一週回顧 (2010年1月11日 – 17日)

發覺近來寫blog都只是寫買了什麼,做月結等等,不想我的生活只有「買」,所以由10年開始,盡量做週記吧,可能會悶了一點,但幾年後再看,可能會覺得很有趣吧,卡卡!

星期一:
破天荒行mos街市買餸,點解會行呢?因為上一個星期四癲左咁返tko買餸,買完唔夜,返到屋企都唔算夜,不過最終係西貢打的返屋企就覺得好貴,所以死死氣試下係mos買啦,又點解唔去supermarket呢?因為夜晚supermarket d菜真係好唔生鮮,同埋覺得去街市好似勁d咁,所以去街市買。小試牛刀,買左雞翼同菜,因為老公話要整燒玉子,所以加多兩樣餸就夠喇,雞翼ok啦,至少冇瘀瘀黑黑又冇唔脫毛,菜都生鮮。

星期二:
終於都去睇中醫,想睇中醫好耐啦,不過又唔係好想去返牛頭角睇,一來時間好唔啱,二來老公話過d藥好熱氣,三來我覺得個中醫唔係好同我講野,最緋係同事介紹下,睇另一個中醫,呢個醫生好好,可以比我地上佢屋企睇,加上後生啦,又好傾啦,又解釋得清楚比我地知,所以我地會keep住睇一個月先,等佢review左睇下有冇改善先再算,我target係想keep試中藥3個月先再打算。人生中第一次針灸,就咁就奉獻左出黎喇,驚又唔係好驚,痛又唔係好痛,不過真係好奇怪既感覺,但係亞醫生話我真係好冷靜囉,我希望可以一直冷靜落去,爽爽,我真係好想有你呀,我地會努力,不過唔知到底我地同你有冇緣呢?
由於個中醫令我好似有返d希望,加上老公同朋友食飯,我自己一個去左家樂放血先再返屋企。

星期三:
公司annual dinner,同枱其他同section既同事都抽到獎,係得我冇,不過今年annual dinner既節目都幾笑爆咀,所以唔會好悶,我仲要record movie比老公睇,真係笑死我。同上年一樣,老公過黎接我,所以好快可以返到屋企!

星期四:
太凍太攰喇,忍唔住sick左,最終訓訓訓,訓足一日,最勁係我可以由8:55打左電話比老細開始又訓過,可能訓到3:30先起身,證明我真係好攰,訓多多都唔夠。

星期五:
返媽咪屋企食飯,臨走因為亞絲以為我未比家用所以我發左佢脾氣,我媽係嬲左我,不過我死都唔認錯架喇。

星期六:
去左同事介紹既美容院試做massage,痛到飛起,不過又因為我好想鬆下自己,所以買左course,3800個大洋20次,有16項可以揀,不過我應該只會揀body massage,唔會做facial,我想將我既美好回憶留比mtm,唔想出去亂試,加上轉用左冇chemicals既skin care都有差不多一年,唔想亂用野上面。做完massage,出去沙田食tea,買第二樽乳酸菌,之後返mos街市食餸,乖乖煮飯。
是日晚餐: 蕃茄薯仔湯,叉燒醬排骨,白煎銀雪魚,豆豉鯉魚油麥菜

星期日:
前一晚比老公罷上枱,要我12點出去飲茶,最終都成1:30先出到mos,飲完茶行左一陣,之後又去買餸,真係好乖,又煮飯。
是日晚餐: 老黃瓜煲豬展,叉燒炒蛋,粟米肉粒,叉燒炒翠肉瓜(因為買得太多叉燒,kaka)夜晚老爺奶奶揸返架車比我地時,我地順便帶左nic nic去行街街,行左大半個鐘,nic nic今晚訓得非常好,完全冇起過身。