婚後第一個情人節

我同亞jim今次係第3年過情人節,第一年佢送左花去我公司,扎花都幾靚架,不過就細左d,仲要成千蚊,好似太貴,我地夜晚就去左西貢食海鮮,佢就送左大佬mon比我,我就送左ps2比佢,過左一個好開心既情人節,不過過左兩日我就又痾又嘔,都病左好耐下,卡卡。
上年,我一早講左唔要花,不過lunch既時候,因為見到通街都係花,我就扭扭扭話好想要,不過等左一日都係冇花,咁亞jim就黎接我放工,佢就買左Swarovski既花花比我,我心諗,不如你買真花比我啦,我地一齊返屋企去jusco買牛扒同鵝肝返屋企食,嘩嘩嘩,一返屋企就見到張枱好靚,有張新枱布,跟住佢帶左我入廚房,叫我搵禮物,哈哈,係一盒好靚好大好紅既士多啤梨呀,我已經好開心架喇,佢又話仲有一個驚喜喎,一路帶我行去電視櫃,嘩嘩嘩,係一扎花呀,哈哈,好令架,原來佢請左半日假準備呢d surprise比我,嘻嘻,多謝肥豬,上年真係好開心。
今年喇,我都係叫佢唔好送花,又係lunch時都有話佢幾句啦,但係就冇上年咁癲,一早知佢今年唔會請假架啦,咁就講好我地各自返屋企,我就去左街市買打邊邊既野,其實lunch都已經去左citysuper買肥牛架喇,要再去買下菜呀同埋其他配料囉,我好快好快就返到屋企,搞下nic nic啦,我就開始洗野,亞jim都返黎喇,好快我地就食我地既情人打邊邊晚餐,個湯底都幾好味,不過最好味都係o係citysuper買既芝麻醬,嘩,配肥牛真係好正呀,不過唔知點解我好快就飽喇,我就坐係sofa度睇電視,亞jim就同nic nic係咁食,佢地食完我就話要拆禮物
嘻嘻,第一份係一盒心型朱古力,個盒好情人節架,又心,又花,又紅色,食左一粒覺得好好味,我問呢間野係邊架,佢就話係ifc上面,我話冇人排咩,佢話冇呀,可能好貴啦,我就再問,下?好貴架,即是幾多錢呀?佢叫我估啦,我話200幾啦,佢話唔只,我就話300幾呀?佢話係呀,差不多400,嘩,真係好貴呀,得10粒架咋,都要398,我好珍惜咁慢慢再食多一粒,雖然nic nic好想食,不過我少少都冇比佢,因為好貴,同埋係肥豬送比我架,哈哈
第二樣就係gucci,係我自己揀既,不過亞jim買時打比我,話佢睇到第2樣,覺得啱我多d,我就話叫佢揀佢覺得靚既色比我就得,一打開係心心散紙包呀,桃紅色,其實我都係睇過呢個散紙包架,不過一來係zip,二來一定貴過匙扣,所以我都冇扭話要買,我一打開時唔係話好好好開心,亞jim以為我唔鐘意,其實我鐘意架,不過覺得好貴,唔想佢買咁貴比我,因為佢一早講左話買1k內既野架嘛,宜家咪過1k囉,好似好貴咁,所以我都唔知比咩表情佢,sorry呀肥豬,我鐘意架,我會日日用架,我知你都有留意我個散紙包好殘好舊,所以買比我,我知你好細心,我就已經好開心啦,卡卡,多謝老公。
最後反完一輪,我就係sofa訓左,跟住我諗亞jim執好晒d野就叫我入房訓,我地冇帶仔仔落街呀,不過佢尋晚都好乖,今晚最多早d落街,反耐d啦
總括黎講,尋日過左一個又開心,又飽,又warm,又有仔仔既情人節,我已經好滿足喇,哈哈

p.s.個散紙包背面有一條黑色花痕,今日要拎去換,今晚就可以用喇,卡卡