灰灰的拍拖三週年

好灰好灰的一天
三年前甜蜜蜜的被你拖起我的手
兩年前開開心心的送了一條鑽石鏈給我
一年前我以為你會同我求婚,點知鬧交收場,鬧咩我就唔記得喇
今日你一早已忘記了,好灰好灰,原來你對我既熱情同心思只能夠維持一年多,唉~~~實在令人失望

今日本來應該要好好慶祝一下,因為今日係我地3年既大日子,唔知係女仔實在太緊張呢d日子呀?定係男人真係一d都唔在乎呢?
係一個星期前,我講笑咁同你講,不如2號你請假呀?你放工同我去玩呀?你只係"吓?你講真架?",我半笑著:"講下姐,咁我都冇假啦,你有假又冇時間放,我都係提議下你係亞邊個放產假前放下假姐,唔放都冇所謂"(不過心諗,一試就試到你一d都唔在乎啦,不過算啦,你呢個反應係正常過唔正常,我都只係想比你意識一下,下個星期就係3週年姐)
尋日,你收到個電話對話如下:
"喂,係呀?點呀?打波?聽日...應該得,冇問題.仲有咩人呀?... ... ... ... ..."
我聽到眼都突埋,你聽日打波?唔係化?你真係唔記得架?咁我就狠狠地撞左你一下,做口型同你講,你聽日真係打波呀?
放下電話一臉不耐煩的你問:"聽日有咩做呀?"
我:"聽日冇野做呀,不過聽日係5月2號"
你拎返起個電話同人講:"哎呀,唔好意思呀,原來我聽日唔得呀,我唔黎喇"
(心諗,你咁講即是又比人覺得係我唔比你去打波啦,一,極之唔開心你唔記得,二,你又一次put me on the table,加埋有10個唔開心)
今日lunch時問你:"打算今日點呀?",你話:"你咁問,即是想去街啦?",我:"唔係呀"
大家不了了之,我又唔想再講,你又好怕再諗
放工,我因為一直都冇機用,直至5:30先可以用返電腦,所以專登check晒d mail再打下電話同人傾下d公事,意圖係想等你放工,不過等到7點打比你,你都未放得工,我略帶失望的問你:"你有冇諗去邊呀?",你:"你即是想去街啦,去銅鑼灣囉"
又係"囉",我心諗你又一次令我唔開心喇
我答:"我唔係一定要去街,不過想有d野做姐,算啦,我返屋企喇,bye bye"
你好似一點點悔意都冇
8:15分,我啱啱從小巴落車你就打比我:"我放工喇,你係邊呀?"
我:"啱啱到左屋企樓下"
你:"今晚你煮唔煮飯呀?"
我:"是但啦,不過我咩都冇買呀,只係買左兩排益力多"
你:"咁你即是唔煮架啦,咁出街食啦"
我:"你想食就煮啦,有肉餅... ...唔講喇,我有lift呀"
心諗:想點呀?放左工呢一刻,你都冇諗過要氹我架喎,我真係唔開心到極點喇,由10個唔開心直升到60個唔開心喇

好啦好啦,我返到屋企整好晒野,諗住打比你,睇下你有咩打算啦,打左一次比你,又冇人聽,又唔聽電話,我都唔知你要個電話黎做咩架,算,我唔嬲我唔嬲,唔聽就唔聽啦,我連飯都唔想食呀
9:15分,你再一次打黎:"我搭緊小巴喇"
我:"咁即是點呀?"
你:"你係小巴站等我啦"
我:"下?點解呀?你買野上黎食啦"
你:"食club house呀?唔好啦,你未換衫呀?你落黎啦"
我:"你返緊黎架喇喎,去得邊食呀?"
你:"去坑口囉,你宜家落得樓未呀?"
我:"未呀,你返上黎放低袋換衫先啦,我要寫blog呀"
9:2x分,你返到屋企,冇驚喜,冇對唔住,咩野都冇,自己換好晒衫就問我行得未
咁寫完個blog我地就起行
最終去左坑口村大排擋食飯,全程我唔講野,你又唔講野,我就快痴線喇,我已經好刻制自己唔發脾氣架喇,容忍真係有個限度架
食完飯,一直行去搭車時,你終於都開口問我:"你嬲咩姐?你嬲我夜放工呀?"我搖頭,你再問:"你嬲我咩都冇安排呀?"我點頭
你再一次唔出聲直至行到去小巴站,肥豬精景語錄終於出現

