一週回顧 (2010年4月26日 – 5月2日)

4月26日:
今日又要做health check,所以成8:30先出門口,首先係村口間餐廳買左一份餐蛋治做早餐,好辛苦咁爬上去巴士站出mos返工,行路係龜速,完全冇諗過要趕返工,所以10點先返到去。
Lunch係公司做功課,食麵包,不過覺得好唔舒服,好辛苦呀,個人又好攰。
是日晚餐已經唔記得食左d咩,總之一早就走左去訓覺。

4月27日:
最後都拎sick leave,一早起身先聲都開唔到,不過老公仲死叫我沖左涼先喎,因為我想make sure michelle今日會返診所我先決定sick唔sick,如果睇唔到michelle,我留係屋企一日都係冇用架啦,最終沖完涼出黎搵到michelle,放心晒,一路呆下呆下等到打電話返公司先再訓返,一訓就已經訓到12點。起身食左少少野,上左一陣網又再訓過,叫左老公2點幾打比我又唔打,成3:10先打黎叫醒我,我趕到人都癲都要遲25 mins,我真係覺得自己好過份囉,明明book左時間,如果我一個一遲,下一個booking又會遲,雖然有原因姐,連我自己都覺得唔可以原諒。
今日全個背脊都要拮針,仲有手同腳都要,而藥今次就唔再食藥粉,係要自己買藥材,因為michelle話感冒既藥,自己煲會好d,所以開左兩張藥方比我,一張係煲黎飲,一日一次,食兩日,第二張係比我返工焗茶飲,都係飲兩日;其實仲有一張湯料方,michelle話我個人都仲係好虛,叫我一星期at least要煲兩次湯飲,唔講由自何,一講呢,我下一星期係完全冇時間煲,屋企仲有湯料兩包囉。
睇完michelle唔早唔遲咁,老公又未放工,見有d時間就去fleur fleur拎返d despoit同埋買我好耐之前order左既tee走啦。本來順便係fleur fleur樓下執藥,我以為咩咩大藥房就會有藥執,我已經一入去就問呢度有冇藥執架?佢答我有,我先拎張方出黎,跟住佢串我冇中藥架喎,痴痴地,我真係冇聽過有人會用”執藥”黎形容執傷風感冒頭痛藥囉,正一白痴黎架。
我向住佢指既方向行左入第二條街搵舖執藥,行行下見到一間咩咩中醫館,我見有d藥材係度,d staff又執緊藥,我咪又拎張藥方出黎話要藥囉,頂佢呀,第一個男人拎住張藥方唔知講咩(唔覺得佢係講緊廣東話),跟住就比左我張方第二個男人,第二個男人就一路睇一路話冇呀冇呀,我地冇藥呀,白痴架,我唔知我d藥有幾咁難搵,你好聲好氣同我講,你地唔做執藥未得囉,都唔知點解要話冇藥,白痴。成個天后d人都好似癲咁,我病緊都已經好辛苦,仲一路係咁行,又撞到兩個白痴喎,d火係咁起,嬲到我死呀!!!!
最終搵到一間好細既藥材舖,終於都有藥執喇,同埋都算幾好啦,一入去就叫我坐低等等,我咪一路等執藥,一路等老公放工過黎搵我,坐下坐下,個伯伯中醫問我張藥方得唔得,我話我唔知,今日先睇,未食喎,跟住佢話d藥好弱,唔夠強,如果我食完唔好,去佢度睇多次,佢醫我喎,救命呀!!!michelle係豬宅家庭中醫,我信佢咩都幫到我架,唔駛咁都要兜生意啦,不過伯伯中醫係冇惡意既,所以我又唔會好反感,我仲比多少少生意佢做,就係執多兩包湯料。等左好耐終於都執晒6包野,終於都可以返屋企喇,我好攰好辛苦。
返到mos去左美心叫左兩個餸一個炒飯,食埋先返屋企。

