺得自己等左好耐咁。
今日都係靚女醫生同好笑容姨姨,不過仲多左個醫生仔,好彩今日醫生仔冇整痛我,不過佢只可以好快咁見到大少少,細少少郁來郁去佢都落唔到手度幾大,最終係靚女醫生出手,所以細少少係照得清楚d,見到有頭同兩隻手,好得意呀!出乎意料之外,細少少急起直追,佢大過大少少喇,不過都係認佢地個位置去定大少少同細少少,高既就係細少少,低就係大少少。
今日係我既8w2d,兩隻小魔怪都係8w3d,大少少係1.93cm,細少少係1.99cm,嘻嘻。兩個都乖,兩個都要繼續好似宜家咁成長,唔好過大,唔好過細,兩個size接近,咁爸爸媽媽就會非常開心喇。
照完之後因為michelle未ready,所以我又落返中環啦,不過我真係好攰喇,所以去左機鐵站度坐到夠鐘就去michelle度,今日michelle話我仲女左,真係好開心。就算唔係兩個女,都一定有一個爽爽係我個肚度,hehe~
其實我覺得係一個爽爽,一個意意添,不過老公都仲係幾想有風風。

註:梁風係男仔名,梁爽係女仔名,呢兩個名係好耐之前已經改左,因為第一個胎,唔係仔就係女架啦,點之最後我可以一巢生兩兒,所以我開始諗多一個女仔名(因為我覺得自己會有孖女多過係孖仔囉),比左梁茶,梁亭同梁意比老公揀,佢揀左梁意,咁其實我覺得意意同亭亭都ok架,hehe~