"都唔明你嬲咩架?有咩好嬲喎"
"其實點解要慶祝姐?安安落落係屋企食飯未好囉,點解一定要出街食?"
"你當尋日慶祝左得唔得呀?"
"補返啦,今個星期六同你補返呀",我:"唔得,多多黎我地屋企",你:"咁星期五啦,星期五補返呀",我:"都話左唔得落,多多星期五晚就黎架喇"

我的心底話:
1.有咩好嬲你都可以問,其實你係唔係真係一隻人型豬黎架?
2.點解要慶祝你都可以問既?你個人都真係好得意喎,仲要加多一句點解要出去食飯?唔係一定既,你有心思,我接受係屋企食架喎
3.請問尋日有d咩慶祝過呢?尋日好似係我亞哥帶狗狗入黎同nic反,唔關我地事架喎,跟住去睇spiderman,我都係為左唔想去annual dinner,所以專登搞到自己趕唔切,仲有呀,d飛都係我買架咋,如果唔係,戲都冇得睇呀,睇完戲就入左西貢home collection拎櫈同埋買左兩個木盒仔咁大把,食飯都係去左買kfc咋喎,你覺得尋日過得好特別呀?我一d都唔認同喎
4.補返?比機會你星期五/六補又點呀?你都係是但同我去行下街,當滿足下我既姐,我唔係要呢d呀,我想你真係有刻意諗下,可以帶我去邊,或者帶我去食下d特別野呀,或者唔知去邊行下呀,個d呀

唉,你一d都唔明,仲要一d悔意都冇,仲要覺得我好似好冇理咁
係呢件事上面,我除左好失望同好唔開心之外,我仲發現左一件事,原來我可以一直都唔發脾氣,由得你講,由得你唔講咁,總之我個態度就係我要講野,就是但講兩句,我想你收聲時,只要同你講一句"你自己諗清楚啦",或者"你再講只會令我越來越嬲,你可唔可以唔出聲呀?"
原來,原來我既界線又再一次降低,今日全日都可以唔發癲唔發脾氣,我真係好想好想比10個叻自己呀~~~哈哈哈哈
我呢d係唔係叫苦中作樂呀?究竟對呢個日子,我係唔係唔應該再有期望呀?其實我都只係要求,我生日,情人節,拍拖紀念,結婚週年同埋聖誕有d野做下姐,唔通一年365日入面,比5個特別少少既日子我過都叫要求高呀?
好彩,好彩我冇去買衫比你,如果我買左野比你,而你又一d安排都冇,你一定要化內疚為力量去發癲,去發我脾氣,你個口一定會話因為你咩都冇準備而我準備左比你,所以你好唔開心架
我都知你唔會有任何禮物送比我,我亦都唔想我買左野比你,仲要受你d脾氣,所以我今次醒呀,我咩都唔買,不過我真係冇諗過,我三番四次開口提你同話比你知,我真係想過得特別少少,你真係可以唔知,唔理,唔記得,額頭寫住冇時間,冇記性囉
算啦~~你係呢方面,係永遠都唔合格架喇,我都冇希望架喇,或者係每次我都會比d希望自己,諗呀諗,直至回到現實,我個夢就會醒,咁可能我既心情都曾經有高低起伏過,可能我咁,會開心過由始至終都係一條打橫既平線呀~~~