一週回顧 (2010年5月3日 – 5月9日)

5月3日:
今個星期終於都清閒返喇,返工唔駛由朝做到晚,亦都可以6:15就閃人,今日終於都有得修眉喇,我足足兩個月冇修過,條眉好肉酸囉。
今日再見Ason,其實佢真係一個幾好傾既女仔,無無聊聊八八卦卦咁好快就過左修眉個20分鐘,太耐冇見一條整整齊齊既眉喇,忽然覺得好靚,不過應該係太耐冇修,今次整完成個眉位都好紅,第2,3日仲有d一粒粒敏感野,雖然係會散,不過要等到第4,5日先消,對眼先唔腫,又令我開始諗,好唔好試下bobbi brown呢?不過宜家Ason同我修得好靚,我好滿意喎,um…算啦,試下keep返4星期一次,下一次再睇下會唔會咁敏感啦。
修完眉老公都未出到tst,咁我唯有周圍盪,碌左去連根拔睇香水,issey miyake又出左新香水,今次個樽係紫白間,好似幾靚咁,同埋450/75ml好抵,不過再聞真d,個味好普通,係有d紫色好似幾靚,冷靜d冷靜d離開個counter先得。再盪盪下去左muji,買左兩個兜兜諗住用黎執好梳妝枱既櫃桶,又買左一個亞加力膠架放香水,同埋買左少少零食,join埋老公就一齊去食dinner喇。
Before dinner入左page one行一轉,唔入去都唔知原來我之前short左囉,明明個個月都係睇soup架嘛,唔知點解呢兩個月我都買左spring,仲要覺得本書薄左,冇端端有禮物送,總係覺得好怪,唔入page one都唔知我買錯左兩個月書仲要覺得係人地有錯,真係痴鬼線,所以今日要即刻買返soup黎睇,拿~~厚過spring,又好睇d,多野睇d,又平d,又唔駛收埋d唔係好啱用既袋仔,幾好呀!
今日係citysuper既food court食拉麵,拉麵就覺得麻麻(不過麻麻都好食過味千,同埋有隻好好味既半生熟蛋),反而叫左兩款餃子試,兩款都好好味,尤其是雞軟骨餃子,真係得喎,咁每當係tst想平平地食dinner既時候就可以去食喇。
食完飯就打道回府。

5月4日:
星期二,今日上堂完全不在狀態,突然間咩字都唔識睇,唔識讀,又唔係好明d新文型,好明顯係人老啦,追唔上,學唔到新野~~
上堂之前又反兜去食素菜,今次我係點菜,好味過上次好多,不過地方真係好淺窄,坐得好唔舒服。
係等老公出黎之前,係咁行始創,又睇鞋又睇衫,之前去過買衫間shop真係靚到飛起,又冇得試,我已經完全冇興建再買,見到有條karen都賣過既頸鏈,karen賣220,呢度mark 499/7折,差百幾蚊,真係夠我打一次的由tw返深山啦。再去jelly beans度睇鞋,其實佢有好多鞋都幾好睇,仲好係佢d款係齊晒色,可以比較下同款唔同色,不過又係冇興趣買,人又多,個大嬸又唔會招呼客人,你鐘意試就試,買就買咁,不過我見到有對vw絲襪,又係o係karen度買180蚊,呢度要250蚊囉,痴痴地。睇完一輪,上左樓上買左一盒有機麥皮就去素菜館等老公黎。

5月5日:
悶兜兜的一天,全日都係kln bay過活,原因係今日book左大榮華食媽媽節飯,又只係6:30既booking喎,照book啦,又唔可以遲到拎枱,所以我6:25就到左,雖然媽咪,二家姐,黃小深6:35左右已到,不過要傾要說要玩都已經夠了,呆呆的坐了一小時才可以起菜,原因是老公及亞嫂都要7:30左右才到。今晚的菜有80%以上是我點的,所以我覺得很好味及很滿足,價錢相當化算,如果酒樓可以給我book 7:30的時間會更加好。
吃過晚飯都只不過9:30左右,就算姐夫怎樣叫我地打的,我地都冇彩佢,兩個人慢慢咁行出去巴士站,消化下唔係仲好咩?返到屋企都係10點幾,早食飯其實都唔錯既,如果唔駛等就仲好囉。

5月6日:
因為尋日已經同左媽咪食飯,所以冇再返tko喇,不過因為今日搞搞下都成7點先放工,所以我地都係去美心食dinner,仲第一次睇"掌上明珠",雖然係老老土土咁,不過唔係用腦都睇得明晒佢地d橋段,都唔算太差啦。
專登叫多少少餸等我可以留返聽日做lunch,又買左肉同早餐,肉係聽日煲湯用,早餐當然係聽日食啦,食完飯打道回府陪nic nic。

5月7日:
又係wfh日子,今日真係好眼訓呀,所以做做下野係床上碌碌下,11:45訓著左都唔知,醒既時候已經係12:30,咁都已經係lunch hour,所以繼續訓啦,訓醒之後入左書房做野,又上下網咁,到咁上下時間就裝身出街,今日要同6299食mother's day dinner,揀左k11既aku爐端燒,食物質素唔錯,不過係貴左d啦,同埋始終都唔夠日本好味,但係貴日本一倍喎,我估我地都唔會再食第二次,不如去日本食好過啦。
食完dinner仲去買左awfully chocolate既雪糕食,佢既cake一早已經食過,唔叫好好味,當時買左chocolate banana cake,反而覺得banana係主角,蛋糕質地唔差,就係唔夠chocolate味囉,不過今次試佢既雪糕居然覺得唔錯,chocolate味濃過蛋糕,不過一個人食一定會飽到死同甜到死,兩個人既一球會比較好。

5月8日:
隔左一星期冇見michelle,佢當然佢關心係我情緒問題啦,其實過左一星期,已經冇事喇,反而我懷疑上星期老公同佢講過d咩呢?點解今次同我講野時,好似係專登同我講咁既?不過是但啦,總之達到目的,我咩都會聽下既。
睇完michelle去完cwb食左少少野同埋行左一陣franc franc就要去天水圍(入老公舅父屋企),當中當然係因為老公要我太早入去所以我覺得唔開心,又鬧交,又發癲又盛啦,事後我冇覺得自己啱晒,不過老公唔顧我感受都係衰架喇,我係女人呀嘛,所以一定要佢氹架喎,今餐飯都算幾唔錯,至少d餸唔會好油好悶咁,舅母後生少少,做d野係好dd既,不過佢真係幾浮誇,講左n次我地兩公婆好比面,救命~~

5月9日:
本來想襯老公出去massage個時我去ac一轉,不過又懶起身,到老公返黎都未梳洗,不過個心又好想出街喎,最終request左出街3小時,於是火速去左ac一轉,今次既收鑊係兩件franche lippee同埋幾件8ight,仲有兩件accessories,放到個環保袋滿晒。今個月真係唔可以再去ac啦,真係用左好多好多錢喇,係時候要停一停,儲下錢先得。