連放係個盤都齊整過人,真係唔得佢死
塊蝦餅真係好多一隻隻既蝦仔,好彈牙架
食飽飽,我地就出發去批發,係搭JR既時候,因為去到某一個站唔識轉邊條線,所以我地企埋左一邊係咁研究,有個好好心識國語既日本女人就黎問我地想去邊啦,我地又唔識講車站名既國語,咪指比佢睇啦,反左一大輪,原來我地三個既國語都好差,係完全同佢溝通唔到,佢都覺得有d奇怪咁走左去,哈哈。 
睇書時都見過呢度大概係咩樣,個感覺好得意,我終於都到左日本傳聞中既批發街,哈哈
好不容易,我地終於都到左批發街,仲好易咁搵到做批發卡既地方,幫我地做卡個人,又識廣東話,又識國語,又識英文,係日本,呢個伯伯都算好叻架喇,雖然樣樣都只係識幾句,不過都好ok,過程好順利,做完卡,我地就開始行據聞係最大規模既批發「海渡」
本來對日本批發都有d期望架,點知一入去就覺得唔多對路,d野好似好outdated喎,不過一場去到,就點都要行下架啦,首先入場既時候要show一show我地既批發卡,然後就去放低手提袋既地方放低我地個袋,佢地會比個透明袋仔我地放返d跟身物品入去既,個袋仔真係好搞笑,不過佢係唔比影相,所以冇得影返黎比老公睇,如果有機會,真係好想同佢去一次。
開始行既時候,我地就上最高一層睇文具,精品同零食,文具都幾平又靚,不過我係唔賣文具既,再睇下精品啦,呢一刻fei e係癲左,因為有好多好多好多麵包超人,原價都已經係平過香港買,宜家我地仲可以批發價買,所以真係好抵,係佢揀揀揀既時候,佢叫我買d袋仔賣下,或者買滿幾多錢就送比人,咁麵包超人都ok既,除左hello kitty之外都算係另一個受歡迎既卡通人物,係精品零食層,我買左兩大包日本糖,手袋仔,同埋好靚既衣架。
再落一層就係童裝,嘩,完全唔得,真係嚇死人,第一係唔靚,第二係貴,咁死貴,我返香港點賣呀,真係唔得佢死呀,我係咁易行左一陣就再落同fei e睇大人衫,都有少少係ok既,都可以揀下,有d就我同大家姐自己要囉,用批發價買衫,感覺真係非常良好,如果要我原價買,我地都唔會買,因為又唔係真係好好好靚,如果要用2-300既價錢,係大減價既時候真係可以有好多選擇,anyway,我地行左三層就走喇,我最多既收獲係買左10幾把遮,都幾得意架(一個月之後買左一半出去,都ok啦)
行完海渡,我地再周圍行下啦,因為時間都唔早喇,批發好似5點就close,宜家就係3點幾就快4點囉,拎住d重到死既遮周圍睇下仲有冇好野啦,無意中發現左一間叫東洋衣料既童裝批發,佢既衫同我係香港入既貨有d人一樣既,我就專攻佢price down既衫同埋一d唔貴既牛記,佢d牛記都幾貴靚架喎,啱晒我呀,因為我係香港真係入唔到bottom野,宜家就啱晒喇,揀呀揀,揀左幾萬yen貨,當佢包起既時候就知大鑊,重死!!!
我地三個人出盡各種方法去拎最多既野,係未到JR站前由於太肚餓,所以都係去麥噹噹醫一醫肚先,呢間麥記比今朝sunshine個比細好多,亂好多,不過都冇發啦,真係好餓呀,咩都要食架喇,為左振奮大家,我就suggest不如將d野lock係池袋車站,跟住我地去0101行一轉,食埋dinner就返酒店,然後再出黎一次,拎埋d貨返去,大家聽到有街行都好開心,咁快快食完,大家都唔講野,專心拎住d貨就行行行,車程都ok順利,唔會比人逼到出唔到站,去到池袋搵左一個最近我地既酒店既locker放低晒d野,跟住就出發去0101,嘻嘻。
去到0101真係眼都花埋,一入去就落B1,大家分頭行事,我去睇鞋,佢地就去gap睇牛記,睇鞋真係一件好開心既事,花多眼亂,都唔知咁揀好,不過訓練有素既我,係唔會令人失望架,繼一朝早係sunshine既red shoe買左一對之後,宜家都揀多4對,好似唔駛錢咁就買買買
今次出trip買既所有鞋,除左左上個對布鞋同埋右下對拖鞋,其他個d都好好著,平均一對都係2xx,真係抵呀,卡卡買完鞋就去返gap搵大家啦,我就冇野啱,不過就買左好多特價既細路牛記,個款好靚,cutting好好,真係有牌子係唔同d架,一買都買左10幾條,買完褲,我就叫fei e去睇下01 model既衫,聽聞係一d靚既大碼衫,我同大家姐就再上啦,一入01既時候,我地都比皮帶吸引,所以自自然然就去左揀,大家都揀得好快,一啱就買,我地大家都揀左3條,揀完就比蚊蚊啦,比蚊蚊既時候我就叫大家姐去搵fei再去tax refund到等啦,我就去睇一睇袋,一定用盡每一分每一秒,今次終於都比我搵到我一早喜歡既車厘子袋喇,二話不說就拎起唔同既size試下,睇左一陣都係覺得細size好睇d,咁就買啦,由於個袋唔係貴,所以我連好無聊既掛飾都買埋,真係無聊到極,買完袋就跑去退稅喇,係退稅既時候又再一次比人問我,老公係唔係識得印銀紙,真係好down,唔好再講啦
上圖:極速揀既皮帶三大條
下圖:尋日買既波點袋同埋今日買既車厘子袋,兩個都好好好鐘意,哈哈
No comments:
Post a Comment