2010年回顧

對於過去一年回顧,展望將來,其實冇刻意諗過,不過既然打blog,係好應該寫下我仲記得既野既。
係2010年一開始就係經同事介紹識左michelle,michelle係我見過/聽過最西化既中醫,佢d英文係流利過中文,當佢好急想表達既時候,佢係用英文先囉,但唔知點解佢會係中醫喎,哈哈。
就係咁,由1月開始個個星期都會見michelle一次,係呢一年入面有咩病都係第一時間搵佢,原來我食中藥比起食西藥好好多,病好得快好多,食完又唔會覺得身體好虛弱,不過又可以睇,因為我調理左身體都一段時間,所以我個底打得幾好,就算有病都比較容易清晒d菌,係有一次唔知點解on and off咁高燒左3日姐,咁係呢一年,我又真係幾健康架喎。
而老公呢,最明顯係情緒穩定左,面色好左,真係唔講唔知,原來痴線都可以用中醫角度去解釋,又可以用針灸同中藥去醫,哈哈!

今年來來去去都係為左生bb而煩惱,煩下煩下又一年喇,係2007年尾以為2010年3月係遙不可及既日子,以為仲有年幾兩年,冇理由搞唔掂既,點之就係唔掂囉,07年發現,有理冇理去排期,排到08年3月見醫生,以為好快,原來男女隊有別,不過都算好彩,顧問醫生比我地係07年10月就開始排女人條隊,要09年3月先見醫生,當時心如刀割,點呀?要等咁耐。原來搞下搞下,老公去睇下醫生,去做下手術,等好返,又去睇下中醫,時間一日一日咁過,好快就已經到左3月,睇完醫生佢已經係比我地做icsi喇,跟住就係等7月聽講座,1月開始療程。

到左12月知道自己都仲係唔可以自然成孕,心真係好灰,又狂喊囉,喊完一輪,醫院話比我知CNY lab要放假,我個期要延遲一個月,真係謝天謝地。係2010年為bb做既野就係個個星期去睇中醫,小心自己既飲食,同埋係適當既日子努力囉。

講完呢件大事,今年都算幾好,同上年一樣去左一次日本同埋週年旅行,2009年既日本之旅除左有人唔記得拎車牌,其實成個trip都好開心,可能有plan啦,今年去,之前工作好忙好忙,冇時間冇心機去plan,去到一團糟,就算去到都覺得唔係好似平時咁開心,仲要今次唔係買得多野都同樣豪花左幾萬蚊喎,今次d yen好貴,去到既時候天氣唔凍唔熱,又唔係好想買冬天衫,用得最多係搭車,由立山黑部去到名古屋再去大阪,其次係食,食得好瘋癲,卡卡,總括成個trip,反而最開心係o係名古屋,可能留既日數少啦,所以覺得唔夠囉。
週年旅行今年去左曼谷,我同老公都10幾年冇去過,直頭當係一個新地方去,又估唔到都幾開心喎,食野好好,做spa幾舒服(用左二千幾蚊享受左4個鐘,我覺得真係好皇帝式享受囉),買野好平,買返黎d spa products出奇地好用啦又平,零食都有特式,仲有一d冇冇謂謂既野,我覺得真係好抵,幾值得再去,反正今次未食得晒我想食既野,雖然我咩都話好抵,但去呢個trip冇想象中咁平,可能我地係豪食,豪spa,豪買,卡卡~

排到第三,係一年令我好傷心既事,就係cookie離開左我地,享年14歲5個月零23日。cookie,你已經好叻女架喇,其實14歲年紀都唔細,走之前身體都算健康,你個瘤好大個,唔怪得你早幾日唔肯食野,不過唔怕lu,你走左之後唔會再痛,又唔會肚餓,因為你已經去左一個冇病痛,又好多野食,好開心既地方。班主任衷心祝你無論有冇輪迴,有冇投胎都好,你以後既生活都要開開心心快快樂樂,健健康康,同做cookie一樣係咁靚女。Cookie,其實班主任都仲掛住你,一諗起你就唔捨得你架喇,你係我心入面從來都冇走過~cookie,我同你係暫時一別,到我上天 / 你投胎既時候,我地會再相見,有辦法會相認到,bye bye~~

第四,去到年尾忽然比同事講下講下,我自己都有眼睇,覺得自己係時候升職,不過又一直都未升,都幾深深不忿,不過我自己又提出左一次,老闆又主動咁講左一次,我都唔知仲講咩好喇,唉,好煩呀~個心更係想搵多幾千得幾千啦,反正做既野都係一樣,同埋都眼見有冇能力都係咁上架啦,點解分豬肉唔分比我喎,不過呢樣野,我又唔會太強求,比起bb,呢樣野太微不足道喇。

第五,今年老公出trip,本來只係同佢分開一日,第二日打算自己過去會合佢,點之佢間cheap公司唔比佢stay behind多一日,咁我就唔去啦,反正我又唔會話好鐘意singapore喎,好啦好啦,今次係我地第二次分開,第一次分開係07年,我帶住兩個家姐去日本,離開左老公5日,老人與狗,今次到佢離開我地,留低美女與狗,我出奇地開心,出奇地好訓,係佢上機前我係幾掛住佢,第一晚自己一個返屋企好唔慣,不過自己訓左一晚之後,實在太正喇,好想老公去一個月先返囉,卡卡~~

今年係第二年住係深山,感覺繼續好好,好relax,唔駛等lift,慳返好多時間,希望出年新業主唔好加我地租啦,謝天謝地!!