勁開心呀,雖然都有少少唔係好好既地方,不過各個單位既人都好good呀 首先講下姊妹啦,佢地都算準時黎到我屋企化妝,不過最後都遲左開始接新娘,但係end up因為我schedule預左一個鐘去男家,但原來係tko去mos,係可以半個鐘就到,跟返schedule 10:30到男家,好good呀 好,接新娘時,我聽到佢地反得好似好開心,同埋d兄弟超合作同老實,叫佢地做99下push係糖,佢地真係食晒(8個人食99粒),我d姊妹比tissue佢地吐,佢地都食,跟住食wasabi餅,佢地又食晒,所以我伴娘話佢地好老實,其實係想話佢地傻仔,哇哈哈。咁我一早order左亞jim自己作既愛的宣言,真係超好笑呀,佢作得好好,我聽得好開心呀,嘻嘻 我套褂,個個見到都話好靚好特別,我睇返早拍晚播,套褂真係好得呀,同埋d頭花又係好靚,我知有隻係雞冠花,有隻唔知係咩,大大朵,整左上頭好正囉,又夠大,又特別 咁我出左黎,就快快快敬茶啦,我亞媽本來打算要我敬比大陸黎既親戚,不過個時已經係10點,我一定要走,加上我亞媽at least叫左3次,個表嫂都唔肯出黎,我就發晒癲到我二家姐講,我11點前一定要去到男家,大大聲嗌我要走,一陣去酒店有時間先敬,咁我就拉大隊走人,哇哈哈(結婚個日都繼續鬧人) 去到男家,搞笑事件有兩件 1. 人地問62有冇野要同新人講,佢就話:「做父母既,1. 就係想子女健康,2. 到佢地出黎做野,就想佢地有d成就,係咁多,宜d就係父母想見到既野」,我聽完都唔知佢想講咩,唔知可以比咩反應佢,所以我只係「哦,知道喇」,就係咁喇 2. 99差d想我地敬茶比豬妹,話說我地敬完比6299,佢就已經問,下個係亞妹定公公婆婆,我以為自己聽錯,不過都唔理,我好大聲話,梗係公公婆婆啦,跟住到所有亞姨舅父都敬完,佢就叫豬妹出黎,我眼都碌出黎呀,唔係化,叫我敬比個妹,short左呀?我係亞嫂喎,咁我唔敢自己講唔駛呀,我好醒咁問攝影,妹係唔係要敬茶架?佢一答我唔駛,我就同99講,佢地話唔駛喎,咁佢先唔要我地敬咋,不過99都細細聲同自己講,係呀,係咩,真係唔知呀,有d人又話要(奇幻潮又多一個topic)咁跟住lunch都可以係我預定時間進行,咁我同亞jim要係男家換衫,所以冇出去食,不過因為99叫工人送野上黎,都成12:20分送到,我地食得好快好快就要出發大會堂 婚紗look就用左價值150大元既牡丹花,夠晒浮誇,好正呀,其實好似有d似mc杏兒新d輯相,牡丹花個頭,不過我仲要浮誇過佢 註完冊就我同亞jim自己係中環影相,其實都好攰,總之唔影啦,跟住仲要因為塞車,我預先係諗住van仔車一轉送親戚去酒店,再返中環接我地,schedule左係4點接我地,不過塞到3:45第一轉都未去到酒店,如果要返轉頭,我可能要等到佢4:30,仲有又要塞返去酒店呢,所以我同亞jim決定去新碼頭搭船返酒店,我諗我係第一個用新碼頭既新娘,一路係大會堂行去碼頭,又唔係真係好多人望我,d人好似覺得冇事咁,上船前,我問亞jim,d人係唔係會讓我,佢話一定唔會啦,你以為你真係大晒咩,點知d人真係唔會讓,仲好想扒我頭,d hk人真係不近人情呀,人地著住件婚紗都唔讓下路
去到酒店,已經見到stair佈置左,靚,不過又冇我想象中靚,可能係日頭啦,咁我雖然好攰,不過我都堅持一定要影樓梯日景,影完就上房換衫 意外就發生喇,青綠仙子條拉鏈kick住左,仲爆左,跟住搞左好耐,終於都放棄,除左件衫,換左噴血 我就覺得噴血好似唔夠噴血,不過個頭好靚,好型,我目前最鐘意係呢個style 跟住barbie,個南瓜車真係不得了,一出黎,嘩嘩嘩,仲有兩個攝影即刻匆過黎係咁影我架南瓜車,卡卡卡,真係好童話呀,不過影左出黎,呢件冇我想象中咁靚,不過都above average架喇 其實係我換barbie時,yonex已經幫我整返好件青綠仙子,佢叫我唔好嘥,著返佢喎,咁所以我7:45就換返呢件喇 