同我熟既朋友都知道我為左bb而開始睇中醫,不經不覺都已經睇左6個月,一開始就已經係話我脾虛同腎陽虛,本來一直都有慢慢好,不過4月尾病左一病之後,拖垮左之後一直變好既身體,仲要點搞我既脈都好似up唔返,好大鑊。
近呢3個星期,我都好乖咁每個星期at least飲3次michelle叫我飲既湯,雖然唔係好貴,一包湯料5x-6x加多10蚊肉都唔駛100,宜家一煲會飲兩日,所以一個星期都係煲兩次姐,加上強烈要求要早訓,我都已經好努力架喇,不過一到星期五,六,真係好難12點前訓,仍需努力呀~~~~不過11:30訓,係我既角度係覺得人生冇意義,因為8點返到屋企,9點食dinner,睇電視劇,10:30之後先上一陣網,11點幾又準備要訓,好悶呀,第二日訓醒就要返工,咁樣既生活真係好悶,其實我以前都只係夜訓姐,又冇真係出街蒲,夜訓都搞到個身體差晒,我覺得好唔抵囉。
跟住michelle每個星期既藥都會再補d,希望我會有反應,不過好似都冇咩反應喎,啱啱個星期仲幫我試埋用”艾”,佢話一般好weak既病人用完都會有效,不過我做完都係成效不大,死得啦~~今個星期既藥開始有鹿茸喇,佢話話鹿茸係中醫既終極藥材,雖然佢話終極係要多多鹿茸加好多其他野先終極,不過佢係3個星期前先講過,我呢個年紀,佢唔想咁快係我身上用鹿茸,宜家我d藥都有少少,咁如果都係冇起色,下個星期都要多d架啦,好灰~~
識得michelle,佢真係教識我好多野,不少我知道脾虛係導致我肥既主要因素,因為脾虛,去唔到水,所以肥,佢話呢d叫虛胖,所以健睥利水就可以瘦。腎陽係for生育,到目前為止,我都唔知我既腎陽虛對想要bb有幾大影響,不過生仔始終都係o係我個肚入面,我諗我身體都要好好先會易d有掛,點都好啦,我真係估唔到我平時又冇咩大病痛,身體都會咁衰,一星期食6日藥,個個星期針灸都仲係咁差,其實我睇到好灰喇,睇我一定會繼續,因為michelle真係跟得我好足,不過佢話5成係靠佢既treatment,有5成係靠我自己,唯有改變自己既生活習慣,食得健康,訓得夠,戒凍野生冷野,同埋唔好再食我最鐘意既薯片囉。
其實呢,我對生bb真係越來越失望,當你每個月都要mark個表比michelle睇,隨時可以睇返一個月勤力左幾多次,我真係覺得好羞家呀,把口就話想要,其實咩都唔做,咁不如我單性繁殖啦,你話我唔嬲就係假既,不過嬲又有咩用呀?成個人都好灰,我好唔甘心咁就一世呀!!!!!!!!!
No comments:
Post a Comment