今晚要去睇concert,所以下晝出去mos食tea同埋買定餸,我地宜家買餸真係好hea,個個星期都煲粥食兩日,懶到出汁。買完野返屋企本來想訓一陣先出去,但又要放好晒買返黎既野,又要晾衫,搞搞下都冇時間喇,係sofa捱左一陣就出發睇克勤。
今次老公好醒,睇定晒邊度最近泊車,真係比平時近左,但附近冇咩好買黎食,我只係食左蛋糕仔,食個時就覺飽,好鬼快就肚餓啦。
我地個位超靚呀,雖然係第10行,但其實前面有條走廊,克勤係會行過黎,開左場冇耐,我就已經握到手,佢仲應該見到我大住肚黎睇佢concert添,哇卡卡。我仲拍風風爽爽叫佢地聽歌,我覺得佢地幾鐘意三弦,聽三弦個時反應好大下喎,到第二次再行近我地,今次老公都握到手,開心死我地。不過我坐坐下真係好鬼肚餓呀,早知買多少少野食啦。睇完演唱會,老公專登入一入mos買三文治比我做宵夜,除左三文治,我仲要食埋生果先夠飽,真係大鑊,宜家成日都要食呀!!!!
Subscribe to:
Post Comments (Atom)
No comments:
Post a Comment