今日去贊育既booking係10:30,本來想跟老公一齊出門口,慳返的士錢,不過真係好眼訓呀,訓多一個鐘好過,同埋屋企又有早餐喎,唔駛出mcdonald坐,慢慢食完野先打的出mos再轉巴士。
上到贊育啱啱好10:30,等左45分鐘左右就有得照喇,開頭係姑娘照,今次個姑娘講野大聲d,好nice,好細心慢慢照,都有解釋下佢照緊d咩,佢話個女宜家近子宮口,佢地會叫呢個做家姐,我問會唔會有變化,佢話唔會,多數都係爽爽出世先,但呢個家姐仔就細隻左d囉,比週數細1週,風風就同週數一樣,略略大左2-3日左右,不過姑娘話細1週係可以接受架喎,我自己就想爽爽大返dd,近返d週數,不過媽媽都唔知幫到你咩,我食同訓,你都未必會吸收,唯有叫你自己努力啦。
姑娘度晒d野,話要等醫生再睇一睇喎,咁就叫我等等,打側左個身我就係咁訓等醫生,都等左好鬼耐醫生先入黎呀,醫生其實都係睇下姑娘度左既數據,同埋睇下胎水,問下我有冇唔舒服咁囉,佢話兩間房都係咁上下大,幾好呀,兩個bb都好唔錯,keep住私家同佢一齊照bb就夠喇。
小插曲:姑娘照風風同爽爽時,係我舊骨個位都有少少大力咁按落去照,爽爽都冇特別反應,但風風係好大力踢人地囉,真係彈一彈,我係mon到見到佢係成隻撐一撐咁,連姑娘都笑佢,話駛唔駛咁呀?大力左少少咋喎,呢個仔真係瘋架!!
仲有一個畫面好得意,佢地4隻腳板都係我右邊胃對下平排放晒係度,好得意呀!!!!
今日爽爽有886g (差不多兩磅),風風就 1038g(已經over 1kg,very good!!)
No comments:
Post a Comment