一週回顧 (2010年1月18日 – 24日)

過去的一星期是非常忙碌的一星期,每一天都不能夠直接回家,說累又不是,不過覺得少了時間陪nic nic,加上星期五車給人揸走了做維修,連星期六想帶nic出mos都不能,難為了他。

星期一:
放工出了tst benefits修眉,上次book了7點,我又趕不到出去,要7:20才到,所以要等到7:40才攝到時間給我。於是今次我約7:20啦,怎料我6:50便到了,在沒事做,周圍逛係情況下,忽然想起可以到anteprima看一看,最終就是在短短的30 mins內,由facess行去anteprima買東東(買了靚靚的蝴蝶結掛飾),再回facess修眉,上一個appointment應該是遲了,要等到7:30才到我,修完已經差不多8:00,途經零食物語又買東東,最終搭kcr到沙田再轉299,不過一小時便回到家,有時覺得直接回家比回mos快得多!!

星期二:
如無意外,以後的星期二都會用來看中醫,因為同事的星期一booking被取消了,我又不想她要等到星期四才看,所以讓她先看,我和老公先食飯再看醫生,怎料今天老公7:30才放工,真的要8:00才到mk,他沒吃什麼便先看醫生,幸好我隊了一串魚蛋+牛丸及一杯椰汁,雖然我知道椰汁是肥得很,不過魚蛋太辣了,我要在最短的時間內飲/吃一點甜的東東。看完都只是7:40,所以我又到家樂買買買,最初只是因為見到姐姐鐘意的auntie rosa,怎料熱情的sales姐姐開了一袋新貨給我摷,自自然然會很開心啦,開心便會買,我已經很忍心了,只是買了一條裙及一件top。之後會合老公去睇醫生,醫生說老公的肝鬰沒有上次這麼嚴重,有少少好轉,即是開藥的方向是對了,而我呢,沒有改善,仍然是脾很虛,腎很虛,但因為我吃了藥覺得胃是舒服了,所以方向都是對,所以我們兩個的藥都再可以強一點,今次針灸比上一次痛得多,可能是上次太冷靜所以今次比上次刺得深,而且我叫中醫幫我拮多兩針讓我瘦一點,hehe~~~

星期三:
本來約了上日文,在上課前半小時,補習老師打給我說要走鬼,要下星期才可以補,所以無無聊聊出了mk,行了始創,雖然看中了一條zamper裙,不過折了都要530,加上我覺得佢賺得我太多,所以堅持唔買,其實我都真係幾鐘意,不過又不可以試,不想再買不試的衫,就會給我換,又是不可以試,換又有什麼用呢?所以最後兜兜轉轉都沒買。
當老公都出到mk時,在和花亭吃過晚餐,再去michelle屋企拎藥,之後打道回府。

星期四:
Appraisal – 極之不快的appraisal,不是因為grading特別差,而是因為受到恐嚇,說什麼如果第二年冇improvement就要消失,越諗越慶,話我靜,話我唔主動,話我唔creative我都算,呢d我可以扮出黎,恐嚇我做咩呀?超憎囉,又要一邊話我今年已經meet到佢地requirement,第二年就要點點點,你講未講囉,恐嚇我做咩呀?發花癲。其次我同邊個fd,同邊個食飯,同食飯食d咩又關你事既?痴線!!!!如果我唔係仲想係度做,我鬧左你10世啦,唔好以為我平時唔出聲就唔識鬧人先得架,死白痴光頭死肥佬!!!!!
由於心情很不快,所以做完甲之後去了faye fashion是但買,是是但但買左一件一直都鐘意既oops tee同一件麻麻地鐘意既auntie rosa扮高貴top,是但啦,我好需要發洩呀!!!!!

星期五:
同屋企人一齊去左佐敦食飯,係大家姐既生日飯,地點係二家姐揀,食物好一般,唔知點解d人要勁等位,同埋環境好嘈,我自己唔係咁鐘意,不過一家人開開心心食一餐飯,都ok既,不過不失。晚飯後搭巴士返屋企既時候,我仲係為左尋日既事好嬲,都仲係全程係咁同老公講講講,鬧到攰就訓一陣。

星期六:
本來想出all crazy行街,老公又厭悶,最終冇街出,我係屋企訓足全日,衫又唔執,仍然係一堆二堆佈滿屋企,哈哈!!!!

星期日:
第二次去做massage,呢個massage姨姨上次話我肥,今次話我皮膚好差,好喇喎,都唔係差得咁緊要姐,可唔可以唔好個個星期都數我一個缺點呀?就算我又肥、皮膚又唔好,都係一個靚女黎架喎,如果唔係呢個ee手勢好,我估我會好憎佢!!!
同時幫老公book左一次trail做,睇黎佢應該係好鐘意啦,又話舒服過玉姐,又話舒服過大陸,仲好醒答人下星期book兩part,真係最威係佢。
係老公做massage期間,我想問問上星期睇中的isbit袋要多少大洋,行過舖幾次,都是掛了一個休息牌出黎,但入面明明是有人,於是我推少少門問問幾點開門啦,我初時都以為佢只係做緊preparation,所以未開,點知個女人好串答我只做熟客,我又好想鬧佢,不過唔知鬧咩好,咁就算數啦。最終成功迫到老公同我去all crazy,哈哈!!
其實去all crazy都只不過係去左karen度,最初都只係試下衫,不過因為佢話有好多23cm新鞋返左,佢又帶左我上樓上間舖揀鞋,d鞋未show出黎就可以試,我覺得好開心,所以最後買左3對鞋,3件衫,哈哈!!!!