放假一天

今日戰績(mtm除外)

今日終於都可以放假一天,所以今日比平日早起亦都早左少少開舖,係因為要等二家姐同我睇舖,本來叫左佢一點半前黎,點知遲左,成兩點先到,所以我整甲甲就遲左半個鐘,不過都唔緊要啦,放假感覺是久違了,呢種感覺真係非常良好,最好可以變返以前5 days work就好喇,嘻嘻
整左3個鐘甲甲,我就一定係去家樂買下日本衫啦,一個月行一次街,真係覺得個街有好多野睇,不過可惜我得一個鐘時間反,跟住又要去做facial,所以鎖定左目標,去一間shop就夠喇,揀呀揀,都揀左好多野,幾件衫同一對鞋,鞋係因為上一個月落左訂,不過冇貨,所以死唔順氣,係都要揀返一對綠色鞋,平時著開M碼,有時著到S碼既我,居然今次買左對L碼,是但啦,唔會飛出黎就得啦,因為係魷魚款,真係大d都冇所謂,因為以前買過fit size既,緊到飛起,著一次就比我打入冷宮直至死為止,今次呢對,我諗…我諗我應該會唔只著一次既,嘻嘻
至於衫,自從開左nic house之後,我以為自己係日本人,我好似好耐好耐都冇著過local衫,一直都係著日本買返黎既衫,或者係o係faye fashion買既日本衫,真係short得好緊要架,anyway,今日shopping唔係我最最最開心既事,最開心既係,因為我比錢既時候係咁叫姐姐平多d比我啦,佢話8折已經係最平喇,我話cut尾數啦,佢都話唔得架,不過講多兩講,明明係計左1173出黎,佢就冇端端收我1130,可能佢記錯左係1137,所以平多7蚊比我,比錢個一刻,我已經知道佢計錯左,不過最估唔到既係,我再自己計多次,我發現佢計少左我一件衫錢呀,哈哈,可能因為我上次已經比左鞋錢,佢就話鞋就一換一,所以佢又誤會左我只係比3件錢就得,唔知點解錯啦,只係知道成堆野,冇端端變左6折有多,真係開心到我不得了呀,哈哈

點都要買既魷魚綠色鞋

7:20去mtm做facial,因為闊別左20多日先再去做facial,所以又出返好多粒粒,是但啦,我宜家都冇咁緊張喇,因為我覺得我越緊張,d皮膚好似越反我,我唔理唔理,佢好似好得快d,針清時冇覺得特別痛,ok啦,今次順便買左d用完既day cream,eye cream同mask,不過over 3k又有一set野送,見個set都ok,又可以同我blend埋,所以買多左一個mask同一支cleansing,我今次又買錯左cleansing喇,其實我應該係買支night既,上一次都應該係咁,不過唔知搞咩同人講,我要day,今次又錯,又係要左支day,不過好彩,因為我今次冇拎一個mask同cleansing走,所以下次做facial時可以換返,如果唔係,我屋企就會有兩支新既day cleansing架喇
快快樂樂又一天,啱啱完左facial,老公又過左黎接我,所以一齊去食飯飯啦,唔知係唔係好耐冇出街食飯,兩個都好似好鐘意食咁,叫叫叫,食到爆肚,坐車返屋企既時候仲有d想嘔添呀,不過咩都唔緊要啦,最開心係我今日過左兩個月黎最free最開心既一日,哈哈。

上:係我不嬲都好喜歡既款式,最愛著件樽領落底,完全唔覺肥呀,死未?

中:相傳會著瘦人既直條,個款好日本囉,之前去日本真係好多呢個cutting既衫,不過唔敢買,唔知點解今次會買

下:經典蝴蝶結款,黑色穩穩陣陣,good呀