4月28日:
今日約左魔魔集團行街,我死都會去架,其實尋日飲完一次藥,今日又飲左一日焗茶都已經好返好多,點知去到ac,佢地個個都話我把聲變左,其實我覺得已經好返6-7成,都聽得出變左咩?我仲以為唔覺添。
本來今日公司唔係好忙,撞佢個鬼,當我想走個時又有野做,做到成6:45先走得,痴線架,所以我二話不說跳上的士去ac,都唔算好遲,佢地都係啱啱開始姐。
今日又係o係ka lam玩到癲左,其實我好想去膠袋ee度架,不過係karen度已經好左好多錢,又夜,所以都係唔去第二間啦,買完野,簡簡單單去左食意粉,我仲以為d茶仲可以沖,點知都冇晒味喇,又食又講是非好快就過左個幾鐘,返到mos都已經11:xx,老公唔出黎接我,要我打的返屋企,因為佢要煲定藥等我,咁返到屋企洗完面,食左藥,上左一陣網就即刻訓喇,好攰呀~~~

4月29日:
今日係老公拎report既日子,本來佢一直都話lunch出去拎,咁我lunch之後打比佢問下佢啦,佢第一句就話”冇喇”,嚇得我半死,原來佢係話lunch冇得去拎,咁搞左一輪,我就話我放工去拎啦,人地clinic close 6:30,我其實都好趕。放工時落雨喎,去到小巴站已經好多人,咁我排排下隊見唔對路,見到的士就截啦,點知第一架唔停,到有第二架,佢有停,上左車我仲以為好快會到,點知有d塞車,仲有呢條死的士佬好似專登去d塞車既路咁,跟住就快去到,停完燈位轉個彎呢,又停係架落客既小巴後面,唔識抽頭架喎,仲要停左一陣,叫我呢度落車自己行去,正死摌黎架,都聽到我講電話係好講時間架啦,車前多我兩步係唔係會死架?
拿拿聲一落車就跑上clinic,有雨我又冇開遮,入到大廈d冷氣又好勁,好鬼凍,又好擔心個report,上到去,拎左個report我都唔敢開,去埋toilet,整理下個心情就打電話問老公想佢自己睇定我同佢睇,佢叫我睇左先,咁我一路行一路開黎睇,睇完好唔開心呀,唔開心到我都唔知行去邊去,只係知道好想發洩,所以我行左去家樂是但買左兩件衫就返tko食飯。
全晚都好唔開心,冇彩老公,其實又唔關佢事,不過我真係好唔開心呀!!!!
臨訓前我係廳度係咁喊,個老公都唔知,真係離晒大譜。

4月30日:
一早起身我諗諗下又喊,好彩今日係wfh,所以我可以一邊打mail一邊喊,打完又可以攬住nic nic喊,lunch之前忍唔住同左老公講我好唔開心,又再喊,好攰好攰咁用左一個lunch去訓覺,但係起身都仲係好攰呀!
成日都拎左上床自閉,有野做就做,冇野做就自閉,好唔容易先等到放工,熄機,跟住繼續自閉,等到老公返黎買飯都仲係目口目面唔想出聲,係臨訓前又short左咁大喊一場,喊完呢一下,心情終於都好返d。

5月1日:
今日天氣好好,訓到夠晒就起身食野,梳洗完就去行街街,今日目的係要拎返家樂兩件衫出去換,係呀,我係換兩件衫呀,不過仲買多兩對鞋呢,但係唔知點解今日買得好開心,可能心情好返啦,另外仲去買多幾隻wii games,可以玩super mario喇~~~

5月2日:
今日係我地相愛6年既大日子,6年前我升職加薪又拍拖,6年前輕宜家30 lbs,可唔可以返去6年前既體重同年齡,不過人工要照keep宜家既人工。今日除左出去食飯,其實冇咩特別事做,一早幫我d戰利品影相,影完先知仲有個防盜係度,件褸又有少少污積喎,所以要拎返出家樂先可以去食飯,順便賣左我個隻廢廢地既太空mario。
去到k11,呢個係一個好怪既商場,裝修得幾靚,不過d舖都唔知比咩人行既呢?完全冇興趣,食d咩會另外寫blog,由於食得太飽而我地又有3小時free park,所以行左出街兜左兩個圈先開車返屋企,今日餐飯雖然冇我expect咁好味,不過真係食得好開心,哈哈,今日老公表現得好好,我真係好開心呀!!!!!