真係估唔到,呢件先係噴晒血,今次yonex同我帶nu bra好勁,真係形造到好逼爆既效果,end up呢件係影得最耐,因為我8點問即拍即發,我影左幾多份,個時先得70份,我order左200份,我心諗大鑊,用唔晒都係要錢,所以之後再影既人,我都係人頭計,唔理佢地係唔係一家人,咁因為又好似好多人未影相,所以我就要求入ballroom影多兩個字,不過原來一入ballroom就好似唔出得返黎咁,一影就影到8:50分,先可以跑去換衫 march in整個頭好掂,個頭紗好靚,似盧淑儀個頭紗架,好正,又整到大大舊咁,好不得了囉,嘻嘻 我最後多謝亞jim時,我以為我會講到佢喊,原來我講左3句就喊,就講唔到,咁跟住求其再講多次多謝老公,就完喇 跟住敬酒,嘩,又係一貫超浮誇既hair style,個頭飾好大舊,仲要加多一條孔雀毛,好正囉,仲有再加6299送個條大金鏈,件衫又金,真係好金光閃閃,好正呀 敬完酒,我去換衫,換完亞jim就唱歌,係全晚既高潮,mc要我企埋上台,我就企左係piano隔離聽,佢唱第一首,一生愛你一個,我就喊lur,喊足3首,不過亞jim唱完第一首,d人就嗌encore,幾勁呀 送客整左蝴蝶結頭,好得意,雖然冇任何頭飾,不過都已經好夠,同件衫好march 總括我成個夢幻婚禮,我真係好滿意1.攝影好落力,yonex話佢地影得好狠,應該影左好多筒,不過唔緊要,最重要係唔好miss任何一刻,同埋佢地要求都幾高,企位一定會執,我睇返即拍即發既相,d燈光冇現場睇咁黑,好靚,同埋佢真係make sure我地一定係企左係中間,影晒個backdrop,好正。仲有就係,我好似冇叫過佢地一定要每套衫都同我地影雙人,不過佢地都會叫我地自己影d先,有時就係我一換完衫就影,有時就我換第2件前影,very good呀,service真係好好,派相都ok,會問guest坐邊,mark好晒先派,好好呀,所以我地覺得貴都值 2. yonex真係要勁讚,每一個hair style都好特別,唔會悶,同埋佢d acc都好正,完全係我想要既野,超好,仲有佢臨走都同我套好d衫,非常好呀,最勁佢幫我整返好條裙,等我唔好嘥,仲有就係佢每次set頭都真係好快,我真係一陣就出返去可以影相,呢樣野都已經好得啦,所以雖然佢係貴,不過真係值 3. 酒店service一流,好細心,好細心,好照顧我地感受,當我好趕好趕去準備march in時,佢見我行得好急,一路係我身後講,ok呀,唔駛急,時間好好呀,好正常,冇遲,小心行,唔好急,真係好好 有一個就負責話比我地知個rundown,一路帶住我地做啦,跟住captain好交帶,同埋一早佢同亞jim同兩個mc夾rundown時,亞jim讚佢真係好細心,會比好多suggestion,咁所有waiter都好好呀,負責企我地隔離assist影相個姐姐,久不久就比水我地飲,又提我換衫,好有禮物,service好過我expect 4. deco真係好靚,條stair一入夜就好掂呀,真係我幻想既野,同埋兩個backdrop都好好呀,影左好黎好靚,我地張花花椅都好good呀 雖然個夢幻婚禮真係好成功,不過我同亞jim都覺得,我地最遺憾就係冇時間好好欣賞所有野,好似我地冇好好睇過所有deco,冇係易拉架簽名,冇定定享受下d食物(雖然之後食返都知好好味,不過如果當時可以食到,應該係仲正),我地兩個都覺得,如果我地係guest會好開心,因為至少可以去搞下d deco,去睇下相簿,咩都反一餐,所以完左夢幻婚禮,我地希望可以參加另一個夢幻婚禮
漏左講一樣,我地march in時,d花炮好勁,真係好多好靚,最good係我地上到台,有人係兩邊放花炮,開始有泡泡,真係好夢幻,好有氣氛,自己好似明星,哇哈哈哈哈
No comments:
Post a Comment