其實夢我是經常發的,不過發到大喊都應該是第一次。我不是記得很清楚,零零碎碎,我想記低的是我發怪夢的次數和頻密程度,怪夢如下:
場境1: 我同肥豬帶左nic nic返我媽咪度,不過個度唔係現實媽咪屋企,我都唔知個屋企係o係公園,定係屋企大度有個好似公園既花園,我同肥豬同nic nic坐係石櫈度,我比左d野nic nic食,一食就有3隻死唐狗衝出黎想咬nic nic,我就奮力攬實nic nic,用我個身護住佢,肥豬就講電話唔理我地,我印象中d狗係衝左過黎好多次架,肥豬一直唔理,我就好驚,nic nic就唔知咩事,繼續食野
跟住我好似好嬲咁帶nic nic走,咁又唔知點解一到好似一個閘既地方就有個大浪衝過黎
去到場境2: 就係我同個細佬 & 鬼佬亞爸一齊,好似因為落大雨,我地困住左一個地方,由於一身濕晒,鬼佬亞爸同細佬去沖涼,我又自己一個去沖涼,入到更衣室,好多好多人,個地好dirty,我一腳都係鬼口水,痴立立,但係我又唔驚喎,仲好辛苦搵到一格冇人既沖身地方,不過一企入去,就只係遮到我隻腳,我係可以睇到出面,而出面係有男有女,好似開party咁,所以我只係沖左d鬼口水,跟住沖完隻腳,冇端端我又去左個locker拎野,個櫃外面係咁滴d鬼口水,我一樣係唔驚,係咁執個locker d野,執左好耐都執唔完,跟住到我想走既時候,見到地下有張紙寫住我個老鬼亞爸同細佬幾時死,我好緊張....跟住就唔知點喇
最後一個情境: 我同肥豬同屋企人去一個sun & beach既旅行,不過應該係落後地方,我行過一片田地,有個亞叉同我打眼色,咁我就見到佢賣夢入面我好鐘意叫丁香花既花(其實我唔知邊d叫丁香花,都唔知係唔係真係有呢種花),咁我叫肥豬買比我,佢比左錢就要自己去採,咁佢去採個時,唔小心踩左落d泥漿度,我好快拎左桶水比佢沖下,佢發我脾氣,推我d水不突止,佢仲掉左d花,一地都係,跟住我想執返,佢鬧我"執執執,你執咩野呀?唔好再執呀"(呢一下好真,同現實係無分別)....咁我好唔開心啦,行行下,唔知點解我二家姐睇唔過眼,一手掉左我宜家用緊個銀包落海,跟住同肥豬講:"係唔係呢個都唔執呀?"咁我初初以為我家姐呃肥豬,係掉其他野,不過我望左好耐,我真係唔見左個銀包,我行行下,諗諗下就係夢度喊,話自己以後都返唔到香港,跟住現實我都已經大喊出黎,我諗我真係喊得好大聲,連熟睡既肥豬都可以9秒9攬實我,nic nic又上埋床係咁lam我
我唔知喊左幾耐,只係知道喊完好似訓左一陣就要起身返工
No comments:
Post a Comment